నిజామాబాద్, వెలుగు : కాంగ్రెస్ ప్రకటించిన గృహజ్యోతి పథకం కింద 200లోపు యూనిట్లు కాల్చేవారు కరెంట్ బిల్లులు కట్టవద్దని ఎమ్మెల్సీ కవిత సూచించారు. బిల్లులు కట్టొద్దని గతంలో కాంగ్రెస్ లీడర్లు చేసిన ప్రకటనను సద్వినియోగం చేసుకోవాలన్నారు. బుధవారం నిజామాబాద్ మండలంలోని నర్సింగ్పల్లిలో ఓ ప్రైవేటు కార్యక్రమానికి హాజరైన ఆమె మాట్లాడుతూ కాంగ్రెస్ ప్రభుత్వం గృహజ్యోతి పథకాన్ని జనవరి నుంచచే అమలు చేయాలన్నారు. ఇప్పటికే రూ.2 వేల పింఛన్ పొందుతున్న వారి నుంచి కొత్తగా దరఖాస్తులేవీ తీసుకోకుండా..
కాంగ్రెస్ మేనిఫెస్టో ప్రకారం రూ.4 వేల పింఛన్ వచ్చే నెల నుంచే ఇవ్వాలన్నారు. కొత్త రేషన్కార్డుల వివరాలు మీ–సేవా కేంద్రాల్లో ఉన్నాయని, వాటిని మొదట మంజూరు చేయాలన్నారు. ప్రజాపాలన దరఖాస్తు ఫారంలో నిరుద్యోగ భృతి అంశాన్ని చేర్చాలన్నారు. రైతు బంధు పైసలు రైతుల ఖాతాల్లో ఎందుకు జమ చేయలేదనే చర్చ గ్రామాల్లో జరుగుతోందని, సర్కారు స్పందించాలన్నారు.
