హైదరాబాద్, వెలుగు : ఈ నెల16న జరగనున్న గ్రూప్1 ప్రిలిమినరీ ఎగ్జామ్ కు సంబంధించిన హాల్ టికెట్లను టీఎస్పీఎస్సీ విడుదల చేసింది. టీఎస్పీఎస్సీ ఐడీ, డేటాఫ్ బర్త్ తో tspsc.gov.in వెబ్ సైట్ నుంచి హాల్ టికెట్లు డౌన్ లోడ్ చేసుకోవచ్చని కమిషన్ సెక్రటరీ అనితా రామచంద్రన్ ఒక ప్రకటనలో తెలిపారు. ఓఎంఆర్ షీట్లో ఇది వరకు బుక్లెట్ సిరీస్ ఏ, బీ, సీ, డీ గా ఉండేదని, దాన్ని నంబర్లలోకి మార్చామని ఆమె చెప్పారు.
హాల్టికెట్లను వెబ్ సైట్లో పెట్టిన రెండు గంటల్లోనే 70 వేల మందికి పైగా డౌన్లోడ్ చేసుకున్నారు. రాష్ట్రవ్యాప్తంగా 503 గ్రూప్ 1 పోస్టుల కోసం 3,80,202 మంది పోటీపడుతున్నారు. అభ్యర్థులకోసం 33 జిల్లాల్లో 1,041 పరీక్షా కేంద్రాలను ఏర్పాటు చేశారు. వచ్చే ఆదివారం ప్రిలిమ్స్ ఎగ్జామ్ ఉదయం 10.30 గంటల నుంచి మధ్యాహ్నం ఒంటి గంట వరకు జరుగుతుందని అధికారులు ప్రకటించారు. మరోపక్క గ్రూప్1 పరీక్ష నిర్వహణ, సెంటర్లలో సౌకర్యాలపై టీఎస్పీఎస్సీ చైర్మన్ జనార్దన్రెడ్డి కలెక్టర్లతో పలుమార్లు సమీక్ష నిర్వహించారు. ప్రతి సెంటర్లో సీసీటీవీ కెమెరాలు, బయోమెట్రిక్ అటెండెన్స్ పరికరాలను ఏర్పాటు చేశారు.
