హైదరాబాద్, రంగారెడ్డి, మేడ్చల్– మల్కాజిగిరి జిల్లాల్లోని 46 సెంటర్లలో గ్రూప్–1 మెయిన్స్ ఎగ్జామ్స్ మొదలయ్యాయి. మొదటిరోజు 31,403 మందికిగానూ 22,750 మంది ఎగ్జామ్కు హాజరయ్యారు. మధ్యాహ్నం 1.30 తర్వాత వచ్చిన వారిని అధికారులు సెంటర్లలోకి అనుమతించలేదు. పలువురు మహిళా అభ్యర్థులు అధికారులను బతిమాలుతూ లోపలికి పంపించాలని వేడుకున్నారు. చివరికి చేసేదేమీ లేక కన్నీటి పర్యంతమవుతూ వెనుదిరిగారు.
కోఠి వివేకవర్ధిని కాలేజీలోని సెంటర్కు ఆలస్యంగా వచ్చిన గజ్వేల్ కు చెందిన అనిరుధ్రెడ్డిని, కీసర గీతాంజలి ఇంజినీరింగ్ కాలేజీలో లేటుగా వచ్చిన ముగ్గురిని అధికారులు లోపలికి పంపించడానికి ఒప్పుకోలేదు. కేజీ రెడ్డి ఇంజినీరింగ్కాలేజీకి ఎం.వినోద్, ఘట్కేసర్ సంస్కృతి కాలేజీకి ఆలస్యంగా వచ్చిన బోరబండకు చెందిన గారిడి రాహుల్ను అనుమతించలేదు. లేటుగా వచ్చిన సిటీకి చెందిన మ్యాథ్యూస్ను సికింద్రాబాద్ పీజీ కాలేజీ సెంటర్లోకి అనుమతించలేదు.
ఎంత బతిమలాడినా పంపించలేదని గోడ దూకి లోపలకు వెళ్లేందుకు ప్రయత్నించాడు. పోలీసులు అతన్ని అదుపులోకి తీసుకుని పీఎస్కు తరలించారు. సాయంత్రం వదిలేశారు. ట్రాఫిక్ కారణంగా లేట్అవడంతో నిజామాబాద్ జిల్లా మోర్తాడ్కు చెందిన కొమన్పల్లి వినీత్, గూగుల్ మ్యాప్ తప్పు చూపించడంతో హయత్నగర్కు చెందిన అఖిల ఇన్టైంలో ఇబ్రహీంపట్నంలోని గురునానక్కాలేజీకి చేరుకోలేకపోయారు. ఎగ్జామ్రాసే అవకాశం కోల్పోయారు. ఇలా దాదాపు 15 మంది ఒక నిమిషం నిబంధన కారణంగా ఎగ్జామ్ రాయలేకపోయినట్లు తెలిసింది.– వెలుగు, హైదరాబాద్ సిటీ/ ఇబ్రహీంపట్నం/మేడ్చల్/సికింద్రాబాద్
పోలీసుల సాయంతో పరీక్ష కేంద్రానికి..
టైం అయిపోతుంది.. ఎగ్జామ్ సెంటర్కు వెళ్లలేకపోయేలా ఉన్నామే అని భావిస్తున్న కొంతమందికి పోలీసులు ఆపద్భాంధవులయ్యారు. కీసర ట్రాఫిక్ ఇన్స్పెక్టర్ వెంకటయ్య ఓ అభ్యర్థిని పెట్రోలింగ్ కారులో గీతాంజలి కాలేజీకి చివరి నిమిషంలో తీసుకొచ్చారు. దీంతో ఆ అభ్యర్థి ఎగ్జామ్ సెంటర్కు సమయానికి చేరుకోగలిగారు. అలాగే ఇబ్రహీంపట్నం గురునానాక్ కాలేజీలో కాలికి గాయమైన శెట్టి అంకిత అనే మహిళా అభ్యర్థికి బందోబస్తులో ఉన్న పోలీసులు సాయం చేశారు.
ఆమెను కుర్చీలో కూర్చొబెట్టి మూడో అంతస్తులో ఎగ్జామ్రాసే గదికి మోసుకెళ్లారు. దుండిగల్ పీఎస్ పరిధి ఎమ్ఎల్ ఆర్ఐటీ కాలేజీకి పొరపాటున వచ్చిన అభ్యర్థిని మేడ్చల్ ఏసీపీ ఆదేశాలతో కరెక్ట్ పరీక్షా కేంద్రానికి తీసుకువెళ్లి వదిలేశారు.
