- ఈవీలపై ఐదు శాతం జీఎస్టీ
- పోషకాల బియ్యంపై ఐదు శాతం
- ఫుడ్ డెలివరీ ట్యాక్స్పై నిర్ణయం వాయిదా
జైసల్మేర్ : ఆరోగ్య, జీవిత బీమా ప్రీమియాలపై జీఎస్టీ తగ్గించాలన్న ప్రతిపాదనపై జైసల్మేర్లో శనివారం జరిగిన జీఎస్టీ మండలి సమావేశంలో నిర్ణయం తీసుకోలేదు. అంతేగాక 148 వస్తువులపై జీఎస్టీని మార్చాలన్న మంత్రుల బృందం (జీఓఎం) తన సిఫార్సులను కౌన్సిల్ ముందుకు తీసుకురాలేదు. బీమాపై జీఎస్టీ తగ్గింపు విషయమై మరింత చర్చ జరిగిన తరువాత, తుది నిర్ణయం తీసుకోవాలని కేంద్ర ఆర్థికమంత్రి నిర్మలా సీతారామన్ నాయకత్వంలోని మండలి అభిప్రాయపడింది.
గ్రూపు, ఇండివిడ్యువల్, సీనియర్ సిటిజన్ల పాలసీలపై రేట్ల తగ్గింపుపై నిర్ణయం తీసుకోవడానికి మరోసారి సమావేశం కావాల్సిన అవసరం ఉందని మంత్రుల బృందానికి నాయకత్వం వహిస్తున్న బిహార్ డిప్యూటీ సీఎం సామ్రాట్ చౌదరి అన్నారు. సభ్యుల రిక్వెస్ట్ మేరకు ఈ విషయమై వచ్చే నెల మరోసారి భేటీ అవుతామని ప్రకటించారు. విమానాల ఇంధనం ఏటీఎఫ్ను జీఎస్టీ పరిధిలోకి తీసుకువచ్చే విషయంపైనా నిర్ణయం వాయిదా పడింది. ఈ ప్రపోజల్ను రాష్ట్ర ప్రభుత్వాలు వ్యతిరేకిస్తున్నాయని మంత్రి నిర్మల వివరించారు.
ఇవీ మార్పులు
పోషకాలు కలిపిన బియ్యంపై జీఎస్టీని ఐదు శాతానికి తగ్గించారు. ఎలక్ట్రిక్ వెహికల్స్పై ఐదు శాతం జీఎస్టీ వేస్తారు. వ్యక్తులు పాత ఈవీలను అమ్మితే జీఎస్టీ ఉండదు. కంపెనీలు అమ్మితే మాత్రం 18 శాతం జీఎస్టీ ఉంటుంది. స్విగ్గీ వంటి ఫుడ్ డెలివరీ ప్లాట్ఫారాలపై జీఎస్టీని 18 నుంచి ఐదు శాతానికి తగ్గించాలనే ప్రతిపాదనపై నిర్ణయం తీసుకోలేదు. భూఉపరితలం నుంచి ఆకాశంలోకి పంపించే మిసైల్స్పై, బ్యాంకులు కస్టమర్లపై విధించే పీనల్ చార్జీలపై, జీన్ థెరపీపై జీఎస్టీ ఉండదు.
రెడీ టూ ఈట్ పాప్కార్న్పై 12 శాతం, కారమలైజ్డ్ పాప్కార్న్పై 18 శాతం జీఎస్టీ ఉంటుందని జీఓఎం వివరణ ఇచ్చింది. ఆటోక్లేవ్డ్ ఎరేటెడ్ కాంక్రీట్బ్లాక్స్పై జీఎస్టీ 18 శాతం నుంచి 12 శాతానికి తగ్గింది. పేమెంట్ అగ్రిగేటర్లు రూ.2000 వరకు చేసే చెల్లింపులపై జీఎస్టీ ఉండదు. ప్రకృతీ విపత్తుకు నిధులు సేకరించడానికి , లగ్జరీ వస్తువులపై ఒకశాతం సెస్ విధించాలన్న ఆంధ్రప్రదేశ్ ప్రతిపాదనపై స్టడీ చేయడానికి జీఎస్టీ మండలి మినిస్టర్స్ గ్రూపును ఏర్పాటు చేసింది.
