షిట్సుయ్ హకొయిషి అనే వృద్ధురాలి వయసు 108 ఏండ్లు. ఇదే ఒక రికార్డ్ అయితే.. ఈ బామ్మ మరో రికార్డ్ సృష్టించింది. గిన్నిస్ వరల్డ్ రికార్డ్ సొంతం చేసుకుని మహిళలకు ఆదర్శంగా నిలుస్తోంది. ఇంతకీ ఆ బామ్మ క్రియేట్ చేసిన రికార్డ్ ఏంటి?
సాధారణంగా ఎవరూ చేయలేని పని ఎవరైనా చేసి చూపిస్తే గిన్నిస్ వరల్డ్ రికార్డుల్లోకెక్కుతారు. అలానే హెయిర్ కటింగ్ చేసే పనిలో ప్రతిభ చూపిన కొందరికి గిన్నిస్ రికార్డు సొంతమైంది. అయితే ఆ లిస్ట్లో కేవలం మగవాళ్లే ఉన్నారు. చివరిగా 2018లో అమెరికాకు చెందిన107 ఏండ్ల వయసున్న బార్బర్ ఆంథోని పేరు మీద రికార్డు నమోదైంది. ఆయన చనిపోయాక ఇంకెవరూ ఆ రికార్డును బ్రేక్ చేయలేదు. అలాంటి రికార్డును షిట్సుయ్ బామ్మ కొల్లగొట్టింది. పైగా ఇప్పటివరకు మగవాళ్లకే అంకితమైన ఆ రికార్డు జాబితాలో ఈ ఘనత సాధించిన ఏకైక మహిళా బార్బర్గా పేరు నమోదైంది.
జపాన్లోని నకగవ ప్రాంతంలో నివసించే రైతు కుటుంబంలో పుట్టింది షిట్సుయ్. ఆమె14 ఏండ్ల వయసులోనే బార్బర్ కావాలని నిర్ణయించుకుంది. తర్వాత టోక్యోకి వెళ్లి అక్కడే తను మొదటిసారిగా బార్బర్ పనిలో అప్రెంటిస్గా చేరి మెళకువలు నేర్చుకుంది. 20 ఏండ్ల వయసులో ఆమెకు బార్బర్ లైసెన్స్ లభించింది. అప్పుడు ఆమె తన భర్తతో కలిసి ఒక సెలూన్ ఏర్పాటు చేసింది.
ఆ తర్వాత జపాన్–చైనా మధ్య జరిగిన యుద్ధంలో ఆమె భర్త చనిపోయాడు. అప్పటికే ఆమెకు ఇద్దరు పిల్లలు. ఆ తర్వాత టోక్యోలో జరిగిన అగ్నిప్రమాదంలో తన సెలూన్ కోల్పోయింది. ఎనిమిదేండ్ల తర్వాత ఆమె తన స్వగ్రామంలో మళ్లీ సెలూన్ ప్రారంభించింది. దాని పేరు రిహట్సు హకొయిషి. ఇప్పటివరకు తన వృత్తిని కొనసాగించడానికి కారణం ఏంటని అడిగితే ‘‘నా పనిముట్లను వదల్లేకపోయాను. నా కస్టమర్స్ కోసమే నేను ఈ పనిచేస్తున్నా. రికార్డుకెక్కడం చాలా ఆనందంగా ఉంది. ఈ ఏడాది నాకు 109 ఏండ్లు వస్తాయి. 110 ఏండ్ల వరకు నేను ఈ పని కొనసాగిస్తా” అని కాన్ఫిడెంట్గా నవ్వుతూ చెప్తోంది ఈ బామ్మ.
