- అసలు ఆ గన్ ఎక్కడి నుంచి వచ్చింది?
- పోలీసుల తీరుపై అనుమానాలు
జీడిమెట్ల, వెలుగు: జీడిమెట్ల పోలీస్స్టేషన్ పరిధి గాజులరామారంలో జరిగిన కాల్పుల ఘటన సస్పెన్స్ థ్రిలర్ను తలపిస్తోంది. కాల్పులు జరిపిన మల్లంపేట్కు చెందిన బీఆర్ఎస్ లీడర్నరేశ్ను కేసు నుంచి తప్పించే ప్రయత్నాలు జరుగుతున్నాయనే ఆరోపణలు వినిపిస్తున్నాయి. పోలీసులు గుట్టుచప్పుడు కాకుండా దర్యాప్తు చేస్తుండడం, వారు చేసే ప్రకటనలకు బయటకు వస్తున్న వీడియోలు, సీసీటీవీ ఫుటేజీలు పూర్తిగా భిన్నంగా ఉండడంతో అనుమానాలు బలపడుతున్నాయి.
గాజులరామారం ఎల్ఎన్ బార్వద్ద పార్క్ చేసిన బైక్ నుంచి మంగళవారం అర్ధరాత్రి ఓ మహిళతోపాటు మరో ఇద్దరు పెట్రోల్ తీస్తుండడంతో.. బార్ క్యాషియర్ అఖిలేశ్ గొడవ పడిన విషయం తెలిసిందే. ఆ సమయంలో సదరు మహిళ ఫోన్ చేయడంతో నరేశ్ ఘటనాస్థలానికి చేరుకొని అఖిలేశ్పై కాల్పులు జరపగా, అతడు తప్పించుకున్నాడు. అనంతరం బార్ ఓనర్ను థార్వాహనంతో ఢీ కొట్టారు. దీంతో ఈ పంచాది జీడిమెట్ల పోలీస్స్టేషన్కు చేరింది. బీఆర్ఎస్ నేత అయిన నరేశ్ పోలీసుల ముందే బార్ సిబ్బందిని దుర్భాషలాడుతూ జీవితం లేకుండా చేస్తానని బెదిరించాడు.
అయిన్పటికీ అతడిని పోలీసులు వదిలేశారు. తీరా కాల్పులు విషయం బయటకు రావడంతో మళ్లీ నరేశ్ కోసం గాలింపు చేపట్టారు. గురువారం సాయంత్రం వరకూ నరేశ్ ఆచూకీ పోలీసులకు చిక్కలేదు. ఈ నాటకీయ పరిణామాల మధ్యే శివ అనే వ్యక్తి కాల్పులు తానే జరిపినట్లు గురువారం ఉదయం లొంగిపోయినట్లు విశ్వసనీయ సమాచారం. సీసీ ఫుటేజీలో మాత్రం నరేశ్ కాల్పులు జరుపుతున్నట్లు కన్పిస్తోంది.
ఘటనకు సంబంధించిన ఎలాంటి విషయం బయటకు పొక్కకుండా జాగ్రత్తలు తీసుకుంటున్నారు. దీంతో పోలీసుల తీరుపై అనుమానాలు వ్యక్తమవుతున్నాయి. మరోవైపు, నరేశ్పై దుండిగల్ పోలీస్ స్టేషన్లో గతంలో పలు కేసులు నమోదయ్యాయి. కబ్జాలపై సైతం అతడిపై అనేక ఆరోణలు ఉన్నాయి. తనకు ఉన్న పరిచయాలతో కేసు నుంచి బయటపడే ప్రయత్నాలు చేస్తున్నట్లు పలువురు ఆరోపిస్తున్నారు. నరేశ్ పోలీసుకు చిక్కితే గన్ ఎక్కడి నుంచి వచ్చింది? ఎందుకు తెచ్చారు? ఎన్నిరోజులుగా గన్తో తిరుగుతున్నాడనే విషయాలు బయటకు వచ్చే అవకావశం ఉంది.
