ఆరుగురిని అతికిరాతంగా చంపేసిన హమాస్.. సొరంగంలో డెడ్ బాడీస్

జెరూసలేం: ఇజ్రాయెల్–హమాస్​ మధ్య మళ్లీ యుద్ధవాతావరణం నెలకొన్నది. కాల్పుల విరమణ, బందీల విడుదలకు ప్రయత్నాలు జరుగుతున్న వేళ హమాస్​మరో దారుణానికి పాల్పడింది. తమవద్ద బందీలుగా ఉన్న ఆరుగురిని చంపేసింది. వీరి మృతదేహాలు లభ్యమైనట్టు ఇజ్రాయెల్​వెల్లడించింది. దక్షిణ గాజాస్ట్రిప్‎లోని రఫా నగరంలో ఇజ్రాయెల్​ డిఫెన్స్​ ఫోర్స్​(ఐడీఎఫ్​) దళాలు చేపట్టిన ఆపరేషన్‌‌‌‌లో వీరి మృతదేహాలను గుర్తించినట్టు తెలిపింది. వీరిలో ఇద్దరు మహిళలు ఉండగా.. ఓ ఇజ్రాయెల్ అమెరికన్​యువకుడు ఉన్నారు. 

వారిని రక్షించేందుకు  దళాలు అక్కడికి చేరుకునే కొద్ది గంటలముందే హమాస్​అతికిరాతకంగా చంపేసినట్టు  ఐడీఎఫ్​ తెలిపింది. కాగా, ఈ ఘటనపై ఇజ్రాయెల్​ప్రధాని బెంజమిన్​ నెతన్యాహు దిగ్భ్రాంతి వ్యక్తం చేశారు. మౌనం పాటించి, మృతులకు నివాళి అర్పించారు. వారి కుటుంబాలకు ప్రగాఢ సానుభూతి తెలిపారు. హమాస్‎కు కాల్పుల విరమణ ఇష్టం లేనట్టున్నదని అన్నారు. ఆ మిలిటెంట్​గ్రూప్‎ను నాశనం చేసేదాకా యుద్ధం చేస్తామని ప్రతిజ్ఞ చేశారు. 

తీవ్రంగా స్పందించిన బైడెన్​

రఫాలోని సొరంగంలో ఇజ్రాయెల్ దళాలు గుర్తించిన ఆరుగురు మృతుల్లో ఒకరు ఇజ్రాయెలీ అమెరికన్​ అయిన 23 ఏండ్ల హెర్ష్‌‌ గోల్డ్‌‌బర్గ్‌‌ పొలిన్ ఉన్నారు. అతడి తల్లిదండ్రులు తమ కుమారుడితో పాటు హమాస్ చెర నుంచి బందీలను విడిపించేందుకు తీవ్రంగా శ్రమించారు. కుమారుడి మరణవార్త తెలుసుకొని, వారు దిగ్భ్రాంతి చెందారు. కాగా, పొలిన్​ మరణాన్ని జో బైడెన్​ కూడా ధ్రువీకరించారు. తమ దేశ పౌరుడి మరణం పట్ల విచారం వ్యక్తంచేశారు. హమాస్ ​తగిన మూల్యం చెల్లించుకోక తప్పదని హెచ్చరించారు. అలాగే, ఇజ్రాయెల్​–హమాస్​ మధ్య కాల్పుల విరమణ ఒప్పందం సత్వరమే జరిగేలా కృషిచేస్తానని చెప్పారు.

మరో ఘటనలో ముగ్గురు ఇజ్రాయెల్​పోలీసులు.. 

ఆక్రమిత వెస్ట్​బ్యాంక్‎లో ఇజ్రాయెల్ పోలీస్​ఆఫీసర్ల వాహనంపై పాలస్తీనా మిలిటెంట్లు కాల్పులు జరిపారు. ఆదివారం జరిగిన ఈ ఘటనలో ముగ్గురు ఇజ్రాయెల్​పోలీసులు మృతిచెందారు. ఈ విషయాన్ని ఇజ్రాయెల్​అధికారులు ధ్రువీకరించారు. ఈ ప్రాంతంలో రోజూ ఇజ్రాయెల్ దళాలు దాడులు సాగిస్తున్నాయి. కాగా, ఈ ఘటనకు ఖలీల్ అల్ రెహ్మాన్ బ్రిగేడ్ అనే మిలిటెంట్ గ్రూప్ బాధ్యత వహించింది. ఇది తమ పనేనని ప్రకటించింది. 

ఇజ్రాయెల్‎లో మిన్నంటిన నిరసనలు

బందీల మరణానికి ఇజ్రాయెల్​ప్రధాని నెతన్యాహు కారణమంటూ ఆ దేశ ప్రజలు, ప్రతిపక్షాలు విమర్శలు చేశాయి. బందీల ప్రాణాల గురించి ఆయన పట్టించుకోవడం లేదని, హమాస్‎తో కాల్పుల విరమణ ఒప్పందం చేసుకోవడంలో నిర్లక్ష్యం వహిస్తున్నారని మండిపడ్డారు. దేశవ్యాప్త ఆందోళనకు వారు పిలుపునిచ్చారు. వెంటనే కాల్పుల విరమణ ఒప్పందం చేసుకొని, మిగతా బందీలనైనా హమాస్​చెరనుంచి విడిపించాలని డిమాండ్​ చేశారు.