మెదక్: మహాశివరాత్ర సందర్భంగా ఏడుపాయల జాతరలో రాష్ట్ర ఆర్ధికశాఖా మంత్రి హరీష్ రావు ముఖ్య అతిథిగా పాల్గొన్నారు. దుర్గ భవాని అమ్మవారి కి రాష్ట్ర ప్రభుత్వం తరుపున పట్టువస్త్రాలు సమర్పించారు. ఈ సందర్భంగా మంత్రి హరీష్ రావు మాట్లాడుతూ... ఉమ్మడి రాష్ట్రంలో ఉత్సవాలు అంతంతం మాత్రంగా జరిగేవని, తెలంగాణ రాష్ట్రం వచ్చాక ఏడుపాయల ఉత్సవాలు దినదినాభివృద్ది జరుగుతున్నాయన్నారు. జాతర కోసం సింగూరు నుంచి 0.35 టీఎంసీ ల నీళ్లు విడుదల చేశామని, పోతం శెట్టిపల్లి నుంచి రూ 36 కోట్లతో 100 అడుగుల రోడ్డును అందుబాటులోకి తెస్తామన్నారు. అమ్మవారి దయతో ఈ ప్రాంతం సుభిక్షమవుతుందని ఆశాభావం వ్యక్తం చేశారు. కాళేశ్వరం నీళ్లతో తెలంగాణను సస్యశ్యామలం చేస్తున్నామని, కోటి ఎకరాల పంట సాగు అవుతోందన్నారు. దేశంలోనే కోటి ఎకరాలు సాగుచేసి మొదటి రాష్ట్రంగా తెలంగాణ చరిత్ర పుటల్లోకి ఎక్కిందని, సీఎం కృషి వల్ల రాష్ట్రం అన్ని రంగాల్లో అభివృద్ధి చెందుతోందన్నారు. ఏడుపాయలలో పోలీస్ అవుట్ పోస్ట్, ఏటీఎం లను ఏర్పాటు చేశామని, అలాగే కన్వెన్షన్ సెంటర్ ను కూడా ఏర్పాటు చేస్తున్నామన్నారు. అన్ని సౌకర్యాలతో ఆర్టీసీ బస్టాండ్ ఏర్పాటు చేస్తున్నామని మంత్రి హరీష్ రావు వెల్లడించారు.
