- న్యాయమైన వాటా దక్కితేనే పూర్తి విజయం: హరీశ్ రావు
- పదేండ్ల కేసీఆర్ పోరాటం వల్లే సెక్షన్3పై ట్రిబ్యునల్ వాదనలని కామెంట్
హైదరాబాద్, వెలుగు: అంతర్రాష్ట్ర నదీ జలాల వివాద చట్టం సెక్షన్ 3 ప్రకారం తొలుత రాష్ట్రాల వాటాపైనే వాదనలు వింటామన్న బ్రజేశ్ కుమార్ ట్రిబ్యునల్ ఉత్తర్వులు పాక్షిక విజయమేనని బీఆర్ఎస్ ఎమ్మెల్యే హరీశ్ రావు అన్నారు. కృష్ణా జలాల్లో తెలంగాణకు న్యాయమైన వాటా దక్కితేనే పూర్తి విజయం దక్కినట్లని, ఆ దిశగా రాష్ట్ర ప్రభుత్వం జాగ్రత్తగా వ్యవహరించాలని సూచించారు. మంచి అడ్వకేట్లతో వాదనలు బలంగా వినిపించాలన్నారు. బ్రజేశ్ కుమార్ ఆదేశాలపై హర్షం వ్యక్తం చేసిన ఆయన.. ఇదంతా పదేండ్ల పాటు కేసీఆర్చేసిన పోరాట ఫలితమని శుక్రవారం ఓ ప్రకటనలో పేర్కొన్నారు.
ఇది కేసీఆర్ ప్రభుత్వం పట్టుబట్టి సాధించిన విజయమన్నారు. కృష్ణా జలాల కేటాయింపులు ప్రాజెక్టులవారీగా కాకుండా రాష్ట్రాల వారీగానే ఉండాలని మొదటి నుంచీ కేసీఆర్ వాదించారన్నారు. కానీ, ఆ ఘనతను కాంగ్రెస్ పార్టీ తమ విజయంగా చెప్పుకోవడం భావదారిద్ర్యానికి నిదర్శనమన్నారు. విభజనచట్టం సెక్షన్ 89ని తీసుకొచ్చిందే నాడు కేంద్రంలో అధికారంలో ఉన్న కాంగ్రెస్ పార్టీ అని పేర్కొన్నారు. కృష్ణా జలాల్లో కాంగ్రెస్ రాష్ట్రానికి తీరని అన్యాయం చేస్తే.. దానిని సరిదిద్దేందుకు కేసీఆర్కు పదేండ్ల కాలం పట్టిందన్నారు. నాడు సీఎం హోదాలో కేసీఆర్ బ్రజేశ్కుమార్ ట్రిబ్యునల్ ముందు హాజరై.. రాష్ట్రం తరఫున వాదనలు వినిపించారన్నారు.
సెక్షన్ 3 ప్రకారం కృష్ణా జలాల పంపిణీ కోసం ట్రిబ్యునల్ ఏర్పాటు చేయాలంటూ 2014లోనే కేసీఆర్ ప్రభుత్వం లేఖ రాసిందని చెప్పారు. కానీ, కేంద్రం సెక్షన్ 89 ప్రకారమే విచారణకు ఆదేశించడంతో.. సుప్రీంకోర్టుకు వెళ్లామని తెలిపారు. కేసు వెనక్కి తీసుకుంటేనే ట్రిబ్యునల్కు సెక్షన్ 3పై నివేదిస్తామని కేంద్రం షరతు పెట్టిందని, న్యాయ సలహా తీసుకున్నాకే నిర్ణయం ప్రకటిస్తామని చెప్పడంతో కేసీఆర్ పోరాటం చేశారని అన్నారు. చివరకు కేసు వెనక్కు తీసుకోవడంతో కేంద్రం సెక్షన్ 3లో ఫర్దర్ టర్మ్స్ ఆఫ్ రిఫరెన్స్ జోడించిందన్నారు. ఆ పోరాటాల ఫలితమే ఇప్పుడు ప్రతిబింబించిందని ఆయన పేర్కొన్నారు
