నిజామాబాద్, వెలుగు: కల్లబొల్లి మాటలతో ఓట్ల కోసం వస్తున్న కాంగ్రెస్ను నమ్మొద్దని, కర్నాటకలో వారిచ్చిన హామీలు అమలు కావడం లేదని స్టేట్ ఫైనాన్స్, హెల్త్ మినిస్టర్ హరీశ్రావు పేర్కొన్నారు. శనివారం ఆయన బోధన్ నియోజకవర్గంలోని రెంజల్, సాటాపూర్, ఆర్మూర్లోని మాక్లూర్, నందిపేట, అర్బన్లో ఎన్నికల ప్రచారంలో భాగంగా నిర్వహించిన కార్నర్ మీటింగ్లలో మాట్లాడారు.‘కర్నాటకలో మహిళలకు ఉచిత బస్సు ప్రయాణమని చెప్పి మొత్తం బస్సులు ఆపేశారు. 24 గంటల కరెంటని చెప్పి 3 గంటలు ఇస్తున్నారు. ఉచితాలకు డబ్బులేక స్టూడెంట్స్ స్కాలర్షిప్లకు కోతపెట్టారు. కాంగ్రెస్కు ఓటేసిన అక్కడి ప్రజలు ఆగమైయ్యారు.
తెలంగాణలో ఆ పరిస్థితి తీసుకురావొద్దని’ కోరారు.‘ఇంకా ఎలక్షన్ ముగియక ముందే కాంగ్రెస్లో సీఎం కుర్చీ కోసం కొట్లాడుకుంటున్నారు. కర్నాటక మాదిరి ఎన్నికల్లో గట్టెక్కడానికి మోసపూరిత మేనిఫెస్టోతో వస్తున్నారు. అప్రమత్తంగా ఉండాలి’ అని అన్నారు. నిజాంసాగర్ కెనాల్స్ను రూ.వంద కోట్లతో బాగు చేశామన్నారు. ఎలక్షన్లు మూడొద్దుల పండగ కాదు అయిదేండ్ల ప్రజల భవిష్యత్తును నిర్ణయించేవన్నారు.ఈ పార్టీ సీసా ఇచ్చింది.. ఆ పార్టీ పైసలిచ్చింది.. అని లొంగితే బతుకులు ఆగమవుతాయన్నారు.
గవర్నమెంట్ హాస్పిటల్స్పై ప్రజలకు భరోసా కలిగేలా సౌలత్లు పెంచామని అన్నారు. ఖర్చుతో కూడిన మోకాళ్ల ఆపరేషన్ ను ఆరోగ్యశ్రీలో చేర్చినట్లు చెప్పారు. బీఆర్ఎస్ అధికారంలో వచ్చిన వెంటనే జనవరి నుంచి రేషన్ కార్డులపై సన్నబియ్యం పంపిణీ చేస్తామన్నారు. జిల్లాలో తమ అభ్యర్థులందరికీ హ్యాట్రిక్ విజయాన్ని అందించాలని కోరారు. షకీల్ ఆమెర్, బిగాల గణేశ్గుప్తా, జీవన్రెడ్డి, మేయర్దండూ నీతూకిరణ్ పాల్గొన్నారు.
