- ‘ఉచితాలు’ నెరవేర్చిన తర్వాతే లోక్సభ ఎన్నికల్లో ఓట్లు అడగాలని డిమాండ్
- ‘స్థానిక’ ఎన్నికలు ఇప్పట్లో ఉండవన్న మాజీ మంత్రి
- ఇప్పటి నుంచే పైసలు ఖర్చు చేయొద్దని క్యాడర్కు సలహా
దుబ్బాక, వెలుగు : కాంగ్రెస్ ప్రభుత్వం మాయ మాటలతో అధికారంలోకి వచ్చిందని, నెరవేర్చని హామీలపై ప్రజల్లో చర్చ పెట్టాలని మాజీ మంత్రి తన్నీరు హరీశ్రావు బీఆర్ఎస్ కార్యకర్తలకు పిలుపునిచ్చారు. మంగళవారం దుబ్బాకలో ఎమ్మెల్యే కొత్త ప్రభాకర్రెడ్డి అధ్యక్షతన జరిగిన కృతజ్ఞత సభకు ఆయన ముఖ్య అథితిగా హాజరై మాట్లాడారు. అధికారంలోకి వచ్చిన డిసెంబర్9 నుంచి కాంగ్రెస్ఇచ్చిన ఆరు గ్యారంటీలను ఎందుకు అమలు చేయలేదో ప్రజలకు సమాధానం చెప్పాలని డిమాండ్ చేశారు.
‘ప్రతి ఇంటికి 200 యూనిట్ల కరెంట్ఇస్తమని కరెంట్బిల్లు కట్టొద్దన్నరు. రైతు పండించిన ధాన్యానికి మద్దతు ధరతో పాటు బోనస్గా రూ. 500 ఇస్తమని..వడ్లు అమ్మొద్దన్నరు. రూ. 2వేల పింఛన్ను రూ. 4 వేలకు పెంచుతమన్నరు. రైతుబంధు కింద రూ.15 వేలు ఇస్తమన్నరు. రైతులకు ఏకకాలంలో రుణమాఫీ చేస్తామన్నరు. వాటినే వెంటనే అమలు చేయాలని బాధ్యత గల ప్రతిపక్షంగా ప్రభుత్వాన్ని నిలదీస్తున్నాం’ అని అన్నారు. ఎన్నికల ముందు కాంగ్రెస్ ఇచ్చిన ఉచిత హామీలను నెరవేర్చిన తర్వాతే లోక్సభ ఎన్నికల్లో ఓట్లు అడగాలన్నారు. స్థానిక సంస్థల ఎన్నికలు ఇప్పట్లో వచ్చేటట్లు లేవని, బీఆర్ఎస్ ఆశావాహులు ఇప్పటి నుంచే ఖర్చులు చేయొద్దన్నారు. గత ఎన్నికల్లో తెలిసో తెలియకో జరిగిన తప్పులను సరిదిద్దుకుందామని, కింద పడడం లేవడానికేనన్నారు. తెలంగాణ రాష్ట్రానికి గిరిజన యూనివర్శిటీని ఇస్తానని చెప్పిన కేంద్రంలోని బీజేపీ ప్రభుత్వం మోసం చేసిందన్నారు. ఎమ్మెల్యే కొత్త ప్రభాకర్ రెడ్డి, ఎమ్మెల్సీ వంటేరు యాదవరెడ్డి, జడ్పీ చైర్ పర్సన్ వేలేటి రోజా శర్మ, ఆయా మండాలల ఎంపీపీ, జడ్పీటీసీలు, సర్పంచ్లు, ఎంపీటీసీలు పాల్గొన్నారు.
