ట్రూడో ఓడిపోతడు.. ఎలాన్ మస్క్ జోస్యం

న్యూఢిల్లీ: కెనడాలో 2025లో జరిగే ఫెడరల్ ఎన్నికల్లో ఆ దేశ ప్రధాని జస్టిన్ ట్రూడో ఓడిపోతారని టెస్లా సీఈఓ ఎలాన్ మస్క్ అన్నారు. ఈ మేరకు ఎక్స్ లో ఆయన పోస్ట్ చేశారు. తమ దేశ ప్రధాని ట్రూడో తీరుతో విసిగిపోయామని, ఆయన నుంచి విముక్తి పొందడంలో సహాయం చేయాలని ఓ యూజర్ మస్క్ ను అడగగా ఆయన ఆవిధంగా జవాబు ఇచ్చారు.

అయితే, జర్మనీ ప్రభుత్వంపై ఓ స్వీడిష్ జర్నలిస్టు స్పందిస్తూ ‘‘జర్మన్ సోషలిస్టు ప్రభుత్వం పడిపోయింది. త్వరలోనే ఎన్నికలు జరగవచ్చు” అని సోషల్ మీడియాలో పోస్టు చేశారు. దీనికి మస్క్ స్పందిస్తూ.. జర్మనీ చాన్సలర్ ఓలాఫ్‌‌ షోల్జ్ ను ‘ఫూల్’ గా అభివర్ణించారు. ఈ నేపథ్యంలో వచ్చే ఏడాది తమ దేశంలో జరిగే ఫెడరల్ ఎన్నికలపైనా అభిప్రాయం చెప్పాలని ఓ కెనడా యూజర్.. మస్క్ ను అడిగాడు. ఫెడరల్ ఎన్నికల్లో ట్రూడో ఓడిపోతారని మస్క్ అన్నారు. ట్రూడో మీద మస్క్ గతంలోనూ విమర్శలు చేశారు.