- వీడియో తీసి సోషల్మీడియాలో పోస్ట్ చేసిన బాధితులు
- యాదాద్రి జిల్లా సంస్థాన్ నారాయణపురం పీఎస్లో ఘటన
- సస్పెండ్ చేసిన సీపీ సుధీర్ బాబు
సంస్థాన్ నారాయణపురం, వెలుగు : యాదాద్రి భువనగిరి జిల్లా సంస్థాన్ నారాయణపురం పోలీస్ స్టేషన్లో డ్యూటీ చేస్తున్న హెడ్ కానిస్టేబుల్ బాధితుల దగ్గర డబ్బులు తీసుకుంటున్న వీడియో బుధవారం సోషల్ మీడియాలో వైరల్గా మారింది. మండల పరిధిలోని కడపగండి తండాకి చెందిన అన్నదమ్ముల మధ్య భూ వివాదం ఏర్పడగా వారు స్థానిక పోలీస్ స్టేషన్ కు వచ్చారు. అయితే, వారి నుంచి పోలీస్ స్టేషన్ వెనకాల ఉన్న గదిలో హెడ్ కానిస్టేబుల్ సూర్యనారాయణ లంచం డిమాండ్ చేశాడు. బాధితుడు రూ.500 ఇవ్వబోతుండగా రూ.వెయ్యి ఇవ్వు అంటూ డిమాండ్ చేయడం వీడియోలో వినిపించింది.
దీన్నంతా సదరు వ్యక్తులు ఫోన్లో రికార్డు చేసి వీడియోను సోషల్మీడియాలో పోస్ట్ చేశారు. ఇది వైరల్ కావడంతో విషయం రాచకొండ సీపీ సుధీర్ బాబుకు చేరింది. ఆయన దీనిపై విచారణ జరిపించారు. నిజమేనని తేలడంతో హెడ్కానిస్టేబుల్ సూర్యనారాయణను సస్పెండ్ చేస్తూ ఉత్తర్వులు జారీ చేశారు. .
