ఆరోగ్య, కుటుంబ సంక్షేమ మంత్రిత్వ శాఖ సీపీఆర్ సాంకేతికతను దేశవ్యాప్తంగా బోధించడానికి ప్రచారాన్ని ప్రారంభించింది. దీనికి కారణం ఇటీవలి కాలంలో వయస్సుతో సంబంధం లేకుండా గుండెపోటు కేసులు పెరగడమే.
కార్డియోపల్మోనరీ పునరుజ్జీవనం.. దీన్నే సీపీఆర్ (CPR) అని కూడా పిలుస్తారు. ఇది ఒక వ్యక్తి హృదయ స్పందన లేదా శ్వాస ఆగిపోయినప్పుడు నిర్వహించబడే అత్యవసర ప్రాణాలను రక్షించే ప్రక్రియ. CPR శరీరంలోని ముఖ్యమైన అవయవాలకు రక్త ప్రవాహాన్ని, ఆక్సిజనేషన్‌ను నిర్వహించడానికి చేసే అత్యంత ఆవశ్యకమైన ప్రక్రియ. దీన్ని దృష్టిలో ఉంచుకుని డిసెంబర్ 6న, కేంద్ర ఆరోగ్య మంత్రి మన్సుఖ్ మాండవియా సీపీఆర్ పై ఓ ప్రత్యేక కార్యక్రమం దేశవ్యాప్తంగా ప్రారంభించారు. ఇందులో 10 లక్షల మందికి ఒకేసారి సీపీఆర్ శిక్షణ అందించబడుతుంది. ఈ సాంకేతికతను ప్రథమ చికిత్సగా అందుబాటులో ఉంచనున్నారు.
నేషనల్ క్రైమ్ రికార్డ్స్ బ్యూరో (NCRB) తాజా సమాచారం ప్రకారం, కార్డియాక్ అరెస్ట్‌ల కారణంగా మరణాలు 12.5 శాతం పెరిగాయి. ఈ సంఖ్య 2021లో 28,413 ఉండగా.. 2022లో 32,457కి చేరుకున్నాయి. NCRB డేటా కూడా 2022లో సంభవించిన ఆకస్మిక మరణాల సంఖ్యను కూడా పేర్కొంది. 2021లో ఇది 50,734 నుండి 56,450కి పెరిగింది. గత ఆరు నెలల్లో రాష్ట్రంలో మొత్తం 1,052 మంది గుండెపోటుతో మరణించారని, బాధితులలో 80శాతం మంది 11-25 ఏళ్ల మధ్య ఉన్నవారేనని ఇటీవల గుజరాత్ రాష్ట్ర మంత్రి చెప్పారు.
CPRలో శిక్షణ అనేది ఇప్పుడు దేశంలో విస్తృతంగా అందుబాటులో ఉంది. అమెరికన్ హార్ట్ అసోసియేషన్ వంటి అనేక సంస్థలు CPRని ఎలా సమర్థవంతంగా నిర్వహించాలో బోధించడానికి ప్రత్యేక కోర్సులను కూడా అందిస్తున్నాయి.
