హాలియా, వెలుగు : నల్గొండ జిల్లా హాలియా మండలంలో గురువారం సాయంత్రం భారీ వర్షం కురిసింది. గత కొద్ది రోజులుగా సరైన వర్షాలు లేక ఎండిపోతున్న పత్తి, జొన్న, కంది, మినుము, పెసర, ఆముదం మిర్చి వంటి మెట్ట పంటలకు ఈ వర్షం ఊరటనిచ్చింది. సాగర్ జలాశయానికి సరిపోను నీరు రాకవడంతో హాలియా డివిజన్లో రైతులు బోర్ల ద్వారా 1,03,044 ఎకరాల్లో వరి, 1,00195 ఎకరాల్లో పత్తి సాగు చేస్తున్నారు.
వీటితో పాటు బత్తాయి, నిమ్మ, జామ, దానిమ్మ, పామాయిల్ తోటలను సాగు చేస్తున్నారు. జూన్ నెల నుంచి ఇప్పటివరకు సరైన వర్షం పడలేదు. సాగుచేసిన పంటలు ఎండిపోయే దశకు చేరుకున్నాయి. ఈ నేపథ్యంలో ప్రధానంగా పత్తి రైతులకు ఈ వర్షం ఎంతో మేలుచేసిందని అంటున్నారు. అలాగే బోరు బావుల ఆధారంగా సాగుచేసిన వరి పంటలు కూడా నీటి తడులు సరిపోకపోవడంతో సాగులో ఉన్న వరి పంటలు ఎండిపోయే దశకు చేరాయి.
