దంచికొట్టిన వాన.. స్తంభించిన ఐటీ కారిడార్

• హైవేలు, ఫ్లైఓవర్లపై కిలోమీటర్ల మేర నిలినిన ట్రాఫిక్​

హైదరాబాద్/గచ్చిబౌలి, వెలుగు: గ్రేటర్​పరిధిలోని పలు ప్రాంతాల్లో శుక్రవారం సాయంత్రం భారీ వర్షం కురిసింది. అత్యధికంగా పఠాన్​చెరులో 6.15 సెంటీమీటర్ల వాన పడింది. పగలంతా వాతావరణం పొడిగా ఉండగా, సాయంత్రం 5 గంటల తర్వాత నల్లటి మేఘాలు సిటీని కమ్మేశాయి. జల్లులతో మొదలైన వాన పలు ప్రాంతాల్లో దంచికొట్టింది. కుత్బుల్లాపూర్​లో 4.58, లంగర్ హౌస్ లో 4.28, గచ్చిబౌలిలో 3.85, హెచ్​సీయూలో 3.48 సెంటీమీటర్ల వర్షం కురిసింది. భారీ వర్షానికి ఐటీ కారిడార్​లోని మాదాపూర్​, గచ్చిబౌలి, కొండాపూర్, మియాపూర్, చందానగర్, రాయదుర్గం, హఫీజ్​పేట రోడ్లు జలమయమయ్యాయి. 

కాలనీల రోడ్లు కాల్వలను తలపించాయి. ఐటీ ఉద్యోగులు ఇండ్లకు వెళ్లే టైమ్​కావడంతో కిలోమీటర్ల మేర ట్రాఫిక్​స్తంభించింది. శిల్పారామం, కొత్తగూడ, బయోడైవర్సిటీ, రాయదుర్గం మెట్రో స్టేషన్, మాదాపూర్​ బాటా షోరూం, సీఓడీ జంక్షన్, నెక్టార్​గార్డెన్, లింగంపల్లి బ్రిడ్జి,  ఆల్విన్ క్రాస్​రోడ్డు ప్రాంతాల్లోని రోడ్లపై భారీగా వర్షపు నీరు నిలిచింది. దీంతో బయోడైవర్సిటీ నుండి జేఎన్టీయూ రూట్, కొత్తగూడ నుండి హఫీజ్​పేట రూట్,  గచ్చిబౌలి జంక్షన్,  గచ్చిబౌలి నుంచి  ఖాజాగూడ రోడ్డు, ఆవాస హోటల్​నుంచి సైబర్ టవర్స్​రూట్ లో వెహికల్స్​బారులు తీరాయి. 

దీంతో బైకులు, ఆటోల్లో వెళ్లే ఉద్యోగులు గల్లీలో నుంచి వెళ్లే ప్రయత్నం చేశారు. దీంతో కొండాపూర్​, మాదాపూర్​ ఏరియాల్లోని కాలనీల్లో సైతం ట్రాఫిక్ జామ్​ఏర్పడింది. క్లియర్​చేసేందుకు ట్రాఫిక్​పోలీసులు తీవ్రంగా శ్రమించాల్సి వచ్చింది. జీహెచ్ఎంసీ మాన్​సూన్​ టీం సిబ్బంది రోడ్లపై నిలిచిన నీటిని మోటార్ల సాయంతో తొలగించారు. మరో రెండ్రోజులు మోస్తరు వానలు కురిసే అవకాశం ఉందని, ఉరుములతో కూడిన వాన పడొచ్చని వాతావరణ శాఖ అధికారులు తెలిపారు.