- పలు విమాన సర్వీసులు రద్దు
దుబాయ్: యునైటెడ్ అరబ్ ఎమిరేట్స్ (యూఏఈ) లో మళ్లీ భారీ వర్షాలు బీభత్సం సృష్టించాయి. గురువారం తెల్లవారుజామున వచ్చిన భారీ వానలతో దుబాయ్, అబుధాబి అతలాకుతలమయ్యాయి. వీధులన్నీ నీళ్లతో నిండిపోయాయి. దుబాయ్లో పలు విమాన సర్వీసులతో పాటు బస్సు సర్వీసులు కూడా రద్దయ్యాయి. దుబాయ్కి వెళ్లాల్సిన ఐదు విమానాలను దారి మళ్లించారు.
అలాగే, తొమ్మిది విమాన సర్వీసులు, నాలుగు ఔట్ బౌండ్ సర్వీసులను రద్దు చేశారు. ఎమిరేట్స్ కూడా ఐదు విమాన సేవలను రద్దు చేసింది. దుబాయ్, అబుధాబిలో తెల్లవారుజామున 3 గంటలకే ఉరుములు, మెరుపులతో కూడిన భీకర వర్షాలు కురిశాయి. 4 గంటలకల్లా దేశవ్యాప్తంగా నల్లని కారు మబ్బులు విస్తరించాయి. జెబెల్ అలీ, అల్ మక్తొమ్ ఇంటర్నేషనల్ ఎయిర్ పోర్టు, దుబాయ్ ఇండస్ట్రియల్ సిటీ, దుబాయ్ ఇన్వెస్ట్ మెంట్ పార్క్, జుమైరా విలేజ్ ట్రయాంగిల్లో వానలకు తోడు భీకరంగా గాలులు కూడా వీచాయి.
దీంతో దుబాయ్, అబుధాబి, షార్జాలో ప్రతికూల పరిస్థితుల కారణంగా తమ విమాన సేవలను రద్దు చేస్తున్నామని ఇండిగో ట్విటర్లో తెలిపింది. కాగా, శుక్రవారం కూడా భారీ వర్షాలు కురిసే అవకాశం ఉందని దుబాయ్ వాతావరణ శాఖ హెచ్చరించింది. ఈ నేపథ్యంలో తగిన జాగ్రత్తలు తీసుకోవాలని పౌరులకు సూచించింది.
