హైదరాబాద్: తెలంగాణలో కుండపోత వర్షం కురుస్తోంది. గత మూడు రోజులుగా ఎడతెరిపి లేకుండా భారీ వర్షం కురుస్తోండటంతో రాష్ట్రంలోని ప్రాజెక్టులు, చెరువులు, వాగు, వంకలు, కాలువలు పొంగిపొర్లుతున్నాయి. రాష్ట్రంలో భారీ వర్షాలు కురుస్తోన్న నేపథ్యంలో ప్రభుత్వం అప్రమత్తమైంది. ఈ మేరకు సచివాలయంలో ప్రత్యేకంగా కంట్రోల్ రూమ్ను ఏర్పాటు చేశారు. రాష్ట్ర ప్రభుత్వ ప్రధాన కార్యదర్శి శాంతి కుమారి నిన్న (శనివారం) జిల్లా కలెక్టర్లతో వర్షాలపై నిర్వహించిన టెలీ కాన్ఫరెన్స్లో సచివాలయంలో ప్రత్యేకంగా కంట్రోల్ రూమ్ ఏర్పాటు చేసి రాష్ట్రంలో వరదలు, వర్షాల పరిస్థితిని పర్వవేక్షించనున్నట్టు తెలిపారు.
Also Read:-మీ కుటుంబ సభ్యుడిగా చెప్తున్నా
దీనికనుగుణంగా, సచివాలయంలోని గ్రౌండ్ ఫ్లోర్ రూమ్ నెంబర్ 34లో విపత్తుల నిర్వహణా శాఖ ఆధ్వర్యంలో ఈ కంట్రోల్ రూమ్ తెరిచారు. ఈ కంట్రోల్ రూమ్ నెంబర్ 040 - 2345 4088 అనే నెంబర్ను కూడా ఏర్పాటు చేశారు. వర్షాలు, వరదల పరిస్థితిని జిల్లా కలెక్టర్లతో ఎప్పటి కప్పుడు సంప్రదించి వారికి కావాల్సిన సహాయసహకారాలు, తగు సూచనలను ఈ కంట్రోల్ రూమ్ ద్వారా అందిస్తారు.
