ఫిట్నెస్ కోసం వర్కవుట్లు చేసేవాళ్లు ఎనర్జీ ఫుడ్ తినాలి. ఆకలిని తగ్గించడంతో పాటు అలసటని పోగొట్టే హెల్దీ శ్నాక్స్ వీళ్లకి చాలా అవసరం. అలాంటి శ్నాక్స్ తింటే శక్తితో పాటు శరీరానికి అవసరమైన మైక్రో న్యూట్రియెంట్స్ కూడా అందుతాయి. అంతేకాదు కండరాల అలసట మాయమైతుంది అంటున్నాడు ‘స్టేడ్ఫాస్ట్ న్యూట్రిషన్’ ఫౌండర్ అమన్ పురి.
అరటిపండు
కార్బోహైడ్రేట్లు ఎక్కువ ఉండే అరటిపండు వెంటనే శక్తినిస్తుంది. దీనిలో ఉండే పొటాషియం కండరాల అలసట తగ్గిస్తుంది. అయితే, ఎక్సర్సైజ్ చేయడానికి 30 నిమిషాల ముందు అరటిపండు తినాలి.
ఓట్మీల్ పారిడ్జ్
ఓట్స్లో సాల్యుబుల్ డైటరీ ఫైబర్ బీటా–గ్లూకాన్ ఉంటుంది. ఇది కార్బోహైడ్రేట్స్ని రిలీజ్ చేస్తూ ఎనర్జీ లెవల్స్ తగ్గకుండా చూస్తుంది. ఓట్స్ని నీళ్లు లేదంటే పాలతో కలిపి తినొచ్చు. ప్రొటీన్ పౌడర్, నట్స్, కిస్మిస్తో కలిపి తింటే ఎక్కువ పోషకాలు అందుతాయి.
చిలగడదుంప (గెనుసు గడ్డ)
వర్కవుట్కి ముందు తినాల్సిన పర్ఫెక్ట్ శ్నాక్ గెనుసగడ్డ. ఇది వంట్లో ఎనర్జీ లెవల్స్ తగ్గకుండా చూస్తుంది. ఎ, సి విటమిన్లు యాంటీ ఆక్సిడెంట్గా పనిచేస్తాయి. ఫ్రీ రాడికల్స్ డ్యామేజీని తగ్గిస్తుంది కూడా.
పీనట్ బటర్
ఇందులో ప్రొటీన్లు, మంచి ఫ్యాట్ ఉంటుంది. వర్కవుట్ సెషన్కి అరగంట ముందు పీనట్ బటర్ శాండ్విచ్ తినాలి. రకరకాల ధాన్యాలతో తయారుచేసిన బ్రెడ్ మీద పీనట్ బటర్ రాసుకుని, చియా, అవిసె గింజలు చల్లుకుని కూడా తినొచ్చు.
గుడ్లు
ఉడకబెట్టిన గుడ్డు కూడా హెల్దీ శ్నాక్. గుడ్డులో ఎ, బి 12 విటమిన్లు, ఐరన్, ఫోలేట్, కొలిన్ వంటి పోషకాలు ఉంటాయి. ఉడికించిన గుడ్డు టోర్టిల్లా ర్యాప్స్ తింటే కార్బోహైడ్రేట్లు కూడా అందుతాయి.
ఫ్రూట్ స్మూతీలు
యమ్మీగా ఉండే ఫ్రూట్ స్మూతీల్లో పోషకాలు బోలెడు లభిస్తాయి. పెరుగులో పండ్ల ముక్కలు వేసుకుని తింటే కార్బోహైడ్రేట్లు, ప్రొటీన్లు అందుతాయి.
