ప్రభాస్ అభిమానులు ఎప్పుడెప్పుడా అని ఎదురు చూస్తున్న తన ఇరవయ్యో సినిమా ఫస్ట్ లుక్ రిలీజ్ డేట్ రివీల్ అయింది. ఈ నెల 10న ఉదయం 10 గంటలకి విడుదల చేయబోతున్నట్టు అనౌన్స్ చేశారు. ‘జిల్‌’ ఫేమ్ రాధాకృష్ణ కుమార్ దర్శకత్వంలో తెలుగు, హిందీ, తమిళ, మలయాళ భాషల్లో రూపొందుతున్న ఈ సినిమాని యూవీ క్రియేషన్స్ నిర్మిస్తోంది. పూజాహెగ్డే హీరోయిన్. అరవయ్యేళ్ల క్రితం నాటి సబ్జెక్ట్‌‌తో రూపొందుతున్న ఈ పిరియడ్‌ మూవీకి ‘రాధేశ్యామ్‌’ అనే టైటిల్ ప్రచారంలో ఉంది. మరోవైపు సంగీత దర్శకుడు ఎవరనే విషయంపైనా డైలమా ఉంది. అయితే ప్రముఖ బాలీవుడ్ సంగీత దర్శకుడు జూలియస్ ప్యాకియమ్ ఈ సినిమాకి వర్క్ చేస్తున్నట్టు సమాచారం. చిరంజీవి రీసెంట్ మూవీ ‘సైరా నరసింహారెడ్డి’కి నేపథ్య సంగీతం ఇచ్చిన జూలియస్‌‌కి బ్యా‌‌గ్రౌండ్‌ స్కోర్‌ స్పెషలిస్ట్‌‌గా బాలీవుడ్‌‌లో మంచి గుర్తింపు ఉంది. ధూమ్ 3, ఏక్‌ థా టైగర్‌, భజరంగీ భాయిజాన్, సుల్తాన్ లాంటి చిత్రాలను తన మ్యూజిక్‌‌తో ఓ స్థాయికి తీసుకెళ్లాడతను. అందుకే ఏరికోరి ఈ సినిమాకి తీసుకున్నట్లు తెలుస్తోంది. ప్రభాస్ సినిమాకి సంబంధించి ఇప్పటికే జూలియస్ వర్క్ మొదలైనట్టు సమాచారం.
