తన ప్రతి సినిమాకు ఏదో వైవిధ్యం చూపించాలని తపించే హీరోల్లో ముందుంటాడు సూర్య. ప్రస్తుతం కార్తిక్ సుబ్బరాజ్ దర్శకత్వంలో ‘రెట్రో’ అనే సినిమాలో అతను నటిస్తున్నాడు. పూజాహెగ్డే హీరోయిన్‌‌‌‌గా నటిస్తున్న ఈ చిత్రం మే నెలలో రిలీజ్ కానుంది. మరోవైపు ఆర్జే బాలాజీ దర్శకత్వంలోనూ ఓ సినిమా చేస్తున్నాడు. ఇవికాక మరో కొత్త సినిమాకు సైన్ చేసినట్టు టాక్.
మలయాళ నటుడు, దర్శకుడు బాసిల్ జోసఫ్‌ ఈ చిత్రాన్ని తెరకెక్కించనున్నాడట. జయ జయ జయ జయహే, సూక్ష్మదర్శిని, లాంటి చిత్రాలతో ఓటీటీ ద్వారా తెలుగులోనూ మంచి గుర్తింపును అందుకున్న బాసిల్.. మరోవైపు ‘మిన్నల్ మురళి’ లాంటి చిత్రాలతో దర్శకుడిగానూ మెప్పించాడు. అతను హీరోగా నటించిన ‘పొన్‌‌‌‌మాన్‌’ చిత్రం గురువారం విడుదలై పాజిటివ్ టాక్ తెచ్చుకుంది.
ఇక హీరోగా బిజీ అవడంతో డైరెక్షన్‌‌‌‌కు చిన్న గ్యాప్ ఇచ్చిన బాసిల్.. సూర్య సినిమాతో తిరిగి మెగా ఫోన్ పడుతున్నాడు. ఈ మూవీ కాన్సెప్ట్‌ నచ్చి మలయాళ సూపర్ స్టార్ మమ్ముట్టి తన సొంత బ్యానర్‌‌‌‌‌‌‌‌లో ఈ చిత్రాన్ని నిర్మించబోతున్నారని తాజా సమాచారం. దర్శకుడిగా బాసిల్ లాస్ట్ మూవీ ‘మిన్నల్ మురళి’ తరహాలో ఇది కూడా సూపర్ హీరో సబ్జెక్ట్ అని తెలుస్తోంది.
