-in-Telangana_bFGpisc3ue.jpg)
మహబూబ్నగర్, వెలుగు : కాంగ్రెస్ పార్టీ లీడర్లు హైరానా పడుతున్నారు. ఆ పార్టీ హైకమాండ్ ఆదివారం ఫస్ట్ లిస్ట్ రిలీజ్ చేయనుండడంతో , అందులో తమ పేరు ఉంటుందా? లేదా? అని టెన్షన్ పడుతున్నారు. దీంతో నిన్నటి వరకు ఢిల్లీలో మకాం వేసిన లీడర్లంతా శనివారం హైదరాబాద్కు చేరుకున్నారు. ఫస్ట్ లిస్ట్లో తమ పేరు ఉండేలా చూడాలని గాడ్ పాదర్ల చుట్టూ చక్కర్లు కొడుతున్నారు.
ఫస్ట్ లిస్టులో ఐదు నియోజకవర్గాలు?
ఉమ్మడి జిల్లాలోని 14 అసెంబ్లీ స్థానాలకు గాను కొడంగల్, కొల్లాపూర్, అలంపూర్, అచ్చంపేట స్థానాల్లో ఇప్పటికే క్యాండిడేట్లను ఫైనల్ చేసినట్లు తెలిసింది. ఈ సెగ్మెంట్ల నుంచి ఆ పార్టీ పీసీసీ చీఫ్ రేవంత్రెడ్డి, మాజీ మంత్రి జూపల్లి కృష్ణారావు, మాజీ ఎమ్మెల్యేలు ఎస్ఏ సంపత్కుమార్, చిక్కుడు వంశీకృష్ణ లేదా ఆయన భార్య చిక్కుడు అనురాధకు టికెట్ కన్ఫాం అయినట్లు తెలుస్తోంది.
జడ్చర్లలో జనంపల్లి అనిరుధ్రెడ్డి, ఎర్రశేఖర్ మధ్య టికెట్ కోసం పోటీ ఉండగా, హైకమాండ్ సయోధ్య కుదర్చడంతో ఈ సెగ్మెంట్ నుంచి అనిరుధ్రెడ్డి బరిలో ఉంటారనే టాక్ వినిపిస్తోంది. మిగతా నియోజకవర్గాల్లో ఇద్దరు, ముగ్గురు చొప్పున టికెట్ల కోసం పోటీ పడుతుండడంతో టికెట్లు ఫైనల్ చేయడంలో ఆలస్యమవుతోంది.
మిగిలిన సెగ్మెంట్లలో పోటాపోటీ..
నాగర్కర్నూల్, వనపర్తి, కల్వకుర్తి, గద్వాల, మక్తల్, నారాయణపేట, మహబూబ్నగర్, దేవరకద్ర సెగ్మెంట్లలో టికెట్ల కోసం పోటీ ఎక్కువగా ఉంది. ఈ సెగ్మెంట్లలో కొత్త వారికి కాకుండా పార్టీని నమ్ముకొని పని చేస్తున్న వారికే టికెట్లు ఇవ్వాలని డిమాండ్ చేస్తున్నారు. గద్వాల టికెట్ను బీఆర్ఎస్ నుంచి కాంగ్రెస్లో చేరిన సరితకు ఇవ్వొద్దని ఆ పార్టీ రాష్ట్ర కార్యదర్శి కుర్వ విజయ్‌‌‌‌కుమార్ ఢిల్లీలో ఇటీవల ప్లకార్డులు ప్రదర్శించారు. కొల్లాపూర్ టికెట్ను ఉస్మానియా విద్యార్థి కోటాతో పాటు బీసీ కేటగిరిలో తనకు కేటాయించాలని ఏఐసీసీ ఓబీసీ సెల్‌ జాతీయ కో ఆర్డినేటర్‌ కేతూరి వెంకటేశ్ ఢిల్లీలో తన గళాన్ని వినిపించారు. నాగర్కర్నూల్ నుంచి నాగం జనార్దన్రెడ్డికే టికెట్ ఇవ్వాలని రెండు రోజుల కింద ఆయన వర్గీయులు గాంధీభవన్ ఎదుట నిరసన తెలిపారు.
వనపర్తిలో మాజీ మంత్రి చిన్నారెడ్డి టికెట్ కోసం ప్రయత్నం చేస్తుండగా, యూత్ కాంగ్రెస్ అధ్యక్షుడు శివసేనారెడ్డి టికెట్ తనకే ఇవ్వాలని డిమాండ్ చేస్తున్నారు. ఆయనతో పాటు ఇటీవల బీఆర్ఎస్ నుంచి హస్తం గూటికి చేరిన పెద్దమందడి ఎంపీపీ మేఘారెడ్డి తనకు చాన్స్ ఇవ్వాలని కోరుతున్నాడు. మహబూబ్నగర్ నుంచి ఎన్పీ వెంకటేశ్, సంజీవ్ ముదిరాజ్, ఒబేదుల్లా కొత్వాల్ టికెట్ల కోసం ప్రయత్నాలు చేస్తున్నారు. కానీ, హైకమాండ్ ఇటీవల పార్టీలో చేరిన పాలమూరు మాజీ ఎమ్మెల్యే యెన్నం శ్రీనివాస్రెడ్డి పేరును పరిశీలిస్తోందనే చర్చ నడుస్తోంది.
ఇప్పటికే ఆయన ప్రచారాన్ని కూడా మొదలు పెట్టగా, ఆదివారం ప్రకటించే ఫస్ట్ లిస్ట్లో పేరు ఉంటుందనే వార్తలు వినిపిస్తున్నాయి. కల్వకుర్తి నుంచి ఎన్ఆర్ఐ రాఘవేందర్రెడ్డితో పాటు ఇటీవల పార్టీలో చేరిన కసిరెడ్డి నారాయణరెడ్డి టికెట్ ఆశిస్తున్నారు. కానీ, వీరిలో ఎవరిని ఫైనల్ చేస్తారనేది సస్పెన్స్లో పెట్టారు. దేవకరద్ర నుంచి పాలమూరు డీసీసీ అధ్యక్షుడు జి.మధుసూదన్రెడ్డి (జీఎంఆర్)తో పాటు కాటం ప్రదీప్కుమార్ గౌడ్ టికెట్ను ఆశిస్తున్నారు. మక్తల్ సెగ్మెంట్ నుంచి ఆ పార్టీ నారాయణపేట డీసీసీ అధ్యక్షుడు వాటికి శ్రీహరి
దేవరకద్ర మాజీ ఎమ్మెల్యే సీతమ్మతో పాటు దివంగత మాజీ ఎమ్మెల్యే చిట్టెం నర్సిరెడ్డి మనువరాలు చిట్టెం పర్ణికారెడ్డి పేర్లను హైకమాండ్ పరిశీలిస్తోంది. ఈ ముగ్గురి మధ్య రాజీ కుదిరితే సీతమ్మను దేవరకద్ర నుంచి పోటీకి దింపి, పర్ణికారెడ్డిని మక్తల్ నుంచి బరిలో దింపే ప్లాన్ చేస్తోంది. నారాయణపేట నుంచి ఎర్ర శేఖర్ను పోటీకి దింపేందుకు హైకమాండ్ ఇప్పటికే సిద్ధం కాగా, ఆ పార్టీ నుంచి కుంభం శివకమార్రెడ్డి కూడా టికెట్ కోసం ప్రయత్నాలను ముమ్మరం చేశారు.
బీసీ ఈక్వేషన్ నేపథ్యంలో..
బీసీ టికెట్ల కేటాయింపుపై కూడా స్తబ్తత నెలకొంది. పాలమూరు, మక్తల్, నారాయణపేట, దేవరకద్ర, గద్వాల, షాద్నగర్ నియోజకవర్గాల్లో బీసీ ఓటర్లు ఎక్కువగా ఉండగా, ఈ అసెంబ్లీ సెగ్మెంట్లలో బీసీలకు టికెట్లు కేటాయించాలనే డిమాండ్లు వినిపిస్తున్నాయి. కానీ, రాష్ట్ర పార్టీ మాత్రం నాలుగు సెగ్మెంట్లలో బీసీ లీడర్లను ఎన్నికల బరిలో నిలిపే ఆలోచన చేస్తున్నట్లు ఆ పార్టీ వర్గాల ద్వారా తెలిసింది.
