హైదరాబాద్ : ఏబీవీపీ కార్యకర్తలు తలపెట్టిన ప్రగతిభవన్ ముట్టడి ఉద్రిక్తంగా మారింది. రాష్ట్రంలో ఇంజనీరింగ్ ఫీజుల పెంపును నిరసిస్తూ ఏబీవీపీ ప్రగతిభవన్ ముట్టడికి పిలుపునిచ్చింది. ప్రగతిభవన్ వద్దకు చేరుకున్న ఏబీవీపీ నాయకులు, విద్యార్థులు రాష్ట్ర ప్రభుత్వానికి వ్యతిరేకంగా నినాదాలు చేశారు. ప్రగతిభవన్ వైపునకు దూసుకెళ్లే ప్రయత్నం చేశారు. దీంతో పోలీసులు వారిని అడ్డుకుని.. అదుపులోకి తీసుకున్నారు.
ఇదిలా ఉంటే.. మరోవైపు ప్రగతిభవన్ వద్ద పోలీసులు అత్యుత్సాహం చూపారని ఏబీవీపీ విద్యార్థులు మండిపడ్డారు. ప్రగతిభవన్ ను ముట్టడించేందుకు ప్రయత్నించిన తమపై పోలీసులు ప్రతాపం చూపారని ఆరోపించారు. అదుపులోకి తీసుకున్న విద్యార్థి నాయకులను పోలీసులు డీసీఎం, జీపులోకి తోసివేసిన సమయంలో పలువురు విద్యార్థి నాయకులకు గాయాలయ్యాయి.
