- కొన్ని నిమిషాల్లోనే రాయదుర్గం, మియాపూర్ ఫీడర్ ట్రిప్
- పలు ప్రాంతాల్లో నిలిచిపోయిన కరెంట్
- యుద్ధ ప్రాతిపదికన స్పందించిన సిబ్బంది
- ప్రత్యామ్నాయ మార్గాల్లో కరెంట్ పునరుద్ధరణ
- ఎన్నికల ముందురోజే ఘటన జరగడంపై అనుమానాలు
- బరితెగించిన దుర్మార్గులంటూ డిస్కం ట్వీట్
- దర్యాప్తునకు ఆదేశించిన ట్రాన్స్కో, జెన్కో సీఎండీ రిజ్వీ
- ప్రమాదమా? కుట్రా? అనే కోణంలో పోలీసుల విచారణ
హైదరాబాద్, వెలుగు : హైదరాబాద్ సిటీలోని మియాపూర్లో 220/132 కేవీ సబ్స్టేషన్లను కలిపే హైటెన్షన్ యూజీ కేబుల్ ఆదివారం ఉదయం కాలిపోయింది. మియాపూర్– రాయదుర్గం లేన్లో ఉదయం 6.30 గంటలకు మంటలు చెలరేగి, కేబుల్ అంటుకున్నది. దీని ప్రభావంతో కొన్ని నిమిషాల వ్యవధిలోనే రాయదుర్గం, మియాపూర్ ఫీడర్ ట్రిప్ అయ్యింది.
దీంతో మియాపూర్132 కేవీ, కైతలాపూర్132 కేవీ సబ్ స్టేషన్ల పరిధిలోని మేడ్చల్, సైబర్ సిటీ సర్కిల్లో కరెంటు సరఫరా ఎక్కడికక్కడ నిలిచిపోయింది. విద్యుత్ అధికారుల సమాచారంతో ఫైర్ సిబ్బంది, పోలీసులు హుటాహుటిన సంఘటనా స్థలానికి చేరుకొని మంటలు ఆర్పారు.
సదరన్ డిస్కం సీఎండీ ముషారఫ్ ఫరూఖీ, ట్రాన్స్ కో ట్రాన్స్ మిషన్ డైరెక్టర్ జగత్రెడ్డి, మాదాపూర్ జోన్ డిప్యూటీ కమిషనర్ వినీత్, ఫైర్ అధికారులు ఘటనా స్థలాన్ని పరిశీలించారు. నిమిషాల వ్యవధిలోనే విద్యుత్సరఫరాను పునరుద్ధరించారు. పీక్ డిమాండ్ఉన్న టైమ్లో.. తెల్లారితే ఎన్నికలనగా కేబుల్ కాలిపోవడంపై అనుమానాలు వ్యక్తమవుతున్నాయి.
‘దుర్మార్గులు బరితెగించారు’ అంటూ డిస్కం కూడా ట్వీట్ చేయడం ఈ అనుమానాలకు బలం చేకూరుస్తున్నది. ఈ ఘటనపై ట్రాన్స్కో, జెన్కో సీఎండీ రిజ్వీకూడా పోలీస్ దర్యాప్తునకు ఆదేశించడంతో ఉత్కంఠ నెలకొన్నది.
యుద్ధప్రాతిపదికన పునరుద్ధరణ
సాఫ్ట్వేర్ సంస్థలుండే కీలకమైన ఏరియాలో కరెంట్సప్లై నిలిచిపోవడంతో విద్యుత్ అధికారులు , సిబ్బంది యుద్ధప్రాతిపదికన స్పందించారు. కేవలం 29 నిమిషాల్లో ఆల్టర్నేట్ రూట్లో ఫీడర్లు మార్చి సరఫరాను పునరుద్ధరించారు. అప్పటికే పలు ప్రాంతాల్లో కరెంటు సరఫరాకు అంతరాయం ఏర్పడింది. అధికారులు అప్రమత్తం కాకపోతే భారీ ప్రమాదం జరగడంతో పాటు చాలా ఏరియాల్లో కరెంట్ సప్లై నిలిచిపోయి.. నష్టం వాటిల్లేదని తెలుస్తున్నది.
ఘటనపై అనుమానాలు
విద్యుత్సబ్ స్టేషన్లకు కరెంటు సరఫరా చేసే హైటెన్షన్ కేబుల్ కాలిపోయిన ఘటనపై అనుమానాలు తలెత్తుతున్నాయి. సోమవారం లోక్సభ ఎన్నికలు జరగనున్న తరుణంలో కావాలనే కరెంట్పై సర్కారును బద్నాం చేసే కుట్ర జరిగిందా? అనే కోణంలో విద్యుత్ అధికారులు దర్యాప్తు ప్రారంభించారు. ఈ హైటెన్షన్ కేబుల్ సుమారు 200 మెగావాట్ల పవర్ను క్యారీ చేస్తుంది. అంటే ఆ టైమ్లో హైదరాబాద్ సిటీలో సరఫరా అయ్యే కరెంటులో 10 శాతం దీని ద్వారా అందుతుంది. మొన్నటి ఎండల్లో కరెంట్కు ఫుల్ డిమాండ్ఉన్న టైమ్లోనూ ఈ కేబుల్ కాలిపోలేదు.
అలాంటిది ఆదివారం ఉదయం, పవర్ డిమాండ్ అంతగా లేని టైంలో కేబుల్కు మంటలు అంటుకోవడంపై అధికారులు అనుమానాలు వ్యక్తం చేస్తున్నారు. కాంగ్రెస్ సర్కారు అధికారంలోకి వచ్చిన కొత్తలో కూడా పలుచోట్ల సబ్స్టేషన్లలో ప్రమాదాలు జరిగాయి. ఇటీవల సూర్యాపేట, మహబూబ్నగర్ జిల్లాల్లో ఎలాంటి కరెంట్ కోతలు లేకున్నా ఓ పార్టీ నేతలు కాంగ్రెస్సర్కారు కరెంట్సరిగ్గా సరఫరా చేయడం లేదని ఆరోపించారు.
ఈ నేపథ్యంలో తాజా ఘటనపై ట్రాన్స్కో, జెన్కో సీఎండీ రిజ్వీ పోలీసు దర్యాప్తునకు ఆదేశించారు. కాగా, ఎన్నికల నేపథ్యంలో ఎవరైనా కావాలనే కేబుల్కు నిప్పు పెట్టారా? అనే కోణంలో సైబరాబాద్ పోలీసులు దర్యాప్తు ప్రారంభించారు.
