- 20 కి.మీ నేషనల్ హైవేపై 7 చోట్ల క్రాస్ చేయాల్సిన పరిస్థితి
- కెనాల్ నిర్మాణానికి భారీగా ఖర్చు
- పూర్తయినప్పుడు చూద్దాంలే అని పట్టించుకోని గత పాలకులు
- భూ సేకరణ ఖర్చుపై స్పష్టత లేదు
- కెనాల్ అలైన్ మెంట్ మార్చాలంటున్న నిపుణులు
- స్థానిక ప్రజాప్రతినిధుల జోక్యంతోనే సాధ్యం
నాగర్ కర్నూల్, వెలుగు : పాలమూరు – రంగారెడ్డి ప్రాజెక్ట్ నుంచి కల్వకుర్తి సెగ్మెంట్ లోని ఐదు మండలాల్లో 43 వేల ఎకరాలకు సాగు నీరందించేందుకు ప్రతిపాదించిన మెయిన్ కెనాల్ కు హైవే కష్టాలు వచ్చాయి. అయితే.. దీనికి ప్రత్యామ్నాయంగా హైవే అడ్డు రాకుండా 25 కి.మీ దూరం నుంచి కాల్వను ఆమనగల్ వరకు నిర్మించవచ్చని ఇంజనీరింగ్ నిపుణులు పేర్కొంటున్నారు. ఇప్పటికే నిపుణులు, రైతుల నుంచి వచ్చిన అభ్యంతరాల దృష్ట్యా మిడ్జిల్ మండలం బోయిన్పల్లి నుంచి ఆమనగల్ వరకు మెయిన్ కెనాల్కు ఎక్కడ హైవే తగలకుండా అల్టర్నేట్ అలైన్మెంట్ను ప్రతిపాదించారు. దీంతో దాదాపు 25 కి. మీ దూరం తగ్గుతుందని సమాచారం. ప్రస్తుతం ప్రతిపాదిత 52 కి.మీ మెయిన్ కెనాల్ నిర్మాణం అసాధ్యమనే వాదన వినిపిస్తోంది.రూ.1200 కోట్లతో (పాత అంచనాలు) మెయిన్ కెనాల్, ఏడు చోట్ల హైవేలపై బ్రిడ్జిల నిర్మాణాలు సాధ్యమేనా..! అనే చర్చ ఇరిగేషన్ డిపార్ట్మెంట్లో జరుగుతోంది.
ఆయకట్టు లేని ప్రాంతాలను కలుపుతూ..
నాగర్ కర్నూల్ జిల్లా బిజినేపల్లి మండలంలోని వట్టెం రిజర్వాయర్ నుంచి ఇబ్రహీంపట్నం వరకు 130 కి.మీ మెయిన్ కెనాల్ నిర్మాణానికి 2019లోనే సర్వే చేశారు. మిడ్జిల్ మండలం బోయిన్పల్లి నుంచి కల్వకుర్తి మండలం తాండ్ర వరకు 20 కి.మీ దూరంలో మెయిన్ కెనాల్ ఏడు సార్లు నేషనల్ హైవేను క్రాస్ చేసేలా అప్పట్లో అలైన్ మెంట్ చేశారు. మహబూబ్నగర్–-మిర్యాలగూడ హైవేపై బోయిన్పల్లి, ముచ్చర్లపల్లి గేట్వద్ద రెండు సార్లు, కల్వకుర్తి హైవేపై జేపీనగర్, తాండ్ర గ్రామాల వద్ద కూడా కెనాల్ దాటాల్సి ఉంటుంది.
కొత్తగా ప్రతిపాదించిన 167కే హైదరాబాద్– -నంద్యాల జాతీయ రహదారిని కూడా క్రాస్ చేయాల్సిన పరిస్థితులు ఉన్నాయని ఇంజనీరింగ్ నిపుణులు ఆందోళన వ్యక్తం చేస్తున్నారు. ఆయకట్టు లేని ప్రాంతాలను కలుపుతూ దాదాపు 26 కి. మీ అదనంగా చుట్టూ తిరిగిన కెనాల్తో జాతీయ రహదారిపై బ్రిడ్జిల నిర్మాణానికే దాదాపు రూ.80 కోట్లు ఖర్చు చేయాల్సి వస్తుంది. మరోవైపు భూ సేకరణకు వందల కోట్లు చెల్లించాల్సి ఉంటుంది.
లైట్ తీసుకున్న గత పాలకులు
కెనాల్ నిర్మాణంపై గతంలో పలుమార్లు అభ్యంతరాలు వ్యక్తమైనా అప్పటి సర్కార్ పెద్దలు లైట్గా తీసుకున్నారు. ఒక దశలో “ కాల్వ కట్టేది లేదు.. నీళ్లిచ్చేది లేదు.. ప్రాజెక్ట్ పూర్తయినప్పుడు చూసుకుందాంలే ” అంటూ దాటవేశారు. కాంగ్రెస్ ప్రభు త్వం వచ్చిన తర్వాత పాలమూరు – రంగారెడ్డి ప్రాజెక్ట్ పనుల పురోగతి, నిధుల విడుదల, కాల్వల నిర్మాణం, భూ సేకరణ, పునరావాసంపై సీరియస్గా దృష్టి సారించింది. సీఎం కూడా ఈ ప్రాంతానికి చెందినవారు కావడంతో ఇంజనీరింగ్అధికారులు పాలమూరు మెయిన్ కెనాల్ టెక్నికల్ ఇష్యూపై ప్రధానంగా ఫోకస్ చేశారు.
రెండు రిజర్వాయర్ల నుంచి నీరు
మూడు సెగ్మెంట్లలో 1,17,000 వేల ఎకరాలకు సాగు నీరిచ్చేందుకు వట్టెం రిజర్వాయర్ నుంచి మెయిన్ కెనాల్ను నాగర్ కర్నూల్ సెగ్మెంట్ లో 39వేల ఎకరాలు, జడ్చర్ల సెగ్మెంట్ లో 37 వేల ఎకరాలు, కల్వకుర్తి సెగ్మెంట్ లో 43,215 ఎకరాలకు సాగు నీరు అందించేలా డిజైన్ చేశారు. కల్వకుర్తి సెగ్మెంట్ లోని టెయిల్ ఎండ్లోని 43వేల ఎకరాలకు పారించేందుకు అధికారులు ప్రతిపాదించారు. పాలమూరు– రంగారెడ్డి ప్రాజెక్ట్లోని ఉదండాపూర్ రిజర్వాయర్ నుంచి మాడ్గుల, తలకొండపల్లి, కడ్తాల్, ఆమనగల్, వెల్డండ మండలాలకు 80,986 ఎకరాలకు సాగు నీరు ఇచ్చేలా మరో మెయిన్ కెనాల్ను ప్రతిపాదించారు. వట్టెం, ఉదండాపూర్ రిజర్వాయర్ల నుంచి మూడు సెగ్మెంట్లకు సాగునీరందించే మెయిన్ కెనాల్స్ బెంగళూరు, మహబూబ్నగర్, మిర్యాలగూడ, నంద్యాల హైవేలను క్రాస్ చేస్తేనే సాగు నీరు అందించే పరిస్థితి ఉంది.
ఎంపీ, ఎమ్మెల్యేలు జోక్యం చేసుకుంటేనే..
తెరపైకి వస్తున్న కొత్త ప్రతిపాదనతో తక్కువ భూ సేకరణతో అదనపు ఆయకట్టుకు నీరిచ్చే చాన్స్ లేకపోలేదని డివిజన్-– 6 ఈఈ శ్రీకాంత్ తెలిపారు. ఎంపీ మల్లు రవి, సంబంధిత సెగ్మెంట్ల ఎమ్యెల్యేలు జోక్యం చేసుకుంటే తప్ప పాలమూరు కెనాల్కు హైవే కష్టాలు తప్పేలా లేవు.
అలైన్మెంట్ మారుస్తారా?
వట్టెం నుంచి నాగర్కర్నూల్, జడ్చర్ల సెగ్మెంట్ల మీదుగా కల్వకుర్తి సెగ్మెంట్ లోకి వచ్చే మెయిన్ కెనాల్ ఏడు సార్లు నేషనల్ హైవేను దాటాల్సి రావడంతో భారీగా ఖర్చు అవుతుందని ఇంజనీరింగ్ నిపుణులుచెబుతున్నారు. ఏడు చోట్ల హైవేలపై బ్రిడ్జిలు నిర్మించి, భూ సేకరణ చేసినా తీరా చివరికి ఇచ్చేది 43వేల ఎకరాలకు మాత్రమేనని తెలుస్తోంది. ఉదండాపూర్ రిజర్వాయర్ నుంచి కల్వకుర్తి సెగ్మెంట్ లోని తలకొండపల్లి మీదుగా నిర్మించే మరో మెయిన్ కెనాల్ద్వారా 80వేల ఎకరాల కు సాగు నీరు పారించాలనే లక్ష్యంతో సర్వే నిర్వహించినా కెనాల్ఎన్నిసార్లు హైవేలను దాటాల్సి వస్తుందనే దానిపై కచ్చితమైన సమాచారం లేదు.
