ట్యాంక్​బండ్​ చుట్టూ ఎంటర్​టైన్​మెంట్ ​జోన్లు!

• పార్టీ జోన్లతోపాటు భారీగా ఫుడ్ కోర్టులు 
• అమ్యూజ్​మెంట్​ పార్కులు, కన్వెన్షన్​ సెంటర్లు,రిక్రియేషన్ జోన్ల ఏర్పాటు  
•  ఆదాయం పెంచుకునేందుకు హెచ్ఎండీఏ ప్లాన్స్
• త్వరలో కన్సల్టెన్సీల నియామకం 
• ‘బుద్ధ పూర్ణిమ’తో అనుకున్నంత ఆదాయం రావడం లేదనే... 

హైదరాబాద్​సిటీ, వెలుగు: గ్రేటర్​వాసులకు వినోదాన్ని అందించే కేంద్రాలను పెంచేందుకు హెచ్ఎండీఏ ప్రణాళికలు రూపొందిస్తోంది. ట్యాంక్​బండ్​చుట్టూ పార్టీ జోన్లు, ఎంటర్​టైన్​మెంట్​జోన్లు, అమ్యూజ్​మెంట్​పార్కుల ఏర్పాటుతో పాటు ఇప్పుడున్న ఫుడ్​కోర్టులకు అదనంగా భారీ సంఖ్యలో ఫుడ్​కోర్టులు నెలకొల్పడానికి సిద్ధమవుతోంది.  

ప్రస్తుతం ఎన్టీఆర్, లుంబినీ, సంజీవయ్య పార్కు, లేక్​ వ్యూ పార్క్​, ఎకో పార్క్ తో పాటు నెక్లెస్​రోడ్, పీపుల్స్​ప్లాజా, హుస్సేన్​సాగర్​కు పెద్ద సంఖ్యలో సందర్శకులు తరలివస్తున్నారు. అయినా ఆశించిన స్థాయిలో ఆదాయం రావడం లేదని హెచ్ఎండీఏ భావిస్తోంది. భవిష్యత్​లో మరిన్ని కొత్త ఆకర్షణలను ఏర్పాటుచేస్తే స్థానికులతో పాటు ఇతర ప్రాంతాల నుంచి వచ్చే టూరిస్టులు తరలివచ్చే అవకాశం ఉంటుందని అనుకుంటోంది. 

అందులో భాగంగా బుద్దపూర్ణిమ ప్రాజెక్టు ఆధ్వర్యంలో నిర్వహిస్తున్న కార్యక్రమాలతో పాటు ప్రైవేట్​కన్సల్టెన్సీలను నియమించుకుని వినూత్న ఆలోచనలతో పర్యాటకులను ఆకట్టుకోవాలని భావిస్తోంది. కన్సల్టెన్సీల సూచనలు, సలహాలతో టాంక్​బండ్​ పరిసరాలను టూరిజం స్పాట్​గా డెవలప్​చేయాలనుకుంటోంది. 

రోజూ 15 వేల నుంచి 25 వేల మంది 

టాంక్​బండ్ పరిసరాల్లో ఉన్న పార్కులు, పర్యాటక ప్రాంతాలు బుద్దపూర్ణిమ ప్రాజెక్టు (బీపీపీ) సారథ్యంలో నిర్వహిస్తున్నారు.  పీపుల్స్​ప్లాజా, నెక్లెస్​రోడ్, ఈట్​స్ట్రీట్, ఎన్టీఆర్​గార్డెన్స్​, లుంబినీపార్క్, సంజీవయ్య పార్క్​లకు రోజూ15 నుంచి 25వేల మంది వరకూ సందర్శకులు వస్తున్నారు. పండగలు, సెలవు దినాల్లో ఈ సంఖ్య లక్ష వరకూ చేరుతోంది. వీటి ద్వారా ప్రస్తుతం వస్తున్న ఆదాయం ఆశించిన స్థాయిలో ఉండడం లేదని అధికారులు భావిస్తున్నారు. 

పార్కులు, ఈట్ స్ర్టీట్, ఎంటర్​టైన్​మెంట్​జోన్ల ద్వారా ఏడాదికి రూ.100 కోట్ల కూడా రావడం లేదంటున్నారు. ఎన్టీర్​గార్డెన్స్​, లుంబినీ పార్కుల ప్రవేశ రుసుం, లోపలి స్టాల్స్​నిర్వాహకుల నుంచి వస్తున్న ఆదాయం స్వల్పంగానే ఉంటోందంటున్నారు. విజిటర్స్​సంఖ్య ఎక్కువగా ఉన్నా కొందరు ఆఫీసర్ల తీరు మూలంగా ఈ పరిస్థితి వచ్చిందని గుర్తించారు. 

టికెట్ల జారీలో అక్రమాల వల్ల ఆదాయం పెరగడం లేదని, అనుభవజ్ఞులైన కన్సల్టెంట్స్​ను నియమించుకుని ఈ సమస్యను సాల్వ్ చేసుకోవాలని ఆలోచిస్తున్నారు. ప్రస్తుతం టాంక్​బండ్​చుట్టూ 902 హెక్టార్ల ల్యాండ్​అందుబాటులో ఉండగా, వారి సలహాలు, సూచనలతో పాటు కొత్త ఐడియాలతో రాబోయే రోజుల్లో పెద్దయెత్తున కార్యక్రమాలు నిర్వహించాలని ప్లాన్​చేస్తున్నారు. 

పార్కింగ్​ లాట్స్​ ఏర్పాటుకు లైసెన్సులు

హుస్సేన్​సాగర్​తీరంలో ప్రస్తుతమున్నవే కాకుండా కొత్తగా మరిన్ని రిక్రియేషన్, పార్టీ జోన్లను ఏర్పాటు చేయాలని హెచ్​ఎండీఏ నిర్ణయించింది. వీటి నిర్మాణం, నిర్వహణ బాధ్యతలను కన్సల్టెంట్స్​కు అప్పగించనున్నారు. వారి ఆధ్వర్యంలోనే పార్టీ ప్లేసెస్, అమ్యూజ్​మెంట్ పార్క్​, కన్వెన్షన్​సెంటర్లు ఏర్పాటు చేయనున్నారు. లుంబినీపార్క్,  సంజీవయ్యపార్కు, నెక్లెస్​రోడ్​, పీపుల్స్​ప్లాజా వంటి ప్రాంతాల్లో మరిన్ని పార్టీ జోన్లు, ఫుడ్​కోర్టులు ఏర్పాటు చేయనున్నారు. 

భారీ అంబేద్కర్​విగ్రహం, అమర వీరుల స్మృతి స్తూపం దగ్గర ఆదాయం పెంచుకునేందుకు ఏం చేయాలన్నదానిపై కన్సల్టెన్సీ అడ్వైజ్​తీసుకుంటారు. ఆయా ప్రాంతాల్లో పార్కింగ్​లాట్స్​ఏర్పాటుకు లైసెన్సులు ఇచ్చి భారీ ఆదాయం సమకూర్చుకోవాలన్నది ఒక ఆలోచన. ఇవే కాకుండా ప్రస్తుతమున్న అద్దెలను కూడా పున: పరిశీలించేందుకు చర్యలు తీసుకుంటామన్నారు.