హాంకాంగ్ సిక్స్‌స్ టోర్నీలో టీమిండియా హ్యాట్రిక్ ఓటములు మూటగట్టుకుంది. తొలిరోజు దాయాది పాకిస్థాన్, పసికూన యూఏఈ చేతిలో భంగపోయిన భారత జట్టు.. రెండో రోజూ అదే ఫలితాన్ని పునరావృతం చేసింది. ఇంగ్లండ్ చేతిలో 15 పరుగుల తేడాతో ఓటమిపాలైంది. ఈ మ్యాచ్‌లో భారత మాజీ బ్యాటర్ రాబిన్ ఊతప్ప ఒకే ఓవర్‌లో 37 పరుగులు సమర్పించుకున్నాడు. ఇందులో 6 సిక్సర్లు ఉండటం గమనార్హం.
6 బంతుల్లో 6 సిక్సర్లు
ఇంగ్లండ్ ఇన్నింగ్స్ నాలుగో ఓవర్‌లో ఊతప్ప ఈ చెత్త ఘనత సాధించాడు. పార్ట్ టైమ్ ఆఫ్ స్పిన్నర్‌గా అవతారమెత్తిన ఈ మాజీ భారత బ్యాటర్ కొట్టుకోండి అన్నట్లుగా బంతులేశాడు. ఇదే మంచి అవకాశం అనుకున్న ఇంగ్లీష్ మాజీ క్రికెటర్ రవి బొపారా.. ఏకంగా ఆ ఓవర్‌లో 6 బంతులను స్టాండ్స్‌లోకి పంపాడు. అంతటితో అతని విధ్వంసం ఆగలేదు. షాబాజ్ నదీమ్‌ వేసిన ఆ మరుసటి ఓవర్‌లో తాను ఎదుర్కొన్న తొలి బంతిని సిక్సర్‌గా మలిచాడు. దాంతో, కేవలం 14 బంతుల్లో అర్ధ సెంచరీని పూర్తి చేసుకున్నాడు. అనంతరం టోర్నీ నియమనిబంధనల ప్రకారం 53 (14) పరుగులు చేసి రిటైరయ్యాడు.
𝗪𝗮𝘁𝗰𝗵 𝗼𝘂𝘁! ⚠️
— Hong Kong Sixes (@HongKongSixes) November 2, 2024
The skipper of England, Ravi Bopara is raining sixes in Hong Kong!🔥#HongKong #AsiasWorldCity #Cricket #ItsRainingSixes pic.twitter.com/mDckwXkeEP
ఈ మ్యాచ్‌లో తొలుత బ్యాటింగ్ చేసిన ఇంగ్లండ్ నిర్ణీత ఆరు ఓవర్లలో వికెట్ నష్టపోయి 120 పరుగులు చేసింది. ఛేదనలో టీమిండియా నిర్ణీత ఓవర్లలో 105 పరుగులకే పరిమితమైంది. ఇప్పటికే ఆడిన మూడింట ఓటమిపాలైన భారత్‌.. టోర్నీ నుంచి అధికారికంగా నిష్క్రమించింది.
