హైదరాబాద్, వెలుగు: రాష్ట్రంలో ఎస్సీ, ఎస్టీ, బీసీ, మహిళా శిశు సంక్షేమ శాఖల పరిధిలో గల హాస్టల్ వార్డెన్, మాట్రిన్ తదితర పోస్టుల భర్తీకి ఈ నెల 24 నుంచి 29 వరకు పరీక్షలు నిర్వహించనున్నట్టు తెలంగాణ పబ్లిక్ సర్వీస్ కమిషన్ (టీజీపీఎస్ సీ) ప్రకటించింది. ఈ మేరకు ఆదివారం పరీక్షల షెడ్యూల్ రిలీజ్ చేసింది. హాల్ టికెట్లను కమిషన్ వెబ్ సైట్లో https://www.tspsc.gov.in పరీక్షా తేదీలకు మూడ్రోజుల ముందుగా పెడ్తామని వెల్లడించింది. ఈ నెల 24 నుంచి 28 వరకు ఉదయం 10 గంటల నుంచి మధ్యాహ్నం 12.30 గంటల వరకు పేపర్–1 జనరల్ స్టడీస్ ఎగ్జామ్, మధ్యాహ్నం 2.30 గంటల నుంచి సాయంత్రం 5 గంటల వరకు పేపర్--–2 ఎడ్యుకేషన్ పరీక్ష ఉంటుందని ప్రకటించింది.
ఈ నెల 29న ఉదయం 10 గంటల నుంచి మధ్యాహ్నం12.30 గంటల వరకు పేపర్–1జనరల్ స్టడీస్ ఎగ్జామ్ ఉంటుందని తెలిపింది. అదే రోజు మధ్యాహ్నం 2.30 గంటల నుంచి సాయంత్రం 5 గంటల వరకు పేపర్–2 ఎడ్యుకేషన్, పేపర్–2 డిప్లొమా ఇన్ స్పెషల్ ఎడ్యుకేషన్ లెవెల్ (విజువల్ ఇంపెయిర్ మెంట్, హియరింగ్ ఇంపెయిర్ మెంట్) పరీక్షలు ఉంటాయని పేర్కొన్నది. హాల్ టికెట్ పై ఎగ్జామ్స్ కు సంబంధించిన అన్ని సూచనలు ఉన్నాయని, పరిశీలించాలని కోరింది. హాల్ టికెట్ పై తాజా ఫొటో అతికించాలని, ఇన్విజిలేటర్ సమక్షంలోనే హాల్ టికెట్ పై సంతకం పెట్టాలని సూచించింది. పరీక్షా కేంద్రానికి ఏదైనా ఒక ఫొటో గుర్తింపు కార్డును తీసుకురావాలని స్పష్టం చేసింది.రాష్ట్రవ్యాప్తంగా 581 పోస్టుల భర్తీకి 2022 డిసెంబర్ లో టీఎస్ పీఎస్సీ నోటిఫికేషన్ రిలీజ్ చేసింది.
