వనపర్తి, వెలుగు: చలికాలం మొదలవుతుందంటే కేజీబీవీ స్టూడెంట్లలో ఆందోళన ప్రారంభమైంది. పొద్దున్నే స్నానం చేయడానికి గరంనీళ్లు దొరకకపోవడంతో, చన్నీళ్లతో కానియ్యాల్సిన పరిస్థితి నెలకొంది. కేజీబీవీ స్టూడెంట్లకు వేడి నీటిని అందించేందుకు సోలార్ ప్లాంట్లను అమర్చారు. అయితే ప్రస్తుతం ఈ ప్లాంట్లు నిరుపయోగంగా మారాయి. ఎక్కడా సోలార్ ప్లాంట్లు పనిచేయడంలేదు. దీంతో చన్నీళ్లతో స్నానం చేసేందుకు స్టూడెంట్లు తిప్పలు పడుతున్నారు.
నాలుగేళ్లుగా అందట్లే..
వనపర్తి జిల్లాలో 15 కేజీబీవీలు ఉండగా, నాలుగేండ్ల కింద 10 స్కూళ్లలో సోలార్ హీటర్లను ఏర్పాటు చేశారు. ఒక్కో సోలార్ హీటర్ ప్లాంట్కు రూ.2 కోట్లు ఖర్చు కాగా, మొత్తం రూ.20 కోట్లు వెచ్చించారు. ఈ కేజీబీవీల్లో 2,600 మంది స్టూడెంట్లు చదువుకుంటున్నారు. వీరంతా ప్రస్తుతం ఉదయం పూట వేడి నీటికి దూరమవుతున్నారు.
విద్యుత్ సమస్యే కారణమా?
కేజీబీవీల్లో సోలార్ హీటర్లు ఏర్పాటు చేసినప్పటికీ ఎండ పూర్తిగా తగలనప్పుడు అవి పని చేసేందుకు కరెంట్ మీటర్లు ఏర్పాటు చేశారు. కానీ, త్రీ ఫేస్ కరెంట్ లేకపోవడంతో హీటర్లు పని చేయడం లేదు. ఎండ లేనప్పుడు సోలార్ హీటర్లు కరెంట్తో పని చేసేలా చూడడంలో అధికారులు నిర్లక్ష్యంగా వ్యవహరించడంతోనే ఈ పరిస్థితి ఉందని అంటున్నారు. ప్రస్తుతం కేజీబీవీల్లో వాటర్ హీటర్ కోసం ఎంసీపీ స్విచ్ వేస్తే మీటరు వద్ద మంటలు ఎగిసి పడుతుండడంతో భయపడుతున్నారు.
ఎండ లేనప్పుడు కరెంట్తో పని చేసేందుకు ప్రతి కేజీబీవీలో ఒక త్రీ ఫేస్ ట్రాన్స్ఫార్మర్ ఏర్పాటు చేయాల్సిన అవసరం ఉందని విద్యా శాఖ అధికారులు చెబుతున్నారు. ఇప్పటికైనా ఉన్నతాధికారులు స్పందించి కేజీబీవీల్లో సోలార్ హీటర్లు పని చేసేలా చూడాలని విద్యార్థినుల పేరెంట్స్ కోరుతున్నారు.
