- కూకట్ పల్లిలో గజం రూ.లక్షా 85 వేలు
- గత వేలం కంటే ఎక్కువ ధరకు ప్లాట్ల కొనుగోళ్లు
- హౌసింగ్ బోర్డ్ ప్లాట్లకు రికార్డు ధర
హైదరాబాద్, వెలుగు: వేలంలో గచ్చిబౌలి, కూకట్ పల్లిలోని హౌసింగ్ బోర్డు ప్లాట్లు రికార్డు స్థాయి ధర పలికాయి. గచ్చిబౌలిలో గజం రూ.లక్షా90వేలు, కూకట్పల్లిలో గజం రూ.లక్షా 85 వేలు పెట్టి కొన్నారు. గురువారం కేపీహెచ్ బీ కమ్యూనిటీ హాల్ లో తెలంగాణ హౌసింగ్ బోర్డ్ నార్త్ డివిజన్ అధికారులు మొత్తం 7 ప్లాట్లకు వేలం నిర్వహించారు. ఇందులో 3 ప్లాట్లు అమ్ముడుపోయాయి. గచ్చిబౌలిలో 81.45 గజాలకు వేలం నిర్వహించగా గజం రూ.లక్షా 90 వేలు పలికింది. ఈ ప్లాట్ కు అధికారులు బేస్ ప్రైస్ను రూ.లక్షా 50 వేలుగా నిర్ణయించారు.
ఇక బాలాజీ నగర్(కూకట్ పల్లి) లో 87.98 గజాలకు వేలం నిర్వహించగా గజం రూ.లక్షా 85 వేలు పలికింది. బాలాజీ నగర్ లోనే 92.36 గజాల మరో ప్లాట్ కు వేలం నిర్వహించగా గజం రూ.లక్షా 75 వేలు పలికింది. బాలాజీ నగర్ ప్లాట్స్ కు గజం రూ.లక్షా 25 వేలుగా అధికారులు ఖరారు చేశారు. ఈ మూడు ప్లాట్ల వేలంతో హౌసింగ్ బోర్డుకు రూ.4కోట్ల83లక్షల93వేల948 ఆదాయం వచ్చిందని హౌసింగ్ బోర్డు ఓ ప్రకటనలో తెలిపింది. కూకట్ పల్లిలో ఒక ప్లాట్, భరత్ నగర్ లో 2 ప్లాట్లు, గచ్చిబౌలిలో ఒక ప్లాట్ కు త్వరలో వేలం నిర్వహిస్తామనివెల్లడించింది.
