- హౌసింగ్ మేనేజింగ్ డైరెక్టర్ వీపీ గౌతమ్
సంగారెడ్డి టౌన్, వెలుగు: ఇందిరమ్మ ఇళ్ల సర్వే పారదర్శకంగా చేపట్టాలని రాష్ట్ర హౌసింగ్ మేనేజింగ్ డైరెక్టర్ వీపీ గౌతమ్, కలెక్టర్ క్రాంతి అధికారులను ఆదేశించారు. శుక్రవారం సంగారెడ్డిలోని దోబీగల్లి, శివాజీ నగర్ కాలనీలలో పర్యటించి సర్వే తీరును పరిశీలించారు. ఈ సందర్భంగా వారు మాట్లాడుతూ.. నిజమైన లబ్ధిదారులను గుర్తించడమే ఈ సర్వే ఉద్దేశం అన్నారు. దరఖాస్తుదారుల నివాస ప్రాంతాలను సందర్శించి వారి ఆర్థిక పరిస్థితి నేరుగా అడిగి తెలుసుకున్నారు.
సర్వేయర్లు ప్రభుత్వ నియమాలను పాటించి ఎలాంటి పొరపాట్లకు తావు లేకుండా ఆన్లైన్లో వివరాలు నమోదు చేయాలని సూచించారు. ఏమైనా సందేహాలు ఉంటే మున్సిపాలిటీ పరిధిలో వార్డు అధికారిని, గ్రామాల్లో జీపీ సెక్రటరీని సంప్రదించవచ్చన్నారు. సర్వే ప్రక్రియలో అడిషనల్కలెక్టర్ చంద్రశేఖర్, ట్రైనీ కలెక్టర్ మనోజ్, గృహ నిర్మాణ సంస్థ జిల్లా మేనేజర్ పుష్పలత, తహసీల్దార్ దేవదాస్, గృహ నిర్మాణ సంస్థ డీఈలు పాల్గొన్నారు.
గ్రూప్2 పరీక్షలు పకడ్బందీగా నిర్వహించాలి
ఈ నెల 15,16న జరిగే గ్రూప్2 పరీక్షలు పకడ్బందీగా నిర్వహించాలని కలెక్టర్ క్రాంతి అధికారులను ఆదేశించారు. జిల్లా వ్యాప్తంగా 15,218 అభ్యర్థులు టీజీపీఎస్సీ గ్రూప్ 2 పరీక్షలు రాస్తున్నారని ఇందుకోసం 41 పరీక్ష కేంద్రాలను ఏర్పాటు చేసినట్లు తెలిపారు. పరీక్షల నిర్వహణ సజావుగా జరగాలని సూచించారు. పరీక్ష నిర్వహణలో పోలీస్ రెవెన్యూ, విద్యుత్ శాఖలు సమన్వయంతో పనిచేసి సహకరించాలన్నారు.
డబుల్ బెడ్రూం ఇళ్లకు అన్ని వసతులు కల్పిస్తాం
రామచంద్రాపురం: ప్రభుత్వం పేదల కోసం నిర్మించిన డబుల్ బెడ్రూం ఇళ్లకు అన్ని రకాల వసతులు కల్పిస్తామని తెలంగాణ రాష్ట్ర హౌసింగ్ ఎండీ వీపీ గౌతమ్ అన్నారు. సంగారెడ్డి జిల్లా తెల్లాపూర్ మున్సిపాలిటీ పరిధిలోని కొల్లూర్లో డబుల్ బెడ్రూం సముదాయాలను ఆయన పరిశీలించారు. అక్కడ ఇళ్లల్లో నివసిస్తున్న లబ్ధిదారులతో మాట్లాడారు. తాగునీరు, ఇతర సమస్యలను అక్కడి యజమానులు అధికారుల దృష్టికి తీసుకొచ్చారు.
ఈ సందర్భంగా గౌతమ్ మాట్లాడుతూ లబ్ధిదారులు ఏ సమస్యలున్నా స్థానిక మున్సిపల్ అధికారుల దృష్టికి తీసుకెళ్లాలని సూచించారు. త్వరలోనే మరి కొంతమంది లబ్ధిదారులకు ఇళ్ల అలాట్మెంట్ జరుగుతుందన్నారు. కార్యక్రమంలో మున్సిపల్ కమిషనర్ సంగారెడ్డి, డీఈఈ సత్యనారాయణ, ఆర్ వో వెంకటరామయ్య, మేనేజర్అఖిల్, నవోద్రెడ్డి, అశోక్, పవన్, హౌసింగ్ బోర్డు అధికారులు పాల్గొన్నారు.
