జెరూసలెం: ఇజ్రాయెల్పై హౌతీ మిలిటెంట్లు మరోసారి దాడికి పాల్పడ్డారు. యెమెన్ భూభాగం నుంచి క్షిపణిని ప్రయోగించగా.. సెంట్రల్ ఇజ్రాయెల్లోని ఓ ప్రదేశంలోకి అది ఉత్తరం వైపునుంచి దూసుకొచ్చింది. దీంతో యుద్ధం మొదలైన ఏడాదిలో తొలిసారి ఇజ్రాయెల్లోని ఇంటర్నేషనల్ ఎయిర్పోర్ట్లో ఎయిర్రైడ్ సిగ్నల్స్ మార్మోగాయి. ప్రజలు సురక్షిత ప్రాంతాల్లో తలదాచుకునేందుకు పరుగులు పెట్టారు. కాగా, కొద్దిసేపటికే విమాన సేవలను పునరుద్ధరించినట్టు ఎయిర్పోర్ట్ అధికారులు తెలిపారు.
క్షిపణి దాడితో సెంట్రల్ ఇజ్రాయెల్లోని గ్రామీణ ప్రాంతంలో మంటలు చెలరేగాయి. ఇంటర్ సెప్టార్ల నుంచి భారీ శబ్దాలు వచ్చాయని ఇజ్రాయెల్ మిలిటరీ తెలిపింది. క్షిపణిని సమర్థవంతంగా ఎదుర్కొన్నామని, ఈ దాడిలో ఎలాంటి నష్టం జరగలేదని పేర్కొంది. దీనికి సైనికపరంగా బదులిస్తామని ఇజ్రాయెల్ హెచ్చరించింది. ఆదివారం జరిగిన కేబినెట్ మీటింగ్లో ఇజ్రాయెల్ ప్రధాని బెంజమిన్ నెతన్యాహు ఇదే విషయాన్ని ప్రస్తావించారు. ఇజ్రాయెల్కు హాని కలిగిస్తే ఏంజరుగుతుందో ఇప్పటికే హౌతీలకు అర్థమై ఉండాలని అన్నారు. ఒకవేళ ఏంజరుగుతుందో తెలుసుకోవాలంటే యెమెన్లోని హౌదైరాపోర్ట్ను సందర్శించాలన్నారు. కాగా, టెల్అవీవ్లో భాగమైన జాఫాలో సైనిక లక్ష్యంగా బాలిస్టిక్ క్షిపణి ప్రయోగించినట్టు హౌతీ మిలిటెంట్ ప్రతినిధి జనరల్ యాహ్యా సారీ ప్రకటించారు.
