ప్యారిస్లో మ్యూజియంలకు కొదవ ఉండదు. అక్కడి వీధుల్లో నడుస్తుంటే... ఎక్కడ చూసినా ఏదో ఒక మ్యూజియం కనిపిస్తుంది. అయితే అన్ని మ్యూజియంల్లోకి ఈ మ్యూజియం మాత్రం స్పెషల్ అని చెప్పాలి. ఆ స్పెషాలిటే ఏంటంటే చీజ్ కోసం పెట్టిన మ్యూజియం ఇది.
ఫ్రెంచ్ రాజధాని ప్యారిస్లో ఈ నెల జూన్ 13న ప్రారంభించిన చీజ్ మ్యూజియం ఏర్పాటు ఏదో అల్లాటప్పాగా జరిగింది కాదు. దీని వెనక పదేండ్లకి పైగా కష్టం ఉంది. ఇలా ఒక మ్యూజియంను ఏర్పాటుచేయాలనే ఆలోచన ‘పెరోల్స్ డెఫ్ఫిన్వా’ అనే కంపెనీకి వచ్చింది. 2013లో మొదలైన ఈ కంపెనీ ఫౌండర్ పియర్ర బ్రిస్సన్. చీజ్ మ్యూజియం ప్రాజెక్ట్ డెవలప్మెంట్కు పదిహేనేండ్లు శ్రమపడ్డాడు.
ఈయన పుట్టింది బ్యుజోలాయిస్లో. వీళ్ల కుటుంబం వైన్ తయారీ కోసం ద్రాక్ష తోటలు పెంచేది. పియర్ర మాత్రం చీజ్ మేకింగ్లో ట్రైనింగ్ అయ్యాడు. సంప్రదాయ చీజ్ తయారీని రాబోయే తరాలకు అందించాలనే తపనతో తనలాగే ఆలోచించే ఓ పదిమందితో కలిసి ఇలా ఒక మ్యూజియం ఏర్పాటుచేశాడు.
స్కూల్తో మొదలుపెట్టి
చీజ్మేకర్ పియర్రె బ్రిస్సన్ పదిహేనేండ్ల క్రితం ప్యారిస్కు వచ్చి ముసీ డు ఫ్రొమెజె అనే చీజ్మేకింగ్ స్కూల్ మొదలుపెట్టాడు. ఈ స్కూల్లో సంప్రదాయ చీజ్మేకింగ్ పద్ధతులు నేర్పిస్తున్నాడు. ఇప్పుడు ఈ నెల జూన్ 13న చీజ్ మ్యూజియం ఏర్పాటుచేసి 14 వ తేదీ నుంచి విజిటర్ల కోసం తలుపులు తెరిచాడు. ఈ మ్యూజియంకు వచ్చే విజిటర్స్ చీజ్ గురించి బోలెడన్ని ఆసక్తికర విషయాలతో పాటు అక్కడి అగ్రికల్చర్ హిస్టరీ గురించి తెలుసుకోవచ్చు. వర్క్షాప్స్ ఉంటాయి. వాటిలో పార్టిసిపేట్ తయారుచేసిన చీజ్ శాంపిల్ తీసుకోవచ్చు. మ్యూజియం సెంట్రల్ ఎగ్జిబిషన్లో చీజ్ మేకింగ్ డెమో కూడా ఉంది.
తెలుసుకుంటూ...చరిత్రలోకి
ఈ మ్యూజియంలోకి అడుగుపెట్టగానే కళ్ల నిండుగా రకరకాల చీజ్లు కనిపిస్తాయి. ఫ్రాన్స్ మొత్తంగా దొరికే చీజ్ వెరైటీలు చూడొచ్చు. ఈ మ్యూజియం నడవాలో ఆవు, మేక, ఆడ గొర్రె వెల్కం చెప్తాయి. ఒక రకంగా ఇది ఇంటరాక్టివ్ ఎగ్జిబిషన్ గ్యాలరీ అని చెప్పొచ్చు. చీజ్ వెరైటీలను తెలుసుకోవడమే కాకుండా వాటికి సంబంధించిన నాలెడ్జిని కూడా పొందొచ్చు. మ్యూజియం ఏర్పాటు వెనక రెండు ఉద్దేశాలు ఉన్నాయి.
మ్యూజియంకు వచ్చే విజిటర్స్కు ఫ్రెంచ్ వాతావరణం గురించి తెలియచెప్పడంతో పాటు చీజ్ ఇండస్ట్రీలో కెరీర్ ఏర్పరచుకోవడం కోసం యువతకు ఉన్న మార్గాలను చెప్పడం. అలాగే చీజ్ ఎవరు తయారుచేశారు? ఏ రకం పాలు వాడారు? వంటి ఎన్నో వివరాలు ఉంటాయి. ఇలా తెలియజెప్పే వివరాలను పీడీఓ(ప్రొటెక్టెడ్ డిజిగ్నేషన్ ఆఫ్ ఆరిజిన్ ) అంటారు. ఇక్కడ ఉన్న కియోస్క్ దగ్గర ఇలాంటి వివరాలు ఇంకా ఎన్నో తెలుస్తాయి .
ఎడ్యుకేషన్ టూర్
చీజ్ కల్చర్ దగ్గర నుంచి మాన్యుఫాక్చరింగ్ సీక్రెట్స్తో పాటు రుచి గురించి కూడా తెలుసుకోవచ్చు. యువత, పెద్ద వాళ్లకు సరదా, ఇంటరాక్టివ్గా చీజ్ గురించి తెలియచెప్తున్నారు. ఒక్కమాటలో చెప్పాలంటే ఈ మ్యూజియంలోకి అడుగుపెడితే చీజ్కి సంబంధించి ఎడ్యుకేషనల్ టూర్ అయినట్టే. చీజ్ గురించి అంతా ఇంతా అని గొప్పలు చెప్పడమే కాకుండా... చీజ్ పరిశ్రమ ఎదుర్కొంటున్న ఛాలెంజెస్ గురించి కూడా చెప్తారు. యువత చీజ్ మేకింగ్ ప్రొఫెషన్లోకి రావాలి. అందుకే ఈ ఇంటరాక్టివ్, ఎడ్యుకేషనల్ స్పేస్ ఎగ్జిబిషన్లో ఇచ్చాం.
అలాగే సిటీల్లో ఉండే వాళ్లకు, చీజ్ ఉత్పత్తి చేసే ప్రాంతాలకు మధ్య ఈ మ్యూజియం ఒక లింక్ కానుంది. వీళ్ల ఏకైక లక్ష్యం మాత్రం కొత్త తరం యువత చీజ్ మేకర్స్ కావాలి. చీజ్ మేకింగ్ పరిశ్రమలు ఏర్పాటుచేయాలి. చీజ్ మేకర్ కావాలని ఉన్నా లేదా ప్రశాంతంగా రిలాక్స్ అయ్యి చీజీగా చిల్ అవుదామనుకున్నా ‘మ్యుజె డు ఫొమజ్’కి వెళ్లి పోవడమే.
సే చీజ్...జ్....
‘‘ప్యారిస్లో వైన్ గురించి ప్రమోట్ చేసేందుకు ఇప్పటికే చాలా వరకు ప్రోగ్రామ్స్, ఎగ్జిబిషన్స్ ఆర్గనైజ్ చేశారు. ఫ్రాన్స్లో వైన్ కల్చర్ బాగా డెవలప్ అయ్యింది. అలాగే చీజ్ అనేది కూడా ఇక్కడ చెప్పుకోదగింది. కానీ ఫ్రాన్స్ కల్చర్తో కలిసిపోయిన చీజ్ గురించి లోతుగా తెలుసుకునేందుకు ప్రత్యేకించి ఎటువంటి ప్లేస్లు లేవు. మరో విషయం ఏంటంటే కాస్ట్ ఆఫ్ లివింగ్(జీవన వ్యయం) అనేది చాలా బర్డెన్ అయిపోయింది నేటి యువతకు. అదొక్కటే కాదు ఇప్పుడున్న ఆధునిక వర్కింగ్ రొటీన్ పట్ల విసుగెత్తి ఉన్నారు. అలాంటి వాళ్లు తిరిగి పల్లెలకు వచ్చేందుకు ఎంకరేజ్ చేయాలనే ఉద్దేశం నాది.
నిజానికి సంప్రదాయ పద్ధతిలో చేసిన చీజ్కు డిమాండ్ చాలా ఎక్కువగా ఉంది. ఫ్రాన్స్లో 246 వెరైటీల చీజ్ రకాలు తయారుచేస్తారు. కానీ అందుకు పనిచేసే వాళ్ల సంఖ్య బాగా తక్కువ. మోడర్న్ లైఫ్ స్టయిల్కు అలవాటు పడిన యువత తిరిగి పల్లెలకు వచ్చి అడ్జస్ట్ కావడం కష్టంగా అనిపించొచ్చు. కానీ ఒకసారి వచ్చారంటే మాత్రం అది వాళ్లకు చాలా సంతోషకరమైన జీవితానికి కేరాఫ్ అడ్రెస్ అవుతుంది. అందుకు నేను గ్యారెంటీ. ఎందుకంటే మంచి చీజ్ తయారుచేయగలిగిన వ్యక్తి జీవితంలో చాలా బాగా సంపాదించుకోవచ్చు.
మేం ట్రెడిషనల్ రైతులతో కలిసి పనిచేస్తున్నాం. ఎక్కడినుంచో ఇక్కడి వరకు ట్రావెల్ చేసి వచ్చిన వాళ్లు ఈ చీజ్ టేస్ట్ చేసినప్పుడు పల్లెల మూలాల్ని తాకిన అనుభూతి చెందుతారు. అందుకోసం ప్యారిస్ నగరం నడి మధ్యలో ఒక చిన్న విండో ఈ మ్యూజియం ద్వారా తెరిచాం. చీజ్ మ్యూజియంలోకి అడుగుపెట్టిన ప్రతి ఒక్కరు ఫ్రాన్స్ గ్రామీణ ప్రాంతాల సంస్కృతి కనిపిస్తుంది.
చీజ్ మ్యాటర్స్!
చీజ్ ఎప్పుడు? ఎలా పుట్టింది అనేది కరెక్ట్గా తెలియదు. కానీ చీజ్ తయారైంది మాత్రం అనుకోకుండా జరిగిందనే చెప్పాలి. దానికి సంబంధించి ఒక కథ కూడా చెప్తుంటారు. చీజ్ పుట్టుక అనేది మిడిల్ ఈస్ట్ (మధ్య ప్రాచ్యం)లో జరిగింది. అరబ్ వ్యాపారి ఒకరు ఎడారి గుండా జర్నీ చేసేందుకు గొర్రె పొట్టతో తయారుచేసిన ఒక సంచిలో పాలు నింపుకుని బయల్దేరాడు.
గొర్రె కడుపు లైనింగ్ నుండి సహజమైన రెన్నెట్(నెమరువేసే క్షీరదాల పొట్టలో విడుదలయ్యే కొన్ని రకాల ఎంజైమ్స్), సూర్యుడి వేడి కలిసి ఆ పాలు జున్ను, నీళ్లుగా విడిపోయాయి. అతను గమ్యస్థానానికి చేరుకునేలోపు జున్ను తిన్నాడు. అది చాలా రుచిగా అనిపించింది. జున్ను ఆకలి తీరిస్తే, అందులోని నీళ్లు అతని దాహాన్ని తీర్చాయట! ఏదెలా ఉన్నప్పటికీ చీజ్ మేకింగ్ అనేది కనీసం ఏడు వేల సంవత్సరాల క్రితం నాటిదని పోలండ్, హంగేరీ, స్విట్జర్లాండ్ల వాసులు చెప్తారు. రకరకాల వంటల్లో వాడే చీజ్ లేదా జున్నుకి కొన్ని దేశాల్లో మ్యూజియంలు ఉన్నాయి. అలాంటి మ్యూజియం ఒకటి ఈ మధ్యనే ఫ్రాన్స్లో మొదలుపెట్టారు. అందులో అడుగుపెడితే చీజ్ గురించి లోతైన విషయాలు తెలుస్తాయని దాని నిర్వాహకులు చెప్తున్నారు.
ఇదిలా ఉంటే ఏకంగా మ్యూజియాలు ఏర్పాటుచేసేంత ఇష్టం ఉన్న చీజ్ను ఏ దేశాల వాళ్లు ఎక్కువగా తింటారు అనే ప్రశ్న తలెత్తిందా! ఇలాంటి ప్రశ్నలకు సమాధానం చెప్పేందుకే కాబోలు ‘ఇంటర్నేషనల్ డెయిరీ ఫెడరేషన్’ వాళ్లు చీజ్ ఎక్కువగా తినే దేశాల జాబితాను 2023 సంవత్సరానికి గాను విడుదల చేసింది. ఏడాదికి ఎంత చీజ్ వాడుతున్నాయనే దాన్ని బట్టి వరసగా ఆయా దేశాల పేర్లను విడుదల చేశారు. అవే ఇవి...
ఫ్రాన్స్ – 57.9 పౌండ్లు
జర్మనీ – 53.2 పౌండ్లు
గ్జెంబర్గ్ – 53.2 పౌండ్లు
ఐస్ల్యాండ్ – 53.2 పౌండ్లు
గ్రీస్ – 51.5 పౌండ్లు
ఫిన్లాండ్ – 49.5 పౌండ్లు
ఇటలీ – 48 పౌండ్లు
స్విట్జర్లాండ్ – 48 పౌండ్లు
ఎస్టోనియా – 45.8 పౌండ్లు
నెదర్లాండ్స్ – 42.7 పౌండ్లు
అమెరికా కూడా చీజ్ను ప్రపంచం మొత్తంగా చూసుకున్నప్పుడు ఎక్కువగానే ఉత్పత్తి చేస్తుంది. కాకపోతే ఏడాదికి ఆ దేశంలో చీజ్ వాడకం అనేది 34.1 పౌండ్లు మాత్రమే ఉండడం వల్ల అది టాప్ పది దేశాల జాబితాలోకి చేరలేదు. ఆస్ట్రియా, స్వీడన్, సైప్రస్, నార్వే, ఇజ్రాయెల్ దేశాలతో పోల్చితే వాటికంటే అమెరికాలో వాడకం తక్కువ.
గ్రేట్ బ్రిటన్లో చెద్దార్ చీజ్ పూర్వకాలం నుంచి తయారుచేస్తున్నారు. ఒక ఏడాదిలో ఇక్కడ చాలా వెరైటీలు ఉత్పత్తి చేస్తారు కూడా. కానీ వాడకం మాత్రం ఏడాదికి 25.7 పౌండ్లు మాత్రమే. కాకపోతే యునైటెడ్ స్టేట్స్లో ఈ పరిస్థితిలో కొంత మార్పు వచ్చింది. యూరోపియన్ దేశాల కంటే ఎక్కువ ఉత్పత్తి చేస్తోంది. విస్కన్సిన్ మిల్క్ మార్కెటింగ్ బోర్డ్ లెక్కల ప్రకారం చీజ్ ఉత్పత్తిలో 11.1 బిలియన్ పౌండ్లతో లీడ్లో ఉంది యుఎస్ .
ఆ తరువాత జర్మనీ 4.81 పౌండ్లు, ఫ్రాన్స్ 4.27 బిలియన్లు, ఇటలీ 2.55 బిలియన్లు ఉత్పత్తి చేస్తున్నాయి. అయితే యుఎస్లో చీజ్ ఉత్పత్తిలో ముందున్న స్టేట్ విస్కన్సిన్. అందుకే యుఎస్ టాప్ 10 దేశాల జాబితాలోకి రాలేదు. అదే విస్కన్సిన్ కానీ ఒక దేశం అయ్యి ఉంటే అది పైన చెప్పుకున్న జాబితాలో నాలుగో స్థానంలో ఉండేది. అక్కడ ఒక్క దగ్గరే చీజ్ ప్రొడక్షన్ 2.86 బిలియన్ పౌండ్స్ ఉంది.
