ఐపీఎల్ 2025లో రాజస్థాన్ రాయల్స్, చెన్నై సూపర్ కింగ్స్ జట్లు దాదాపు టోర్నీ నుంచి నిష్క్రమించాయి. 99 శాతం వీరు ప్లే ఆఫ్స్ కు అర్హత సాధించడం అసాధ్యం. అయితే ఏదో చిన్న మూల వీరి ఆశలు చిగురించే ఉన్నాయి. ఇప్పటివరకు ఈ టోర్నీలో చెన్నై, రాజస్థాన్ జట్లు రెండు కూడా ఆడిన 9 మ్యాచ్ ల్లో రెండే విజయాలు సాధించాయి. మిగిలిన 5 మ్యాచ్ లు గెలిచినా వీరి ఖాతాలో 14 పాయింట్లు ఉంటాయి. ఐపీఎల్ లో ఒక జట్టు ప్లే ఆఫ్స్ కు అర్హత సాధించాలంటే కనీసం 16 పాయింట్లు ఉండాలి. అంటే 14 మ్యాచ్ ల్లో 8 మ్యాచ్ లు గెలిస్తే దర్జాగా ప్లే ఆఫ్స్ కు వెళ్తాయి.
చాలా కొన్ని సందర్భాల్లో 8 మ్యాచ్ లు గెలిచినా టోర్నీ నుంచి నిష్క్రమించే అవకాశాలు ఉన్నాయి. మరో సందర్భంలో 7 మ్యాచ్ లు గెలిచినా ఇతర మ్యాచ్ ల ఫలితాల ఆధారంగా ప్లే ఆఫ్స్ కు చేరొచ్చు. గత సీజన్ లో రాయల్స్ ఛాలెంజర్స్ బెంగళూరు ఆడిన 14 మ్యాచ్ ల్లో 7 గెలిచి ప్లే ఆఫ్స్ కు అర్హత సాధించింది. ఇతర మ్యాచ్ ల ఫలితాలు ఆర్సీబీ కలిసి రావడం విశేషం. ఈ సారి కూడా చెన్నై, రాజస్థాన్ జట్లు టాప్ 4 లో ఉండడానికి ఒక చిన్న అవకాశం ఉంది. అయితే ఇలా జరగాలంటే అద్భుతం జరగాలి.
చెన్నై, రాజస్థాన్ తాము ఆడబోయే చివరి 5 మ్యాచ్ ల్లో భారీ తేడాతో గెలవాలి. అదే సమయంలో ప్రస్తుతం పాయింట్స్ టేబుల్ లో టాప్-3లో ఉన్న గుజరాత్ టైటాన్స్(12), రాయల్ ఛాలెంజర్స్ బెంగళూరు(12), ఢిల్లీ క్యాపిటల్స్(12) జట్లు మిగిలిన మ్యాచ్ ల్లో విజయం సాధించాలి. మరోవైపు ముంబై ఇండియన్స్(10), లక్నో సూపర్ జయింట్స్ (10), పంజాబ్ కింగ్స్(10) 7 మ్యాచ్ ల కంటే ఎక్కువ గెలవకూడదు. ఇలా జరిగితే చెన్నై, రాజస్థాన్ జట్లు నాలుగో స్థానం కోసం ప్లే ఆఫ్స్ రేస్ లో ఉండొచ్చు. చెన్నై, రాజస్థాన్ రెండు జట్లు ప్లే ఆఫ్స్ కు అర్హత సాధించడం కుదరదు. మే 12 న ఇరు జట్ల మధ్య మ్యాచ్ జరగనుంది.
