‘‘కోళ్లకు అదేదో రోగం వస్తుందట.. చికెన్ తింటే అది మనకు కూడా వస్తదట! అస్సలు తినొద్దు’’...ఇలాంటి చర్చలు ప్రతి ఊరిలో జరుగుతూనే ఉన్నాయి. దాంతో చికెన్ ధరలు ఒక్కసారిగా తగ్గిపోయాయి.డాక్టర్లు మాత్రం బర్డ్ ఫ్లూ పట్ల అప్రమత్తత అవసరమే. కానీ.. అది పెద్ద మహమ్మారి ఏం కాదు. కాబట్టి ఆందోళన చెందాల్సిన అవసరం లేదంటున్నారు. అసలు బర్డ్‌‌ఫ్లూ ఎలా వస్తుంది? వస్తే ఎవరికి ప్రమాదం? ఏం చేయాలి?.. ఇలాంటి విషయాలతో ఈ వారం స్పెషల్స్టోరీ..
కరోనా వచ్చిన తర్వాత ప్యాండెమిక్ అనే పదం చాలా కామన్ అయిపోయింది. అయితే.. ఇప్పుడు కూడా ప్యాండెమిక్ పరిస్థితులు తలెత్తే ప్రమాదం ఉందని కొందరు బెంబేలెత్తిపోతున్నారు. మనుషుల్లో అదుపు చేయలేని విధంగా వ్యాధి వ్యాపిస్తేనే ప్యాండెమిక్ అంటాం. కానీ.. ఇప్పుడు ఎక్కడా అలాంటి పరిస్థితి లేదు. ఇది పాంజూటిక్. అంటే జంతువులను మాత్రమే ఎక్కువగా ప్రభావితం చేసే మహమ్మారి అని అర్థం. ప్రస్తుతం బర్డ్ ఫ్లూ ఆస్ట్రేలియా తప్ప అన్ని ఖండాల్లో వ్యాపించింది. ఇది మన దగ్గర ప్రధానంగా కోళ్ల మీద ఎఫెక్ట్‌ చూపిస్తోంది. ఈ వ్యాధి సోకిన కోళ్లు నడవడానికి కూడా ఇబ్బందిపడుతూ తూలుతుంటాయి. అయినా.. బర్డ్ ఫ్లూ ప్రపంచానికి కొత్తదేమీ కాదు. చాలారోజుల నుంచి ఉన్నదే. పైగా.. ఇప్పుడు ఉన్న వేరియంట్ అగ్రెసివ్గా లేదు. కాబట్టి చాలా నెమ్మదిగా స్ర్పెడ్ అవుతోంది. భవిషత్తులో వేరియెంట్ వేగంగా వ్యాపించేలా మారితే మాత్రం ప్రమాదమే అంటున్నారు ఎక్స్పర్ట్స్.
ఒకరి నుంచి మరొకరికి
జంతువులకు హాని చేసే వైరస్‌‌లు చాలా ఉన్నాయి. వాటిలో చాలావరకు మనుషులకు ముప్పు కలిగించవు. పైగా ఒకరి నుంచి మరొకరికి వ్యాప్తి చెందే లక్షణాలు చాలా తక్కువ. ఇప్పుడు కోళ్లలో కనిపిస్తున్న బర్డ్ ఫ్లూ వేరియెంట్ కూడా జంతువుల నుంచి జంతువులకు, మనుషులకు ఈజీగా సోకుతుంది. కానీ.. ఒకరి నుంచి మరొకరికి సోకే అవకాశం చాలా తక్కువ. ఒకరు దగ్గినప్పుడు వచ్చే తుంపర్లు మరొకరి ముక్కు, నోరు ద్వారా లోపలికి వెళ్తే ఇది వ్యాపిస్తుంది. అంతేకానీ.. గాలిలో కలిసి వ్యాపించే లక్షణం దీనికి లేదు.
బర్డ్ ఫ్లూ అంటే ఏంటి?
బర్డ్ ఫ్లూ.. ఏవియన్ ఇన్ఫ్లుయెంజా వైరస్ (H5N1) వల్ల పక్షుల్లో వ్యాపిస్తుంది. ఇది ముందుగా బాతుల్లాంటి నీటి పక్షుల్లో పుట్టినట్టు నిపుణులు చెప్తున్నారు. అది మనుషులతో సహా ఏ జంతువుకైనా వ్యాపిస్తుంది. పక్షుల రెక్కలు, రెట్టలు, శరీర ద్రవాల ద్వారా ఇతర పక్షులకు వ్యాపిస్తుంది. పెంపుడు జంతువుల విషయానికి వస్తే.. ఈ వ్యాధి సోకితే.. బతకడం చాలా కష్టం.
మనుషులకు ప్రమాదమా?
బర్డ్ ఫ్లూ పక్షులకే కాదు మనుషులకూ కొంత ప్రమాదమే. అయితే.. లక్షణాలు మాత్రం కొందరిలో తేలికపాటిగా, మరికొందరిలో తీవ్రంగా కనిపిస్తుంటాయి. ఈ వ్యాధి సోకితే.. సాధారణంగా జ్వరం, దగ్గు, గొంతు నొప్పి, కండరాల నొప్పులు, కండ్లకలక, యాంగ్జైటీ, నిద్రలేకపోవడం లాంటి లక్షణాలు కనిపిస్తాయి. ఇది ప్రాణాంతకమా? అంటే.. కిడ్నీ సమస్యలు, గుండెపోటు, డయాబెటిస్.. లాంటి దీర్ఘకాలిక వ్యాధులు ఉన్నవాళ్ల మీద ఎక్కువ ఎఫెక్ట్‌ చూపిస్తుంది. ఆరోగ్యవంతులు కాస్త తొందరగానే కోలుకోవచ్చు. దీనివల్ల ప్రాణాలు పోయే ప్రమాదం తక్కువే. తీవ్రమైన లక్షణాలు ఉన్నవాళ్లలో శ్వాస తీసుకోవడంలో ఇబ్బందులు, న్యుమోనియా, రెస్పిరేటరీ డిస్ట్రెస్ సిండ్రోమ్ లాంటి వాటికి దారితీయొచ్చు. ఈ వ్యాధి లక్షణాలు మూడు నుండి ఐదు రోజుల వరకు ఉంటాయి. కొందరిలో మాత్రం పది రోజుల వరకు ఉండొచ్చు.
జాగ్రత్తలు తీసుకోవాలి
ప్రస్తుతం మనదగ్గర బర్డ్ ఫ్లూ వ్యాప్తి ఎక్కువగా లేకపోయినప్పటికీ జాగ్రత్తగా ఉండడం మేలని డాక్టర్లు సూచిస్తున్నారు. కోళ్లను పెంచే రైతులు, వాటి లాజిస్టిక్స్ సిబ్బందికి ఈ వ్యాధి సోకే అవకాశం ఎక్కువగా ఉండడం వల్ల తగిన జాగ్రత్తలు తీసుకోవాలి. లక్షణాలు కనిపిస్తే.. వెంటనే డాక్టర్ని సంప్రదించాలి. ప్రత్యేకంగా బర్డ్ ఫ్లూకి ఎలాంటి వ్యాక్సిన్ లేదు. కానీ.. సాధారణ ఫ్లూ వ్యాక్సిన్ వేయించుకుంటే కొంతవరకు అడ్డుకోవచ్చు.
బాగా ఉడికించి తినాలి
బర్డ్ ఫ్లూ రాకుండా ఉండాలంటే చికెన్ని ఇంట్లోనే శుభ్రంగా క్లీన్ చేసుకుని, బాగా ఉడికించి తినాలి. చికెన్ని ఎక్కువ టెంపరేచర్స్లో ఉడికించడం వల్ల వైరస్ సోకే ప్రమాదం తగ్గుతుంది. బయట రెస్టారెంట్లలో వండింది తినకపోవడం చాలా బెటర్. ఎందుకంటే.. వాళ్లు ఎలా వండుతున్నారో మనకు తెలియదు. పర్సనల్ హైజీన్ కూడా ముఖ్యమే. చేతితో ముక్కు, నోరు తాకేముందు కచ్చితంగా క్లీన్ చేసుకోవాలి. ఇదేకాదు.. ఏ వైరస్ వచ్చినా చిన్నపిల్లలు, పెద్దవాళ్లు కాస్త ఎక్కువ జాగ్రత్తగా ఉండాలి. వైరస్ ఎక్స్పోజర్ తక్కువగా ఉండడం వల్ల కొందరు పిల్లలు దీన్ని తట్టుకోలేకపోవచ్చు. ఇక పెద్దవాళ్లలో రోగనిరోధక శక్తి తక్కువగా ఉండడం, రకరకాల అనారోగ్య సమస్యలతో బాధపడుతుండడం వల్ల ఎక్కువ లక్షణాలు కనిపిస్తాయి. కానీ.. మిడిల్ ఏజ్వాళ్లు హెల్దీగా ఉండడం, అప్పటికే చాలా రకాల వైరస్లకు ఎక్స్పోజ్ అవ్వడం వల్ల కాస్త ఇమ్యూనిటీ ఎక్కువగా ఉంటుంది. దాంతో తొందరగా కోలుకుంటారు.
- డాక్టర్ వినీత్ ఇలాపురం, అసోసియేట్ వైస్ ప్రెసిడెంట్, యశోదా హాస్పిటల్
