అమెరికాలో మన దేశంలో మాదిరే రెండు చట్టసభలున్నాయి. వాటిలో ఒకటి రిప్రజెంటేటివ్స్ సభ, రెండోది సెనేట్. ప్రతినిధుల సభలో నెగ్గిన బిల్లును సెనేట్కూడా ఆమోదించాలి. ప్రెసిడెంట్ డొనాల్డ్ ట్రంప్పై వచ్చిన ఇంపీచ్మెంట్ మోషన్ ప్రతినిధుల సభలో నెగ్గింది. అధికారంలో ఉన్న ట్రంప్ పార్టీ రిపబ్లికన్లకు దిగువ సభలో మెజారిటీ లేదు. మొత్తం 441 మంది సభ్యులలో 435 మందికి మాత్రమే ఓటింగ్ హక్కు ఉంటుంది. మిగతా ఆరుగురికి ఓటింగ్ ఉండదు. అంటే, ఏదైనా బిల్లు నెగ్గాలంటే 218 ఓట్లు రావాలి. రిప్రజెంటేటివ్స్ హౌస్లో ప్రతిపక్ష డెమొక్రాట్లు 233 మంది ఉండగా, అధికార రిపబ్లికన్లు 197 మందే ఉన్నారు. దాంతో తేలిగ్గానే ట్రంప్పై తెచ్చిన ఇంపీచ్మెంట్ మోషన్ నెగ్గింది. ఇక, సెనేట్లో దానిని ఆమోదించాల్సి ఉంటుంది. 100 మంది సభ్యుల సెనేట్లో అధికార పార్టీకి 53 ఓట్లున్నాయి. ప్రతిపక్ష డెమొక్రాట్లు 45 మంది ఉన్నారు.
ఈ నేపథ్యంలో అసలు ఈ సెనేట్ విషయమేమిటి, దీని పనితీరు, ట్రంప్కి ఎదురయ్యే ఇబ్బందులు ఏవైనా ఉన్నాయేమో తెలుసుకుందాం.
- సెనేట్లో విచారణ సుప్రీం కోర్టు చీఫ్ జస్టిస్ జాన్ రాబర్ట్స్ నేతృత్వంలో జరుగుతుంది. దీనిలో సెనేటర్లు జ్యూరీగానూ, జడ్జిలుగానూకూడా వ్యవహరిస్తారు. దిగువ సభ స్పీకర్ నాన్సీ పెలోసీ రిప్రజెంటేటివ్స్ హౌస్ నుంచి ఇంపీచ్మెంట్ మేనేజర్లుగా కొందరు డెమొక్రాట్లను సెలక్ట్ చేస్తారు.
- సెనేటర్లదే పైచేయి. ఎవరైనా సెనేటర్ సుప్రీం సీజేతో విభేదించి ఓటింగ్కి డిమాండ్ చేయవచ్చు.
- సాక్షులను సెనేటర్లు రాతపూర్వకంగా ప్రశ్నించాలి.
- సెనేట్లో విచారణను రిప్రజెంటేటివ్స్ సభ నుంచి వచ్చిన ఇంపీచ్మెంట్ మేనేజర్లే ఆరంభిస్తారు. ఆర్గ్యుమెంట్ని వాళ్లే ముగిస్తారు. అంటే ఫస్ట్ అండ్ లాస్ట్ వర్డ్స్ నేరారోపణ చేసినవాళ్లవే ఉంటాయి.
- ట్రంప్ దిగిపోవాలంటే మూడింట రెండొంతుల ఓట్లు ఇంపీచ్మెంట్కి అనుకూలంగా రావాలి. 100 మంది సభ్యుల సెనేట్లో 66 మంది ఓటేయాలి. ఈ లెక్కన 54 మంది రిపబ్లికన్లలో 20 మంది, ఇద్దరు ఇండిపెండెట్లు డెమొక్రాట్లవైపు నిలవాలి. క్లింటన్ ఈ రూల్ ఆధారంగానే ఇంపీచ్మెంట్ నుంచి బయటపడ్డారు. అదే విధంగా ఇప్పుడు ట్రంప్ కూడా తప్పించుకుంటారని చెబుతున్నారు.
- ఆర్గ్యుమెంట్లను ముగించి, ఫైనల్ ఓటింగ్కి వెళ్లాలన్నా సెనేట్లో మెజారిటీ ఓటు పడాలి. ఆ విధంగా చూసినా ట్రంప్కి ఢోకా లేదు.
- ఇండియాలోవలె బటన్ నొక్కడం, లేదా స్పీకర్ అడిగినప్పుడు ‘అవును లేదా కాదు’ అని చెప్పడం అనే పద్ధతి ఉండదు. సెనేటర్లు వాళ్ల వాళ్ల సీట్లలోనే కూర్చుని తమ అభిప్రాయం చెప్పడంద్వారా ఓటును నమోదు చేస్తారు.
‘వాటర్ గేట్’తో దిగిపోయిండు
అమెరికా 37వ ప్రెసిడెంట్ రిచర్డ్ నిక్సన్. 1969లో మొదటిసారి, 1973లో రెండోసారి రిపబ్లికన్ పార్టీ తరఫున అమెరికా ప్రెసిడెంట్గా ఎన్నికయ్యారు. ఆయన ఫారిన్ పాలసీలో ఎక్స్పర్ట్, అమెరికాని ఆయిల్ సంక్షోభం నుంచి బయటపడేసిన ఆర్థికవేత్త, అరబ్ దేశాలను కాదని ఇజ్రాయెల్కి ఆయుధాలు పంపించిన సాహసి… అయితేనేం, ఇంపీచ్మెంట్కి గురై రాజీనామా చేయాల్సి వచ్చింది. ఆయన సెకండ్ టర్మ్ ఆరంభమైన కొత్తలోనే వాటర్గేట్ స్కాం బయటపడింది. 1972–74 మధ్య కాలంలో పొలిటికల్ అపోనెంట్ల వ్యూహాలు తెలుసుకోవడంకోసం వాళ్ల ఆఫీసుల్లో రహస్యంగా మైక్లు ఏర్పాటు చేయించారు. వీటిద్వారా ఎన్నికల్లో ఎటువంటి వ్యూహాలు పన్నుతున్నారో వినడానికి వీలయ్యేది. వాటర్గేట్ ఆఫీసు బిల్డింగ్ (వాషింగ్టన్)లోని డెమొక్రటిక్ నేషనల్ కమిటీ (డీఎన్సీ) హెడ్ క్వార్టర్స్లో నిక్సన్ ఆదేశాలతో అయిదుగురు వ్యక్తులు ఈ పనులకు పాల్పడినట్లు రుజువైంది. ‘డీప్ త్రోట్’ చెప్పిన కథనంగా ఇద్దరు వాషింగ్టన్ పోస్ట్ విలేకరులు ‘వాటర్గేట్ స్కాం’ని రిపోర్ట్ చేశారు. ఇంపీచ్మెంట్ మోషన్ ప్రవేశపెట్టడంతో… ఓడిపోతానని, పదవిని వదిలేయాల్సి వస్తుందని ముందే గ్రహించిన నిక్సన్ రాజీనామా చేసేశారు. 1789లో ఫస్ట్ ఫ్రెసిడెంట్ జార్జి వాషింగ్టన్ నుంచి ఇప్పటి ట్రంప్ వరకు… ఈ 230 ఏళ్లలోనూ ఇంపీచ్మెంట్ రుచిచూసి రాజీనామా చేసిన ఏకైక ప్రెసిడెంట్గా నిక్సన్ చరిత్రలో నిలిచిపోయారు.
