హైదరాబాద్ లో ఈసారి పోలింగ్ ఎంతొస్తదో ?

•    జంట నగరాల లోక్ సభ సెగ్మెంట్ల పోలింగ్ శాతం పెంచేందుకు అవేర్ నెస్ చేసిన అధికారులు 
•   గతంలో హైదరాబాద్​లో అత్యల్పంగా 43,  అత్యధికంగా 77.1 శాతం నమోదు
•   సికింద్రాబాద్ లో  అత్యల్పంగా 41.9 , అత్యధికంగా 59.9 శాతం నమోదు 
•  ఈసారి గతం కంటే ఎక్కువగా నమోదు కావొచ్చని అంటున్న అధికారులు

హైదరాబాద్​, వెలుగు: గ్రేటర్ సిటీ పరిధిలోని లోక్ సభ​సెగ్మెంట్లలో ఏ ఎన్నిక జరిగినా పోలింగ్ శాతం తగ్గుతూ వస్తోంది.  గత లోక్ సభ ఎన్నికల్లో హైదరాబాద్, సికింద్రాబాద్ సెగ్మెంట్​లో  సగం శాతం కూడా  పోలింగ్​నమోదు కాలేదు.  ఈసారి వరుస సెలవులు రావడం, ఎండల తీవ్రత ఎక్కువగా ఉండటం, అర్బన్​ ఏరియాల్లోని ప్రజలు ఓటు వేసేందుకు విముఖత చూపుతుండడం వంటి కారణాలతో ఓటింగ్ శాతం మరింత తగ్గే అవకాశాలు కనిపిస్తున్నాయి.

 ఆయా పార్టీల అభ్యర్థులు కూడా ప్రచారం అనుకున్న స్థాయిలో నిర్వహించలేదు. ఎన్నికల కమిషన్​, జీహెచ్​ఎంసీ ఓటింగ్ శాతాన్ని పెంచేందుకు అనేక అవగాహన కార్యక్రమాలు నిర్వహించాయి. ఇంటింటికి తిరిగి స్టిక్కర్లు అతికించడం, ఓటర్​ స్లిప్పులను పంపిణీ చేయడం, అపార్టుమెంట్స్, ఐటీ కారిడార్స్​, కాలేజీల్లో సదస్సులు నిర్వహించి ఓటు హక్కు ప్రాధాన్యంపై అవేర్ నెస్ కల్పించాయి.  ఈసారైనా గతం కంటే ఎక్కువగా నమోదు కావొచ్చని అధికారులు పేర్కొన్నారు. 

 పోలింగ్ శాతం ఎక్కువ, తక్కువ నమోదు  

1952లో ఏర్పాటైన హైదరాబాద్​లోక్ సభ సెగ్మెంట్​లో అధిక ఓటింగ్​శాతం 1991లో  77.1గా నమోదైంది. ఇదే ఇప్పటికి రికార్డుగా ఉంది. 1952 లో జరిగిన తొలి ఎన్నికలో హైదరాబాద్ లో అత్యల్పంగా 43 శాతం  నమోదైంది. 1998 లో అధికంగా నమోదై.. అనంతరం ఓటింగ్​శాతం తగ్గుతూ వస్తోంది. 2019లో 45.8 శాతంగా నమోదైంది.1984 లో  సికింద్రాబాద్​సెగ్మెంట్​లో 59.9 శాతం పోలింగ్ జరిగింది.

ఇదే నేటికి అధిక శాతంగా ఉంది. 1952 లో  తొలి సార్వత్రిక ఎన్నికల్లో అత్యల్పంగా​ శాతం 41.9 శాతం  నమోదైంది. 2019లో 48.9 శాతం నమోదైంది. 2009లో ఏర్పాటైన చేవెళ్ల సెగ్మెంట్​లో  అధికంగా 64.5 శాతం నమోదైంది.  2009లో ఏర్పాటైన మల్కాజిగిరి సెగ్మెంట్​లో  2019లో 53.4 శాతం అధికంగా నమోదైంది.