మహబూబ్నగర్, వెలుగు : పాలమూరు యూనివర్సిటీ (పీయూ) వైస్ చాన్స్లర్ పోస్టుకు మస్తు డిమాండ్ ఏర్పడింది. వీసీగా బాధ్యతలు నిర్వర్తించేందుకు గతంలో ఇక్కడ పని చేసిన వీసీలు, రిజిస్ట్రార్లు పోటీ పడుతుండడం, ఉమ్మడి పాలమూరు జిల్లాకు చెందిన ప్రొఫెసర్లు, ఉస్మానియా వర్సిటీకి చెందిన ప్రొఫెసర్లు ఈ పోస్టుకు అప్లై చేసుకోవడంతో ఎవరిని ఈ పోస్టు వరిస్తుందా? అనే విషయం ప్రస్తుతం చర్చనీయాంశంగా మారింది.
159 అప్లికేషన్లు..
పీయూ వీసీగా ప్రస్తుతం లక్ష్మీకాంత్ రాథోడ్ కొనసాగుతున్నారు. ఈయన పదవీ కాలం మంగళవారంతో ముగియనుంది. అయితే, రాష్ట్ర ప్రభుత్వం అధికారంలోకి వచ్చిన నెల రోజుల్లోపే కొత్త వీసీలను నియమించేందుకు కసరత్తు ప్రారంభించింది. ఈ ఏడాది జనవరి 28 నుంచి ఈ నెల 12 వరకు అప్లికేషన్లు తీసుకుంది. ఎలాంటి వయో పరిమితి లేకపోవడంతో ఈ పోస్టుకు 159 అప్లికేషన్లు వచ్చాయి. ఈ పోస్టులో మళ్లీ కొనసాగించాలని లక్ష్మీకాంత్ రాథోడ్ అప్లై చేసుకున్నారు. గతంలో పీయూ వీసీలుగా పని చేసిన భాగ్య నారాయణ, రాజారత్నం కూడా రేస్లో ఉన్నారు.
వీరితో పాటు గతంలో పీయూ రిజిస్ట్రార్లుగా పని చేసిన వెంకటాచలం, పాండు రంగారెడ్డి, శివరాజు కూడా వీసీ పోస్టుకు అప్లై చేసుకున్నారు. ఉస్మానియా యూనివర్సిటీకి చెందిన ప్రొఫెసర్ ప్రతాప్ రెడ్డి, నల్గొండ యూనివర్సిటీలో రిజిస్ట్రార్గా పని చేసిన కృష్ణారావు అప్లై చేసుకున్న వారిలో ఉన్నారు. అయితే, రాష్ట్ర సర్కారు మాత్రం వీసీల నియామకాన్ని సీరియస్గా తీసుకుంది.
గత ప్రభుత్వం వర్సిటీలకు వీసీలను నియమించడంలో తీవ్ర నిర్లక్ష్యం చేయడం, కొందరు వీసీలపై అవినీతి ఆరోపణలు రావడంతో ఆచితూచి అడుగులు వేస్తోంది. వీసీలుగా అప్లై చేసుకున్న వారి గురించి ఆరా తీసేందుకు ఇంటెలిజెన్స్ రిపోర్ట్ తెప్పించుకుంటోంది. అలాగే సెర్చ్ కమిటీలను కూడా ఏర్పాటు చేసింది. ఈ కమిటీలో పాలక మండలి నుంచి ఒకరు, ప్రభుత్వ ప్రతినిధి ఒకరు, యూజీసీ ప్రతినిధి ఒకరు అప్లికేషన్లను వడపోసి ముగ్గురి పేర్లను ఎంపిక చేస్తారు. ఎంపిక చేసిన వారి పేర్లను హయ్యర్ ఎడ్యుకేషన్ డిపార్ట్మెంట్కు సిఫార్సు చేస్తారు. వారు ఈ ముగ్గురి పేర్లను గవర్నర్కు పంపిస్తే, గవర్నర్ ముగ్గురిలో ఒకరిని సెలెక్ట్ చేసి వీసీగా ఎంపిక చేస్తారు.
ఇప్పటి వరకు ఆరుగురు వీసీలు..
పాలమూరు వర్సిటీని 2008లో అప్పటి కాంగ్రెస్ ప్రభుత్వం ప్రారంభించింది. వర్సిటీని ఏర్పాటు చేసి 16 ఏండ్లు కావస్తుండగా, ఇప్పటి వరకు ఆరుగురు వీసీలుగా పని చేశారు. మొదటి వీసీగా 25 జూలై 2008న వి.గోపాల్ రెడ్డి బాధ్యతలు చేపట్టారు. ఆయన స్థానంలో 25 జూలై 2011లో కె.నర్సింహారెడ్డి వీసీగా నియామకం కాగా, తొమ్మిది నెలలు మాత్రమే పని చేశారు. ఆయన స్థానంలో 24 ఏప్రిల్ 2021న వీసీగా భాగ్య నారాయణ నియమితులయ్యారు. 25 జూలై 2016లో వీసీగా బి.రాజారత్నం, 25 జూలై 2019లో రాహుల్ బొజ్జా, 22 మే 2021 నుంచి వీసీగా లక్ష్మీకాంత్ రాథోడ్
కొనసాగుతున్నారు.
సీఎం సొంత జిల్లా కావడంతో..
పీయూ సీఎం రేవంత్ రెడ్డి సొంత జిల్లా అయిన మహబూబ్నగర్లో ఉంది. అయితే గత ప్రభుత్వ హయాంలో పదేండ్ల పాటు పీయూ డెవలప్మెంట్కు నిధులు పూర్తి స్థాయిలో కేటాయించలేదు. కేవలం జీతాలకు తప్ప, బడ్జెట్లో ప్రత్యేకంగా నిధులు వెచ్చించలేదు. గత ఏడేండ్లలో డెవలప్మెంట్ కోసం రెండు సార్లు మాత్రమే బడ్జెట్ కేటాయించింది. 2017–18 రాష్ట్ర బడ్జెట్లో జీతాల కోసం రూ.5.7 కోట్లు కేటాయించగా, డెవలపమెంట్ కోసం రూ.10 కోట్లను రిలీజ్ చేసింది. 2019–20లో జీతాలకు రూ.6.63 కోట్లు ఇవ్వగా, రూ.90 లక్షల మాత్రమే డెవలప్మెంట్ కోసం విడుదల చేసింది.
ఆ తర్వాత పైసా ఇవ్వలేదు. అయితే కాంగ్రెస్ గవర్నమెంట్ రూలింగ్లోకి వచ్చినప్పటి నుంచే పీయూపై స్పెషల్ ఫోకస్ పెట్టింది. స్థానిక ఎమ్మెల్యే యెన్నం శ్రీనివాస్ రెడ్డి పీయూకు పెద్ద మొత్తంలో నిధులు కేటాయించాలని పట్టుబడట్టడంతో రూ.20 కోట్ల నిధులు వచ్చాయి. అలాగే కేంద్రం నుంచి పీయూకు ‘ఉషా’ స్కీం ద్వారా రూ.వంద కోట్లు మంజూరు చేయించేలా ఎమ్మెల్యే కృషి చేశారు. ప్రస్తుతం ఈ స్కీం కింద మొదటివిడతలో రూ.25 కోట్లు మంజూరయ్యాయి. ఈ నిధులతో త్వరలో డెవలప్మెంట్ వర్క్స్ ప్రారంభించనున్నారు.
