- శివాలయానికి పోటెత్తిన భక్తులు
- ప్రత్యేక పూజలు చేసిన మంత్రి హరీశ్రావు
- ముగిసిన విగ్రహ ప్రతిష్టాపన
- 4 జిల్లాల నుంచి భక్తుల రాక
పర్వతగిరి, వెలుగు: పర్వతగిరి శివాలయం భక్తజనసంద్రమైంది. పునరుద్ధరించిన ఆలయంలో శివున్ని దర్శించుకునేందుకు భక్తులు పోటెత్తారు. గత మూడ్రోజులుగా సాగుతున్న ప్రతిష్ఠాపన కార్యక్రమాలు శనివారంతో ముగిశాయి. ముగింపు రోజు వైద్యారోగ్య శాఖ మంత్రి హరీశ్రావు పాల్గొని ప్రత్యేక పూజలు చేశారు. గుడి నిర్మాణ కర్త, ఆర్డీఎఫ్ ఫౌండర్ ఎర్రబెల్లి రాంమ్మోహన్రావు, మంత్రి ఎర్రబెల్లి దయాకర్రావు, ఎమ్మెల్యేలు.. మంత్రికి ఘన స్వాగతం పలికారు. జనగామ, వరంగల్, హనుమకొండ, మహబూబాబాద్ జిల్లాల నుంచి భక్తులు పెద్ద ఎత్తున తరలివచ్చారు.
గుడి అద్భుతం..
పర్వతాల శివాలయం గుడి అద్భుతంగా ఉందని.. చుట్టూ కొండలు, పచ్చని చెట్లు, పక్కనే రిజర్వాయర్చూడముచ్చటగా ఉందని మంత్రి హరీశ్రావు అన్నారు. 800 ఏండ్ల కింద కట్టిన ఆలయాన్ని రాంమ్మోహన్ రావు పునరుద్ధరించడం గొప్ప విషయమన్నారు. ఈ ఆలయాన్ని మరింత అభివృద్ధి చేసేందుకు కృషి చేస్తానన్నారు. టూరిస్ట్ స్పాట్గా మార్చేందుకు కేసీఆర్ తో చర్చిస్తామన్నారు.
ప్రముఖుల పూజలు..
శివాలయంలో ఎమ్మెల్సీ కడియం శ్రీహరి, ఎంపీలు పసునూరి దయాకర్, వద్దిరాజు రవిచంద్ర, ప్రభుత్వ చీఫ్ విప్ వినయభాస్కర్, ఎమ్మెల్సీ పోచంపల్లి శ్రీనివాస్రెడ్డి, వరంగల్ మేయర్ గుండు సుధారాణి, ఎమ్మెల్యేలు చల్లా ధర్మారెడ్డి, తాటికొండ రాజయ్య, శంకర్నాయక్, నన్నపనేని నరేందర్, ఒడితెల సతీశ్కుమార్ తదితరులు పూజలు చేశారు. ప్రముఖ సింగర్ సునీత, ఫోక్ సింగర్ కనుకవ్వ పాటలు పాడి అలరించారు.
