- భద్రాద్రి జిల్లా చుంచుపల్లిలో ఘటన
- భార్య బంధువులే తీసుకెళ్లారని భర్త ఫిర్యాదు
భద్రాద్రి కొత్తగూడెం, వెలుగు : భద్రాద్రి జిల్లా చుంచుపల్లి మండలం హౌసింగ్బోర్డు కాలనీలో పట్టపగలే నడి రోడ్డుపై భర్తపై దాడి చేసి ఆయన భార్యను ఆమె తల్లి, మేనమామ, కొందరు మహిళలు కిడ్నాప్ చేశారు. కిడ్నాపైన మహిళ భర్త సన్నీ కథనం ప్రకారం...ఖమ్మానికి చెందిన దళితుడైన దూలగొండి సన్నీ, భద్రాద్రి కొత్తగూడెం జిల్లా లక్ష్మీదేవిపల్లి మండలానికి చెందిన గిరిజన యువతి గొగ్గెల మాధవి ప్రేమించుకున్నారు. మాధవి కుటుంసభ్యులు పెండ్లికి ఒప్పుకోకపోవడంతో ఆరు నెలల కింద హైదరాబాద్లో పెండ్లి చేసుకున్నారు. దీంతో మాధవి కనిపించడం లేదని ఆమె తల్లి ఈశ్వరమ్మ లక్ష్మీదేవిపల్లి పీఎస్లో కంప్లయింట్ఇవ్వగా మిస్సింగ్ కేసు నమోదు చేశారు.
ఇదిలా ఉండగా సుజాతనగర్లోని అబ్దుల్కలాం ఇంజినీరింగ్కాలేజీలో ఎంబీఏ చదువుతున్న మాధవి గురువారం ఎగ్జామ్ ఫీజు కట్టేందుకు భర్తతో కలిసి వచ్చింది. కొత్తగూడెంలో భోజనం చేసేందుకు సన్నీ, మాధవి కలిసి ఆటోలో వెళ్తున్నారు. చుంచుపల్లి మండలం హౌజింగ్బోర్డ్కాలనీ వద్ద కారులో వచ్చిన మాధవి తల్లి, మేనమామ, మరికొందరు మహిళలు ఆటోను ఢీ కొట్టి ఆపారు.
సన్నీని కొట్టి, మాధవిని తీసుకెళ్లారు. తర్వాత చుంచుపల్లి పీఎస్కు వెళ్లిన సన్నీ కులాంతర వివాహం చేసుకున్నాననే కోపంతోనే మాధవి తల్లి, మేనమామ, ఇతర బంధువులు తనపై దాడి చేసి కిడ్నాప్ చేశారని కంప్లయింట్చేశాడు. ఆమెకు ప్రాణాపాయం ఉందన్నారు. మాధవి కోసం గాలిస్తున్నట్టు పోలీసులు తెలిపారు.
