హైదరాబాద్​ స్టార్టప్​లకు దండిగా నిధులు

• 2024లో రూ.5,002 కోట్ల పెట్టుబడులు
• 2023తో పోలిస్తే 160 శాతం పెరిగిన ఫండ్​ రైజింగ్​
• ట్రాక్షన్ ​జియో యాన్యువల్​రిపోర్ట్​లో వెల్లడి

హైదరాబాద్, వెలుగు: హైదరాబాద్ ​సిటీ.. స్టార్టప్​లకు కేరాఫ్​గా మారుతున్నది. నిరుడు నగరంలోని స్టార్టప్​లకు దండిగా నిధులు సమకూరాయి. బెంగళూరు స్టార్టప్​లకు నిధుల సమీకరణ 25 శాతం పడిపోతే.. హైదరాబాద్​లోని స్టార్టప్​లకు 160 శాతం ఎక్కువగా నిధులు సమకూరాయి. ట్రాక్షన్​ జియో యాన్యువల్​ రిపోర్ట్​ తెలంగాణ టెక్​ 2024లో ఈ విషయం వెల్లడైంది. గత ఆర్థిక సంవత్సరం (2024)లో హైదరాబాద్​లోని స్టార్టప్​లు రూ.5,002 కోట్ల మేర నిధులను రైజ్​ చేసినట్టు రిపోర్ట్​ తేల్చింది. 2023లో కేవలం రూ.1,927 కోట్లే స్టార్టప్​లకు ఇన్వెస్టర్లు నిధులివ్వగా.. 2024కు వచ్చే సరికి అది 160 శాతం పెరిగినట్టు వెల్లడించింది. 

మరోవైపు 2024లో వచ్చిన ఫండింగ్​లో ఎక్కువ శాతం తొలి అర్ధభాగంలోనే వచ్చినట్టు తేల్చింది. ఫస్టాఫ్​లోనే రూ.4,240 కోట్ల మేర స్టార్టప్​లకు ఫండింగ్​వచ్చినట్టు నిర్ధారించింది. కాగా, 2022లో మొత్తంగా 3,627 కోట్ల ఫండింగ్​ వస్తే.. 2023లో మాత్రం సగానికి పడిపోవడం గమనార్హం. ఆ తర్వాత మళ్లీ పుంజుకుని 2024లో ఫండింగ్​ పెరిగింది. మొత్తంగా స్టార్టప్​ ఎకో సిస్టమ్స్​ఏర్పాటయినప్పటి నుంచి ఇప్పటిదాకా రాష్ట్రంలో స్టార్టప్​లు సుమారు రూ.30,234 కోట్ల మేర నిధులను రాబట్టినట్టు ట్రాక్షన్​ రిపోర్ట్​ వెల్లడించింది.

హెల్త్​ సెక్టార్​లోనే ఎక్కువ.. 

2024లో అత్యధిక ఫండింగ్ ​హెల్త్​ కేర్​ రంగానికే వచ్చినట్టు ట్రాక్షన్ రిపోర్ట్​ వెల్లడించింది. మొత్తం రూ.5,002 కోట్ల ఫండింగ్​లో హెల్త్​ కేర్​ రంగం వాటానే సుమారు రూ.2,629 కోట్లు కావడం విశేషం. అందులోనూ 99శాతం పెట్టుబడులు అపోలో గ్రూప్స్​కే వచ్చాయి. 2023తో పోలిస్తే హెల్త్​కేర్​ రంగంలో స్టార్టప్​లలో ఇన్వెస్టర్ల పెట్టుబడులు 2,139 శాతం పెరిగాయంటేనే.. ఇన్వెస్టర్లు ఆ రంగంపై ఎంత ఆసక్తి చూపిస్తున్నారో అర్థమవుతోంది. మొత్తంగా స్టార్టప్​లకు వచ్చిన పెట్టుబడుల్లో ఒక్క అపోలో ఫార్మసీ స్టోర్స్​కే అడ్వెంట్​ ఇంటర్నేషనల్​అనే సంస్థ రూ.2,600 కోట్లు పెట్టుబడులు పెట్టింది.

 హెల్త్​ కేర్​సెక్టార్​ తర్వాత ఫిన్​టెక్​(ఫైనాన్సింగ్​ టెక్నాలజీ) సెక్టార్​లో పెట్టుబడులు 91 శాతం పెరిగి.. రూ.920 కోట్లుగా రిపోర్ట్​ తేల్చింది. రాష్ట్రంలో 8,396 స్టార్టప్​లు ఉండగా.. అందులో ఇప్పటికే రెండు సంస్థలు యూనికార్న్​లుగా ఎదిగినట్టు పేర్కొంది. మరో 14 స్టార్టప్​లు యూనికార్న్​లుగా మారే దశలో (సూనికార్న్) ఉన్నట్టు వెల్లడించింది. మొత్తం స్టార్టప్​ల ఫండ్​ రైజ్​రూ.30,234 కోట్లైతే.. అందులో రెండు యూనికార్న్​ల ఫండ్​రైజ్​ రూ.21,032 కోట్లు కావడం విశేషం. 

ఇతర మెట్రో సిటీలతో పోలిస్తే ఇంకా వెనకబాటే..

హైదరాబాద్​ స్టార్టప్​లకు ఇన్వెస్ట్​మెంట్లు పెరుగుతున్నా.. ఇతర మెట్రో సిటీలతో పోలిస్తే ఇంకా చాలా వరకు వెనకబడే ఉన్నట్టు ట్రాక్షన్​రిపోర్ట్​ పేర్కొంది. బెంగళూరు, ఢిల్లీ, ముంబైలోని స్టార్టప్​లకు నిధులు అత్యధికంగా సమకూరుతున్నాయి. ఆ మూడు సిటీల్లో ఏటా రూ.30 వేల కోట్ల దాకా స్టార్టప్​లకు పెట్టుబడులు అందుతున్నాయి. ఈ విషయంలో హైదరాబాద్​ సిటీ ప్రస్తుతం 8వ స్థానంలో ఉన్నట్టు రిపోర్ట్​ పేర్కొంది.