హైదరాబాద్, వెలుగు: మీడియా డే మార్కెటింగ్ (ఎండీఎం), డెయిరీ, ఫుడ్, ఇండియా గ్రీన్ ఎనర్జీ.. నాలుగు ఎక్స్‌‌పోలు హైదరాబాద్‌‌లోని హైటెక్స్ ఎగ్జిబిషన్ సెంటర్‌‌లో ఈనెల 12 నుంచి 14 వరకు మూడు రోజుల పాటు జరగనున్నాయి. ఈ ఎక్స్‌‌పోలకు రాష్ట్ర రవాణా శాఖ మంత్రి పొన్నం ప్రభాకర్ ముఖ్య అతిథిగా పాల్గొననున్నారు. ఐఏఎస్ ప్రిన్సిపల్ సెక్రటరీ (ఇంధనం) సందీప్ కుమార్ సుల్తానియా తదితరులు హాజరవుతారు. ఈ నాలుగు ఎక్స్‌‌పోలకు ఎఫ్‌‌టీసీసీఐ, డీఐసీసీఐ, తెలంగాణ సోలార్ ఎనర్జీ అసోసియేషన్, ఇతర స్థానిక సంస్థలు మద్దతు ఇస్తున్నాయి.
గ్రీన్ వెహికల్ ఎక్స్‌‌పో 6వ ఎడిషన్‌‌లో ఎలక్ట్రిక్, హైబ్రిడ్ వాహనాలు, బైక్‌‌లు, స్కూటర్లు, కార్లు, ఎల్‌‌సీవీలు, హెచ్‌‌సీవీలు , ట్రక్కులు, బ్యాటరీతో నడిచే వాహనాలు, విడి భాగాల తయారీ కంపెనీలు తమ ప్రొడక్ట్‌‌లను ప్రదర్శనకు ఉంచుతాయి. ఎక్స్‌‌పో టైమ్‌‌లో వర్కాస్ -ఆర్ వైటో ఎలక్ట్రిక్స్ రూ.38,500 -ఉన్న ఈవీ స్కూటర్‌‌ను రూ. 24,500 -కి విక్రయిస్తోంది. ఈవీ టూ వీలర్లను విక్రయించడంలో తాము పెద్దగా ఆసక్తి చూపడం లేదని కంపెనీ సీటీఓ సందీప్ రాల్హాన్ విలేకరుల సమావేశంలో అన్నారు. ఈవీ మౌలిక సదుపాయాలు, పర్యావరణ వ్యవస్థను అభివృద్ధి చేయడంపై దృష్టి సారించామని పేర్కొన్నారు
కేవలం రూ.11,000- పెట్టుబడితో టూ , త్రీ వీలర్ ఛార్జింగ్ స్టేషన్లను ఇన్‌‌స్టాల్ చేయడానికి విప్లవాత్మక నమూనాను డెవలప్ చేశామన్నారు. కిరాణా షాప్, పాన్ షాప్ నుంచి టైర్ పంక్చర్ షాపుల వరకు తక్కువ ఖర్చుతో ఛార్జింగ్ స్టేషన్‌‌ను ఏర్పాటు చేయొచ్చన్నారు. నెలకు రూ. 5,000- సంపాదించొచ్చని తెలిపారు. ఛార్జింగ్ స్టేషన్‌‌ను ఏర్పాటు చేయడానికి త్రీ ఫేజ్ విద్యుత్ కనెక్షన్, వాహనం ఛార్జ్ చేయడానికి తగినంత పార్కింగ్ స్థలం ఉంటే చాలని పేర్కొన్నారు. కాగా, ఈ నాలుగు ఎక్స్‌‌పోలలో 100 ఎగ్జిబిటర్లు ఉంటారు. 1,500 మంది సందర్శకులు వస్తారని అంచనా.
