హోటల్ ​ఫుడ్​తో జరభద్రం

• బిర్యానీలో జెర్రి.. టిఫిన్​లో జిల్ల పురుగు
• ఫుడ్​ కలర్స్​ మాటున కనబడనివి ఎన్నో
• హోటల్​ ఫుడ్ తో రోగం గ్యారెంటీ
• మిగిలిన చికెన్​.. మటన్​తో వెరైటీ వంటకాలు
• ఫుడ్​ సేఫ్టీ ఆఫీసర్ల దాడులు, జరిమానాలు

యాదాద్రి, వెలుగు : భువనగిరిలోని ఓ హోటల్​ వర్కర్.. కూరగాయలు కొనడానికి రైతుబజార్​కు వచ్చాడు. ఓ షాపులోకి వెళ్లి కస్టమర్లు కొనుగోలు చేయగా మిగిలిపోయిన కూరగాయలు తక్కువ ధరకు తీసుకున్నాడు. ఆ కూరగాయలనే హోటల్​కు తీసుకెళ్లాడు. మరోవైపు భువనగిరి బైపాస్​ రోడ్డులో ఉన్న వివేరా హోటల్​కు ఓ కస్టమర్ వెళ్లాడు. చికెన్​ బిర్యానీకి ఆర్డర్ ఇచ్చాడు. అది తింటుండగా దాంట్లో జెర్రి వచ్చింది. దీంతో కస్టమర్ హోటల్​వర్కర్స్​తో వాగ్వాదానికి దిగాడు.

దీనికి సంబంధించిన వీడియో వైరల్​గా మారడంతో ఫుడ్ సేఫ్టీ కమిషనర్ దృష్టికి వెళ్లింది. ఉన్నతాధికారుల ఆదేశాలతో ఆ హోటల్స్​పై ఫుడ్ సేఫ్టీ ఆఫీసర్లు దాడులు చేసి శాంపిల్స్ సేకరించి ల్యాబ్​కు పంపించారు. భువనగిరి బస్టాండ్​సమీపంలోని శివ హోటల్​లో ఓ కస్టమర్ టిఫిన్​ చేస్తుండగా జిల్ల పురుగు వచ్చింది. సదరు కస్టమర్​ ఫిర్యాదు చేశాడు. ఆ హోటల్​పై ఫుడ్ సేఫ్టీ ఆఫీసర్లు దాడులు చేసి శాంపిల్స్ సేకరించడంతోపాటు రూ.15 వేలు జరిమానా విధించారు. 

నాసిరకమైన సరుకులతో..

ఇంటి నుంచి బయటకు వెళ్లిన సమయంలో కొందరు హోటల్స్​కు వెళ్లి టిఫిన్స్​, భోజనం చేయడం అలవాటు. ఆ అలవాటును కొన్ని హోటళ్ల యజమానులు క్యాష్ చేసుకుంటున్నారు. నాసిరకమైన సరుకులతో వంట చేసి.. సింథటిక్​ కలర్స్, మసాల దట్టించి తయారు చేస్తున్నారు. మసాల ఘాటుతో వేడివేడిగా వచ్చిన ఫుడ్స్​ను కస్టమర్స్​తినేస్తున్నారు. కొందరైతే మిగిలిపోయిన బిర్యానీ సహా ఇతర ఫుడ్స్​ను ఇంటికి తీసుకెళ్లి ఫ్రిజ్​లో భద్రపరిచి మరుసటి రోజు తినేస్తున్నారు. ఇక వంట నూనె మాత్రం మార్చకుండా పాత నూనెలో కొత్తగా నూనె పోసి వాడుతున్నారు. ఇలాంటి ఫుడ్స్ కారణంగా అనేక మంది అనారోగ్యం పాలవుతున్నారు.

అయినా లాభాపేక్షతో హోటల్ బిజినెస్​లో ఉన్న కొందరు పట్టించుకోవడం లేదు. అయితే ఏ హోటల్​కు వెళ్లినా.. బయట ఎంతో నీట్​గా కన్పిస్తుంటాయి. కానీ కొన్ని హోటల్స్ కిచెన్​కు వెళ్తే.. అపరిశుభ్రంగా ఉంటాయి. వంట గిన్నెలపై మూతలు ఉండవు. ఈగలు, జిల్ల పురుగులు, ఎలుకలు పరిగెడుతూ ఉంటాయి. క్లీన్​చేసే చీపురు పట్టుకున్న చేతితోనే గరిట పట్టుకొని వంట చేస్తుంటారు. ఇక వంట చేసే మాస్టర్ల అవతారం చూస్తే ఆ హోటల్స్​లో ఏమి తినలేం. ఫుడ్ కలర్స్​కలుపుతూ ఉండడం వల్ల ఫుడ్స్​లో ఏదైనా ఉన్నా కన్పించదు. 

బిర్యానీలో జెర్రి.. టిఫిన్​లో జిల్ల పురుగు..

కిచెన్​లో అపరిశుభ్రత కారణంగా ఎలుకలు, జిల్ల పురుగులు(బొద్దింకలు), బల్లుల వంటివి తిరుగుతూ ఉంటాయి. వంట గిన్నెలపై మూతలు సరిగా లేకుంటే అవి అందులో పడిపోతాయి. ఇటీవల భువనగిరిలోని రెండు హోటల్స్​లోని ఫుడ్స్​లో ఇదే విధంగా జెర్రి, జిల్ల పురుగు చేరాయి. హోటల్ వివేరాలో చికెన్​ బిర్యానీ తింటున్న కస్టమర్​కు జెర్రి కన్పించగా, శివ ఉడిపి హోటల్​లో టిఫిన్​ చేస్తున్న కస్టమర్​కు జిల్ల పురుగు కన్పించింది. దీంతో హోటల్స్​ నిర్వాహకులతో కస్టమర్లు వాగ్వాదం చేసినా ఎవరూ పెద్దగా పట్టించుకోలేదు. దీంతో సోషల్ మీడియాలో పోస్ట్​ చేయడంతో ఈ విషయం కాస్తా హయ్యర్ ఆఫీసర్ల దృష్టికి వెళ్లింది. 

ఫ్రిజ్​లో బిర్యానీ.. మిగిలిన చికెన్​తో..

హయ్యర్​ఆఫీసర్ల ఆదేశాల మేరకు పలు హోటల్స్​పై ఫుడ్ సేఫ్టీ ఆఫీసర్లు దాడులు నిర్వహిస్తున్నారు. ప్రతి హోటల్​లోని కిచెన్​లు అపరిశుభంగా ఉండడాన్ని ఆఫీసర్లు గుర్తించారు. గత నెలలో హోటల్ వివేరాపై దాడులు నిర్వహించి ఎక్స్​పైర్​తేదీ లేని వస్తువులను ధ్వంసం చేశారు. నోటీసులు జారీ చేసి ఫుడ్ శాంపిల్స్​ సేకరించి ల్యాబ్​కు పంపించారు. ఇటీవల భువనగిరి టౌన్​లోని మధురం హోటల్​లో ఫ్రిజ్​లో  బిర్యానీ నిల్వ చేసి ఉంచారు.

 ఇదేమని ఆఫీసర్లు ప్రశ్నిస్తే తమ హోటల్లో పని చేసేవారి కోసమంటూ సమాధానం చెప్పుకున్నారు. దీంతో సదరు హోటల్ యజమానికి రూ.15 వేలు ఫైన్ వేశారు. శివ హోటల్​పై దాడులు నిర్వహించగా అపరిశుభ్రంగా ఉండడంతో రూ.15 వేలు ఫైన్​ విధించారు. మండి హౌస్​లో బిర్యానీ తయారీలో సింథటిక్ కలర్స్​ఉపయోగించినట్టు తేలింది. దీంతో బిర్యాని, చికెన్ ముక్కలను డస్ట్​బిన్​లో పారవేయించి రూ.5 వేలు ఫైన్ వేశారు. గతంలో పలుమార్లు అధికారులు దాడులు నిర్వహించినా హోటల్స్ నిర్వాహకుల్లో మాత్రం మార్పు 
రావడం లేదు. 

రూ.80 వేలు ఫైన్​.. చెల్లించని యజమాని..

భువనగిరి బైపాస్​రోడ్డులోని ఓ హోటల్​పై గతంలో ఫిర్యాదు వచ్చింది. దీంతో ఫుడ్ సేఫ్టీ ఆఫీసర్లు దాడులు చేశారు. అపరిశుభ్ర వాతావరణంలో ఉండడంతోపాటు ఆహార పదార్థాల్లో తేడా కనిపెట్టి శాంపిల్స్​సేకరించి నోటీసు జారీ చేశారు. సేకరించిన శాంపిల్స్​ను ల్యాబ్​కు పంపించగా కల్తీ జరిగినట్టు రిపోర్ట్​ వచ్చింది. దీంతో సదరు హోటల్​యజమానికి రూ. 80 వేలు ఫైన్ వేశారు. అయితే ఆరు నెలలు గడిచినా.. ఇప్పటివరకు సదరు హోటల్ యజమాని ఫైన్ చెల్లించలేదు. హోటల్ మాత్రం నడుస్తూనే ఉంది.