తెలుగు రాష్ట్రాల్లో అకాల వర్షాలు కురుస్తున్నాయి. మండే ఎండల నుంచి ఈ వర్షాలు కాస్త రిలీఫ్ ఇస్తున్నప్పటికీ.. రైతులు మాత్రం చేతికి వచ్చిన పంట నష్టపోయి తీవ్ర ఇబ్బంది పడుతున్నారు. నగరాల్లో రోడ్లు జలమయమయ్యి వాహనదారులు అవస్థపడుతున్నారు. ఈ క్రమంలో మంగళవారం ( ఏప్రిల్ 8 ) హైదరాబాద్ లో భారీ వర్షం కురిసే ఛాన్స్ ఉందని హెచ్చరించింది వాతావరణ శాఖ. హైదరాబాద్ లోని పలు ప్రాంతాల్లో మోస్తరు నుంచి భారీ వర్షాలు కురుస్తాయని.. బలమైన ఈదురుగాలులు, ఉరుములు, మెరుపులతో వర్షం కురిసే అవకాశం ఉందని తెలిపింది వాతావరణ శాఖ.
ఈ క్రమంలో హైదరాబాద్ కు ఎల్లో అలర్ట్ జారీ చేసింది వాతావరణ శాఖ. అయితే.. గత వారంలో కురిసినంత భారీ వర్షాలు కురిసే అవకాశం లేదని తెలిపింది వాతావరణ శాఖ. ఇదిలా ఉండగా సోమవారం ( ఏప్రిల్ 7 ) హైదరాబాద్ లోని ముషీరాబాద్ ఏరియాలో 39.2 డిగ్రీల గరిష్ట ఉద్నోగ్రత నమోదయ్యింది.
తెలంగాణ వ్యాప్తంగా కూడా ఇవాళ, రేపు ( ఏప్రిల్ 8, 9 ) అక్కడక్కడా మోస్తరు నుంచి భారీ వర్షాలు కురిసే అవకాశం ఉందని తెలిపింది వాతావరణ శాఖ. సోమవారం ( ఏప్రిల్ 7 ) నిర్మల్ జిల్లాలో 41.2 గరిష్ట ఉష్ణోగ్రత నమోదయ్యింది. ఇవాళ, రేపు వర్షం కురిసే అవకాశం ఉన్న నేపథ్యంలో తెలంగాణ వ్యాప్తంగా ఉష్ణోగ్రతలు తగ్గుముఖం పట్టి వాతావరణం చల్లబడే ఛాన్స్ ఉందని తెలిపింది వాతావరణ శాఖ.
