మేడ్చల్, శామీర్​పేట​కు మెట్రో .. నార్త్​ సిటీ వైపు విస్తరణకు సీఎం గ్రీన్​ సిగ్నల్

• 45 కిలోమీటర్ల మేర విస్తరించాలని నిర్ణయం
• ప్యారడైజ్​- –మేడ్చల్ (23 కిలోమీటర్లు).. జేబీఎస్​ –శామీర్​పేట్ (22 కిలోమీటర్లు)
• 3 నెలల్లో డీపీఆర్ ​సిద్ధం చేసేలా మెట్రో అధికారులకు ఆదేశం
• ఇప్పటికే 3 వైపులా విస్తరణకు చకచకా అడుగులు

హైదరాబాద్ సిటీ, వెలుగు: హైదరాబాద్​ నార్త్​ సిటీకి మెట్రోను విస్తరించనున్నట్టు సీఎం రేవంత్​రెడ్డి ప్రకటించారు. ప్యారడైజ్ నుంచి- మేడ్చల్ (23 కిలో మీటర్లు), జేబీఎస్ నుంచి- శామీర్ పేట్ (22 కిలోమీటర్లు) వరకు మొత్తం 45 కిలో మీటర్ల మేర విస్తరించనున్నట్టు తెలిపారు.  ఈ మేరకు మున్సిపల్​ శాఖ ముఖ్య కార్యదర్శి దాన కిశోర్, హెచ్ఎం‌‌ఆర్‌‌ఎల్‌‌ ఎండీ ఎన్వీఎస్‌‌ రెడ్డితో  ఈ 2 కారిడార్లకు డీపీఆర్ తయారీ విషయంలో బుధవారం చర్చించి, కీలక నిర్ణయం తీసుకున్నారు. 

గతంలో తాను మల్కాజ్​గిరి ఎంపీగా పనిచేశానని, ఆ ప్రాంత ట్రాఫిక్ సమస్యలు, కారిడార్ల రూట్ మ్యాప్​లపై తనకు అవగాహన ఉన్నదని  మెట్రో ఎండీకి సీఎం తెలిపారు. అయినా కూడా రూట్ మ్యాప్​ గురించి ప్రస్తుత మల్కాజ్​గిరి ఎంపీకి వివరించి, ఆయన సూచనలు, సలహాలు తీసుకోవాలని ఆదేశించారు.

సెకండ్ ఫేజ్​ పార్ట్ బీకి సంబంధించి.. డీపీఆర్స్​ తయారీని 3 నెలల్లో పూర్తి చేసి రాష్ట్ర ప్రభుత్వ అనుమతి తీసుకోవాలని సీఎం సూచించారు. మెట్రో ఫేజ్-–2  పార్ట్​ ఏ లాగే పార్ట్ బీని కూడా కేంద్ర, -రాష్ట్ర  ప్రభుత్వాల జాయింట్ వెంచర్ ప్రాజెక్టుగా రూపొందించాలని, ఈ ప్రతిపాదనలను కేంద్ర ప్రభుత్వ అనుమతికి పంపించాలని ఆదేశించారు. సీఎం ఆదేశాల మేరకు వెంటనే డీపీఆర్లు, ఇతర అనుబంధ డాక్యుమెంట్ల తయారీ చేపడుతున్నట్టు మెట్రో ఎండీ ఎన్వీఎస్ రెడ్డి తెలిపారు. ఇప్పటికే సెకండ్ ఫేజ్ ​పార్ట్ బీలో ఫ్యూచర్​ సిటీ మెట్రోకు సంబంధించి డీపీఆర్​ రూపొందుతున్నాయి.  

నగరానికి నలువైపులా మెట్రో..

అర్బన్​ పబ్లిక్ ​ట్రాన్స్​పోర్ట్​ సిస్టమ్​లో కీలక పాత్ర పోషిస్తున్న హైదరాబాద్ మెట్రోను నగరం నలువైపులా విస్తరించేందుకు సీఎం రేవంత్​రెడ్డి గ్రీన్​ సిగ్నల్​ఇచ్చారు. రాష్ట్రంలో కాంగ్రెస్ ప్రభుత్వాన్ని ఏర్పాటు చేశాక మెట్రో ప్రాధాన్యతను గుర్తించి.. నగరంలోని సౌత్, ఈస్ట్, వెస్ట్​ దిశల్లో మెట్రో విస్తరణ చేపట్టింది. దీనికి సంబంధించి 5 కారిడార్ల డీపీఆర్స్​ కేంద్ర ప్రభుత్వ ఆమోదం కోసం వేచి చూస్తున్నాయి. ప్రస్తుతం నగరానికి ఉత్తరం వైపున్న మేడ్చల్, శామీర్​పేట్ వరకు మెట్రో విస్తరణకు సీఎం పచ్చ జెండా ఊపడంతో మెట్రో నగర నలుమూలలా విస్తరించనుంది. ఇప్పటికే నగరంలో 69 కిలోమీటర్ల మేర సేవలు అందిస్తున్న మెట్రో... భవిష్యత్తులో మరో 161.4  కిలోమీటర్ల మేర ప్రజలకు అందుబాటులోకి రానున్నది. ప్రస్తుతం పబ్లిక్​ ట్రాన్స్​పోర్టు పరంగా మెట్రోలో 13 శాతం మంది ప్రయాణిస్తున్నారు. సెకండ్​ఫేజ్​లోని విస్తరణ పనులు పూర్తయితే.. పబ్లిక్​ ట్రాన్స్​ పోర్టులో మెట్రో కీలకంగా మారనున్నది.

రెండు పార్ట్స్ పూర్తయితే 230.4  కిలో మీటర్లు

ప్రస్తుతం ఫస్ట్ ఫేజ్​3  కారిడార్ల పరిధిలో మెట్రో65 కిలో మీటర్లు నడుస్తున్నది. శివారు ప్రాంతాల నుంచి సెంట్రల్ సిటీలోకి వస్తున్నవారి సంఖ్య ఎక్కువగా ఉంటుండటంతో.. నగరానికి నలుమూలలా విస్తరించాలని సీఎం రేవంత్ రెడ్డి నిర్ణయించారు. ఇందులో భాగంగా ఈస్ట్ వైపు ఎల్బీనగర్​వరకు ఉన్న మెట్రోను హయత్ నగర్​(7.1 కిలో మీటర్లు) వరకు, వెస్ట్ వైపు మియాపూర్ ​నుంచి పఠాన్​చెరు (13.4), రాయదుర్గ్ నుంచి కోకాపేట్ నియో పొలిస్​ (11.6) వరకు,  సౌత్​వైపు ఎయిర్​పోర్ట్ ​నుంచి ఫ్యూచర్​సిటీ ముచ్చర్ల (40 కిలో మీటర్లు) వరకు పొడిగిస్తూ గతంలో నిర్ణయం తీసుకున్నారు. 

ఇవే కాకుండా ఎయిర్​పోర్ట్​ ప్రయాణికులను దృష్టిలో పెట్టుకొని నాగోల్​నుంచి శంషాబాద్ ఎయిర్​పోర్ట్​వరకు (36.8 కిలో మీటర్లు), ఓల్డ్​ సిటీ మెట్రో ఎంజీబీఎస్​నుంచి ఫలక్​నుమా వరకు ప్రతిపాదనలు ఉండగా, ఫలక్​నుమా నుంచి చాంద్రాయణ గుట్టవరకు(7.1 కిలో మీటర్లు) విస్తరించాలని నిర్ణయించారు. ప్రస్తుతం ఉత్తరం వైపు మరో రెండు కారిడార్లను జేబీఎస్​ నుంచి శామీర్​పేట్(22 కిలో మీటర్లు), ప్యారడైజ్​ నుంచి మేడ్చల్ (23 కిలో మీటర్లు) వరకు విస్తరించాలని సీఎం మెట్రో అధికారులను ఆదేశించారు. దీంతో సెకండ్ ఫేజ్​లో పార్ట్ ఏ, పార్ట్ బీ మెట్రో పూర్తయితే సిటీలో మెట్రో 230.4  కిలో మీటర్ల మేర సేవలు అందించనున్నది.

రేవంత్​కు ధన్యవాదాలు: మంత్రి పొన్నం ప్రభాకర్​

నార్త్ సిటీ మెట్రోకు గ్రీన్​ సిగ్నల్ ఇస్తూ సీఎం రేవంత్ రెడ్డి తీసుకున్న నిర్ణయంపై రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ హర్షం వ్యక్తం చేశారు. ఉత్తర తెలంగాణ నుంచి వచ్చే వాహనదారులు శివారుల్లో ట్రాఫిక్​తో ఇబ్బందులు పడ్తున్నారని, శామీర్​ పేట్ వరకు మెట్రోను పొడిగించాలని గతంలోనే సీఎం దృష్టికి తీసుకెళ్లినట్టు వెల్లడించారు. ఈ రూట్లలో ఇప్పటికే డబుల్ డెక్కర్ ఫ్లై ఓవర్ మంజూరు కావడం, తాజాగా మెట్రో మార్గానికి సీఎం పచ్చజెండా ఊపడంతో ట్రాఫిక్​ కష్టాలు తొలగనున్నాయని  అన్నారు. ఈ మెట్రో మార్గం పూర్తయితే సిటీ నుంచి ఉత్తర తెలంగాణ జిల్లాలకు వెళ్లేవారికి చాలా సమయం ఆదా అవుతుందని తెలిపారు.

నార్త్ వైపు మెట్రోవిస్తరణ వివరాలు..

ప్యారడైజ్​– మేడ్చల్ (23 కిలో మీటర్లు)ప్యారడైజ్ మెట్రోస్టేషన్ – తాడ్ బంద్​, బోయినపల్లి, సుచిత్ర సర్కిల్, కొంపల్లి, గుండ్ల పోచంపల్లి, కండ్లకోయ, ఓఆర్ఆర్ ఎగ్జిట్ మీదుగా మేడ్చల్  జేబీఎస్​ – శామీర్​పేట్(22  కిలో మీటర్లు)  జేబీఎస్ మెట్రో స్టేషన్ – విక్రంపురి, కార్ఖానా, తిరుమలగిరి, లోతుకుంట, అల్వాల్, బొల్లారం, హకీంపేట్, తూముకుంట, ఓఆర్ఆర్ ఎగ్జిట్ మీదుగా శామీర్ పేట్