- నేడు చెక్కులు అందించనున్న మంత్రి పొన్నం, ఎంపీ ఒవైసీ
- ఇప్పటి వరకు 169 మంది యజమానుల సమ్మతి
హైదరాబాద్ సిటీ, వెలుగు: ఓల్డ్ సిటీ మెట్రో భూసేకరణలో కీలక ఘట్టం ప్రారంభమైనది. ఆ ప్రాంతంలోని మెట్రో వెళ్లే మార్గంలో ప్రభావిత ఆస్తుల యజమానులకు ప్రభుత్వం సోమవారం నష్టపరిహారం చెల్లించనుంది. మంత్రి పొన్నం ప్రభాకర్, హైదరాబాద్ ఎంపీ అసదుద్దీన్ ఒవైసీ.. ఆ యజమానులకు చెక్కులు అందించనున్నారు. సెకండ్ ఫేజ్లో భాగంగా ఓల్డ్ సిటీ మెట్రోను ఎంజీబీఎస్ నుంచి చాంద్రాయణగుట్ట వరకు (7.5 కిలోమీటర్లు) కారిడార్– 6 కింద నిర్మించనున్నారు. ఇందుకోసం రూ.2,741 కోట్లు ఖర్చవుతుందని మెట్రో అధికారులు అంచనా వేశారు. ఈ మార్గంలో మొత్తం 1,100 నిర్మాణాలు ప్రభావితం అవుతున్నట్లు గుర్తించారు. ఆయా ఆస్తులకు సంబంధించి నోటిఫికేషన్ కూడా విడుదల చేశారు.
ముందుగా ఎంజీబీఎస్ నుంచి మీరాలం మండి వరకు భూసేకరణపైనే అధికారులు దృష్టి పెట్టారు. ఆ మార్గంలో లెఫ్ట్ సైడ్ 200 ఆస్తులు, రైట్ సైడ్ 200 ఆస్తులు మొత్తం 400 ఆస్తులకు నోటిఫికేషన్ ఇచ్చారు. ఇందులో 169 మంది యజమానులు తమ ఆస్తులను ఇవ్వడానికి ఒప్పుకున్నారు. వారిలో 40 మందికి సంబంధించిన ధ్రువీకరణ పూర్తయింది. ఆ 40 మంది యజమానులకు సోమవారం హైదరాబాద్ కలెక్టరేట్లో చెక్కులను పంపిణీ చేయనున్నారు.
స్క్వేర్ యార్డుకు రూ. 81 వేలు చొప్పున చెల్లింపు
భూసేకరణ చట్టానికి లోబడి ఓల్డ్ సిటీ మెట్రో మార్గంలో మొదట స్క్వేర్ యార్డుకు రూ.63 వేలు చెల్లించాలని అధికారులు నిర్ణయించారు. అందుకు నిర్వాసితులు అంగీకరించకపోవడంతో కన్సంట్ అవార్డు కింద స్క్వేర్ యార్డుకు రూ.81 వేలు చెల్లిస్తామని ప్రకటించారు. కన్సంట్ అవార్డుకు నిర్వాసితులు అందరూ అంగీకారం తెలిపారని అధికారులు చెబుతున్నారు. దీంతో పాటు రిలీఫ్ అండ్ రిహాబిలిటేషన్ చట్టం ప్రకారం పునరావాస పరిహారం, తొలగించే నిర్మాణాలకు కూడా పరిహారం ఇస్తామని మెట్రో ఎండీ ఎన్వీఎస్ రెడ్డి తెలిపారు. మరో 25 ఆస్తులకు సంబంధించి లీగల్ సమస్యలు ఉన్నందున ఆ ఆస్తుల యజమానులకు జనరల్ కన్సంట్ కింద రూ. 63 వేలు త్వరలో అధికారులు చెల్లించనున్నారు.
