హైదరాబాద్ సిటీ, వెలుగు: హైదరాబాద్‌లో మెఫెంటర్మిన్ సల్ఫేట్ ఇంజెక్షన్లు అమ్ముతున్న ఇద్దరిని టాస్క్ ఫోర్స్ సౌత్ జోన్ పోలీసులు బుధవారం అరెస్ట్ చేశారు. మొత్తం110 వయల్స్ ను స్వాధీనం చేసుకున్నామని, వాటి విలువ రూ.1.32 లక్షలు ఉంటుందని టాస్క్ఫోర్స్ డీసీపీ శ్రీనివాసరావు తెలిపారు. నిందితుడు మహమ్మద్ జిబ్రాన్ అహ్మద్ కు జిమ్‌కు వెళ్లే అలవాటు ఉందని, తొందరగా బాడీ బిల్డింగ్ కోసం ఈ ఇంజెక్షన్లు వాడుతున్నాడని చెప్పారు.
ఒక్కొక్కటి రూ.324కు కొనుగోలు చేసి, గౌలిపురా మార్కెట్‌లో ఎక్కువ ధరకు అమ్మాడన్నారు. మరో నిందితుడు అహ్మద్ ఖురేషి కూడా ఇదే విధంగా బాడీ బిల్డింగ్ కోసం ఇంజెక్షన్లు వాడి, చంద్రాయణగుట్టలో అధిక ధరకు విక్రయించాడని పేర్కొన్నారు. పోలీసులు పక్కా సమాచారంతో వారిని అరెస్ట్ చేసి, మొగల్‌పురా, చంద్రాయణగుట్ట పోలీసులకు అప్పగించారని తెలిపారు.
