శంషాబాద్, వెలుగు: శంషాబాద్లో నకిలీ ఇన్సూరెన్స్ పేపర్లతో అమాయకులను మోసం చేస్తున్న ముఠా గుట్టు రట్టైంది. ఈ కేసు వివరాలను శంషాబాద్ ఏసీపీ శ్రీనివాస్ శుక్రవారం వెల్లడించారు. ఈ నెల16న రిలయన్స్ ఇన్సూరెన్స్ కంపెనీకి చెందిన మృణాల్ కుమార్ తమ కంపెనీ పేపర్లు ఫోర్జరీ అయ్యాయని శంషాబాద్ ఆర్జీఐ పీఎస్లో ఫిర్యాదు చేశాడు. దీంతో పోలీసులు కేసు నమోదు చేసి దర్యాప్తు చేపట్టారు. ఆర్బీ నగర్లో శ్రవణ్ కుమార్ అనే వ్యక్తి వద్ద కొన్ని నకిలీ ఇన్సూరెన్స్ పేపర్లు గుర్తించి విచారించారు.
అతడి ఇచ్చిన సమాచారంతో ఈ కేసులో అసలు సూత్రధారి శివ కుమార్తో సహా మరో ఇద్దరిని అరెస్ట్ చేశారు. నిందితుల వద్ద రిలయన్స్, టాటా ఏఐజీ ఇన్సూరెన్స్ పత్రాలతో పాటు కంప్యూటర్లు స్వాధీనం చేసుకున్నారు. ఈ ముఠాలోని మరో 11 మంది సభ్యుల కోసం గాలిస్తున్నట్లు ఏసీపీ శ్రీనివాస్ తెలిపారు.
