మెహిదీపట్నం, వెలుగు: ఒక సెల్ఫోన్ పోయిందని పోలీసులు రికవరీకి వెళ్తే.. ఓ దొంగ వద్ద మరో 105 మొబైల్స్ దొరికాయి. ఈ కేసు వివరాలను హైదరాబాద్ లంగర్ హౌస్ పీఎస్లో గోల్కొండ ఏసీసీ సయ్యద్ ఫయాజ్ శుక్రవారం వెల్లడించారు. లంగర్ హౌస్ లోని మొఘల్ నగర్ కు చెందిన మహ్మద్ జలీల్ ఈ నెల 8న తన మొబైల్ పోయిందని స్థానిక పీఎస్లో ఫిర్యాదు చేశాడు. ఈ కేసులో సిద్దిపేట జిల్లా మిరుదొడ్డి మండలం ధర్మారం గ్రామానికి చెందిన కాడి అశోక్ ను నిందితుడిగా గుర్తించి పోలీసులు అరెస్ట్ చేశారు.
అతని వద్ద మరో105 సెల్ ఫోన్లు స్వాధీనం చేసుకున్నారు. ఈ కేసులో నిందితుడికి సహకరించిన గణేశ్ అనే వ్యక్తి పరారీలో ఉన్నట్లు పోలీసులు తెలిపారు. కేసును ఛేదించిన లంగర్ హౌస్ ఇన్స్పెక్టర్రఘుకుమార్ తో పాటు ఇతర క్రైమ్ సిబ్బందిని డీసీపీ అభినందించారు. నిందితుడుపై గతంలో హైదరాబాద్, రాచకొండ కమిషనరేట్ల పరిధిలో ఇప్పటికే 10 కేసులు నమోదైనట్లు చెప్పారు.
