సైబర్ నేరగాళ్ల కోసం పోలీసుల సెర్చ్ ఆపరేషన్

8 రాష్ట్రాల్లో నెల రోజులు సెర్చ్ ఆపరేషన్
33 కేసుల్లో 52 మందిని అరెస్టు చేసిన హైదరాబాద్ సైబర్ క్రైమ్ పోలీసులు
రూ.47.90 లక్షలు స్వాధీనం

హైదరాబాద్‌‌‌‌‌‌‌‌, వెలుగు: సైబర్ నేరగాళ్లు టార్గెట్‌‌‌‌‌‌‌‌గా హైదరాబాద్ సైబర్‌‌‌‌‌‌ క్రైమ్‌‌‌‌‌‌‌‌ పోలీసులు 8 రాష్ట్రాల్లో సెర్చ్‌‌‌‌‌‌‌‌ ఆపరేషన్ నిర్వహించారు. ఏపీ, గుజరాత్‌‌‌‌‌‌‌‌, కర్నాటక, ఢిల్లీ, ఉత్తరప్రదేశ్, మహారాష్ట్ర, పశ్చిమ బెంగాల్‌‌‌‌‌‌‌‌, బిహార్‌‌‌‌‌‌‌‌‌‌‌‌‌‌‌‌ లో నెల రోజుల పాటు సోదాలు చేశారు. ముగ్గురు బ్యాంక్‌‌‌‌‌‌‌‌ మేనేజర్లు సహా మొత్తం 52 మంది సైబర్ నేరగాళ్లను అరెస్ట్‌‌‌‌‌‌‌‌ చేశారు.

వీళ్లను డిజిటల్ అరెస్ట్‌‌‌‌‌‌‌‌, ట్రేడింగ్, ఇన్వెస్ట్‌‌‌‌‌‌‌‌మెంట్‌‌‌‌‌‌‌‌ ఫ్రాడ్స్‌‌‌‌‌‌‌‌ సహా 9 రకాల సైబర్ మోసాలకు సంబంధించి 33 కేసుల్లో అరెస్ట్‌‌‌‌‌‌‌‌ చేసి హైదరాబాద్ కు తరలించారు. రూ.47.90 లక్షల నగదు స్వాధీనం చేసుకున్నారు. బ్యాంక్ అకౌంట్లలోని మరో రూ.2.87 కోట్లు ఫ్రీజ్‌‌‌‌‌‌‌‌ చేశారు.

ఈ నిందితులకు దేశవ్యాప్తంగా నమోదైన 576 సైబర్‌‌‌‌‌‌‌‌‌‌‌‌‌‌‌‌ కేసులతో పాటు రాష్ట్రంలో నమోదైన 74 కేసులతో లింక్ ఉందని.. ఈ కేసుల్లో రూ.88.32 కోట్లు కొల్లగొట్టినట్టు గుర్తించారు. ఈ సెర్చ్‌‌‌‌‌‌‌‌ ఆపరేషన్ వివరాలను సీపీ సీవీ ఆనంద్‌‌‌‌‌‌‌‌ బుధవారం మీడియాకు వెల్లడించారు.

బెంగళూర్లో మ్యూల్ అకౌంట్స్ దందా..

కర్నాటకలోని బెంగళూర్ కేంద్రంగా బ్యాంక్ మేనేజర్లు నడిపిన మ్యూల్ అకౌంట్స్ దందాను హైదరాబాద్ సైబర్‌‌‌‌‌‌‌‌‌‌‌‌‌‌‌‌ క్రైమ్‌‌‌‌‌‌‌‌ పోలీసులు గుర్తించారు. ఇక్కడి విద్యారణ్యపురాలోని ఆర్బీఎల్ బ్యాంక్ బ్రాంచ్ మేనేజర్ శుభం కుమార్ ఝా, మల్లేశ్వరంలోని యాక్సిస్ బ్యాంక్ బ్రాంచ్ అసిస్టెంట్ వైస్ ప్రెసిడెంట్ హరూర్ రషీద్, పీన్యాకు చెందిన ఫ్యాబ్రికేషన్ వ్యాపారి ఆర్.మోహన్.. సైబర్ నేరగాళ్లకు బ్యాంక్ అకౌంట్స్ సప్లయ్ చేస్తున్నారు.

నకిలీ మెయిల్ ఐడీలతో మ్యూల్ అకౌంట్స్ క్రియేట్ చేస్తున్నారు. వీటిని చైనా, నేపాల్ లోని సైబర్ నేరస్తులకు విక్రయిస్తున్నారు. ఇందుకు గాను ఆయా అకౌంట్లలో డిపాజిట్ అవుతున్న నగదుకు అనుగుణంగా కమీషన్స్ తీసుకుంటున్నారు.

మ్యూల్ అకౌంట్లలో డిపాజిట్ అవుతున్న ఇండియన్ కరెన్సీని క్రిప్టో కరెన్సీగా మార్చి మళ్లీ విదేశాలకు తరలిస్తున్నారు. ఫేక్ అడ్రస్‌‌‌‌‌‌‌‌తో మహీటెక్ సొల్యూషన్స్ పేరుతో బంధన్ బ్యాంక్‌‌‌‌‌‌‌‌లో అకౌంట్ ఓపెన్ చేసిన నిందితులు.. నేపాల్, చైనాలోని సైబర్ నేరగాళ్లకు నెట్‌‌‌‌‌‌‌‌ బ్యాంకింగ్ లాగిన్ ఐడీ సహా పూర్తి క్రెడెన్షియల్స్ అందించారు.

ట్రేడింగ్‌‌‌‌‌‌‌‌లో హైదరాబాద్‌‌‌‌‌‌‌‌కు చెందిన ఓ బాధితుడి వద్ద సైబర్ నేరగాళ్లు కొట్టేసిన రూ.93.89 లక్షల్లో రూ.38 లక్షలు ఇతర అకౌంట్స్‌‌‌‌‌‌‌‌లోకి ట్రాన్స్‌‌‌‌‌‌‌‌ఫర్ చేసి క్రిప్టోగా మార్చారు. బాధితుడి ఫిర్యాదు ఆధారంగా పోయినేడాది ఆగస్టు 7న సిటీ సైబర్ క్రైమ్ పోలీసులు కేసు నమోదు చేసి దర్యాప్తు చేపట్టారు.

ఈ క్రమంలో బెంగళూర్‌‌‌‌‌‌‌‌‌‌‌‌‌‌‌‌ బంధన్ బ్యాంక్‌‌‌‌‌‌‌‌లోని మహీటెక్ సొల్యూషన్స్ అకౌంట్‌‌‌‌‌‌‌‌ నుంచి వివిధ అకౌంట్స్‌‌‌‌‌‌‌‌కి ట్రాన్స్ ఫర్స్ జరిగినట్టు గుర్తించారు. బ్యాంక్ మేనేజర్లు ఈ డబ్బును క్రిప్టో కరెన్సీగా మార్చి చైనా, నేపాల్ లోని సైబర్ నేరగాళ్లకు తరలిస్తున్నట్టు ఆధారాలు సేకరించారు. దేశవ్యాప్తంగా నమోదైన 20 కేసుల్లో రూ.23 కోట్ల అక్రమ లావాదేవీలు జరిపినట్టు గుర్తించారు.

ఏపీలో క్రిప్టో, హవాలా గ్యాంగ్..

ట్రేడింగ్‌‌‌‌‌‌‌‌ పేరుతో రూ.2.06 కోట్లు కొట్టేసిన మరో గ్యాంగ్‌‌‌‌‌‌‌‌లో కోటక్‌‌‌‌‌‌‌‌ మహీంద్రా బ్యాంక్ సేల్స్‌‌‌‌‌‌‌‌ మేనేజర్ కీలకంగా వ్యవహరించాడు. ఏపీ గుంటూరు జిల్లా జేఎన్‌‌‌‌‌‌‌‌టీయూలోని కోటక్ మహీంద్రా బ్యాంక్ సేల్స్ మేనేజర్‌‌‌‌‌‌‌‌‌‌‌‌‌‌‌‌ కాట శ్రీనివాసరావు, వెస్ట్‌‌‌‌‌‌‌‌గోదావరి జిల్లా వెల్పూరుకు చెందిన రెడ్డి ప్రవీణ్‌‌‌‌‌‌‌‌, హైదరాబాద్ షాలిబండకు చెందిన ట్రావెల్స్‌‌‌‌‌‌‌‌ ఆపరేటర్‌‌‌‌‌‌‌‌‌‌‌‌‌‌‌‌ మహ్మద్ ఇస్మాయిల్‌‌‌‌‌‌‌‌, బహదూర్‌‌‌‌‌‌‌‌‌‌‌‌‌‌‌‌పురాకు చెందిన క్రిప్టో ట్రేడర్‌‌‌‌‌‌‌‌‌‌‌‌‌‌‌‌ మహ్మద్‌‌‌‌‌‌‌‌ జునైద్‌‌‌‌‌‌‌‌, ఏపీ మచిలీపట్నంకు చెందిన మాగంటి జయకిరణ్గ్యాంగ్‌‌‌‌‌‌‌‌గా ఏర్పడ్డారు.

మల్టీపుల్‌‌‌‌‌‌‌‌ మ్యూల్ అకౌంట్స్‌‌‌‌‌‌‌‌ ఓపెన్ చేశారు. వీటి ద్వారా సైబర్ నేరగాళ్లు కొట్టేసిన డబ్బు విత్‌‌‌‌‌‌‌‌డ్రా చేయడంతో పాటు క్రిప్టో కరెన్సీగా మార్చుతున్నారు. ఈ క్రిప్టో కరెన్సీని హవాలా నెట్‌‌‌‌‌‌‌‌వర్క్‌‌‌‌‌‌‌‌ ద్వారా దుబాయ్‌‌‌‌‌‌‌‌లోని సైబర్ నేరగాళ్లకు అందిస్తున్నారు.

పోయినేడాది డిసెంబర్‌‌‌‌‌‌‌‌‌‌‌‌‌‌‌‌లో హైదరాబాద్‌‌‌‌‌‌‌‌కు చెందిన బాధితుడిని అనీషా ట్రేడింగ్‌‌‌‌‌‌‌‌ యాప్‌‌‌‌‌‌‌‌ పేరుతో ట్రాప్ చేశారు. అధిక లాభాలు ఇస్తామంటూ విడతల వారీగా రూ.2.06 కోట్లు కొట్టేశారు. బాధితుడి ఫిర్యాదు ఆధారంగా డిసెంబర్‌‌‌‌‌‌‌‌‌‌‌‌‌‌‌‌ 22న పోలీసులు కేసు నమోదు చేసి దర్యాప్తు చేపట్టారు.

బ్యాంక్ సేల్స్ మేనేజర్ సహా ఐదుగురిని అరెస్ట్ చేశారు. వీరి వద్ద రూ.47.50 లక్షల నగదు, రూ.40 లక్షలు విలువ చేసే క్రిప్టో కరెన్సీ, 33 చెక్ బుక్స్, 26 డెబిట్ కార్డులు, క్యాష్ కౌంటింగ్ మెషిన్స్ స్వాధీనం చేసుకున్నారు.

3 కోట్లు కొట్టేసిన గుజరాత్‌‌‌‌‌‌‌‌ గ్యాంగ్‌‌‌‌‌‌‌‌..

గుజరాత్‌‌‌‌‌‌‌‌కు చెందిన హర్పాల్‌‌‌‌‌‌‌‌ సింగ్‌‌‌‌‌‌‌‌(54), సయ్యద్‌‌‌‌‌‌‌‌ అయ్యుబ్‌‌‌‌‌‌‌‌ భాయ్‌‌‌‌‌‌‌‌(50)ని సైబర్‌‌‌‌‌‌‌‌ ‌‌‌‌‌‌‌‌క్రైమ్ పోలీసులు అరెస్ట్‌‌‌‌‌‌‌‌ చేశారు. వీరిద్దరూ హైదరాబాద్ లోని గుడిమల్కాపూర్‌‌‌‌‌‌‌‌‌‌‌‌‌‌‌‌కు చెందిన ఓ లేడీ డాక్టర్‌‌‌‌‌‌‌‌‌‌‌‌‌‌‌‌(54)కు పోయినేడాది డిసెంబర్‌‌‌‌‌‌‌‌‌‌‌‌‌‌‌‌లో కాల్‌‌‌‌‌‌‌‌ చేశారు. మనీ లాండరింగ్‌‌‌‌‌‌‌‌ కేసులో డాక్టర్ ఫోన్‌‌‌‌‌‌‌‌ నంబర్‌‌‌‌‌‌‌‌ దొరికిందని, మరో రెండు గంటల్లో సిమ్ కార్డ్‌‌‌‌‌‌‌‌ బ్లాక్ అవుతుందని బెదిరించారు.

స్కైప్‌‌‌‌‌‌‌‌ కాల్‌‌‌‌‌‌‌‌లో ఢిల్లీ ఐపీఎస్‌‌‌‌‌‌‌‌ అధికారిగా మాట్లాడుతూ.. సుప్రీంకోర్టు సీజే ఆదేశాల మేరకు బ్యాంక్‌‌‌‌‌‌‌‌ అకౌంట్ల వివరాలు వెల్లడించాలని బ్లాక్‌‌‌‌‌‌‌‌మెయిల్‌‌‌‌‌‌‌‌ చేశారు. లేని పక్షంలో డాక్టర్ భర్త, కుమారుడికి ప్రాణహాని ఉంటుందని బెదిరించారు. డాక్టర్‌‌‌‌‌‌‌‌‌‌‌‌‌‌‌‌ ఫిక్స్ డ్ డిపాజిట్స్‌‌‌‌‌‌‌‌లో నుంచి రూ. 3 కోట్లు కొల్లగొట్టారు.